Ti Natangsit ken ti Napakumbaba
Kapitulo 39
Ti Natangsit ken ti Napakumbaba
KALPASAN ti panangdakamatna kadagiti pagimbagan ni Juan a Mammautisar, inturong ni Jesus ti atensionna kadagiti natangsit, managbaliwbaliw a tattao nga adda iti aglawlawna. “Daytoy a kaputotan,” kunana, “maipadis kadagiti ubbing nga agtutugaw kadagiti plasa ket ik-ikkisanda dagiti kakaduada, a kunkunada, ‘Tinokarandakayo ti plauta, ket dikayo nagsala; indung-awandakayo, ket dikay nagladingit.’”
Aniat’ kayat a sawen ni Jesus? Inlawlawagna: “Nga immay ni Juan a di nangan ken di met uminum idi, ket kuna dagiti tattao, ‘Adda sairona’; immay toy Anak ti tao a mangan ken uminum, kaskasdi kuna dagiti tattao, ‘Adtoy! Ti maysa a tao a mannangan ken managinum ti arak, pagayam dagiti agsingsingir ti buis ken dagiti managbasol.’”
Imposible ti panangpennek kadagiti tattao. Awan ti makaay-ayo kadakuada. Nagbiag ni Juan iti nakasimsimple a panagbiag iti panagsakripisio kas maysa a Nazareo, a maitunos ti kuna ti anghel a “saanto nga uminum ti arak ken ti inumen a naingel.” Kaskasdi kuna dagiti tattao nga isu adda demoniona. Iti kasumbangirna, nagbiag ni Jesus kas kadagiti dadduma a tattao, a dina inalagad ti aniaman a kinasimple, ket isu ti napabasol a managlablabes.
Anian a nagrigat nga ay-ayuen dagiti tattao! Maipadisda kadagiti aggaayam a dadduma madida nga agsala idi a dagiti dadduma nga ubbing tinokaranda ida ti plauta wenno agladingit idi isudat’ dinung-awan dagiti padada. Nupay kasta, kuna ni Jesus: “Ngem ti kinasirib mapaneknekan gapu kadagiti gapuananna.” Wen, ti pammaneknek—dagiti ar-aramid—pinagbalinna a nalawag a dagiti pammabasolda a maibusor kada Juan ken Jesus ulbodda.
Kalpasanna impamaysa ni Jesus ti pananglais kadagiti tallo a siudad ti Corazin, Betsaida, ken Capernaum, nga isut’ nangaramidanna iti kaaduan kadagiti nakaskasdaaw nga ar-aramidna. No inaramidna koma dagita kadagiti siudad ti Tiro ken Sidon idiay Fenecia, kuna ni Jesus, nagbabawi koma dagitoy a siudad iti cilicio ken dapo. Iti panangilunodna iti Capernaum, a kaawatan isu ti nagtaenganna bayat ti panawen ti ministeriona, kuna ni Jesus: “Nalaglag-anto pay laeng ti dusa ti daga ti Sodoma ngem ti maipaay kenka iti Aldaw ti Pannakaukom.”
Sumaganad indaydayaw ni Jesus iti publiko ti nailangitan nga Amana. Isut’ natignay a mangaramid iti kasta agsipud ta inlemmeng ti Dios dagiti napapateg a naespirituan a kinapudno manipud kadagiti mamasirib ken mannakaawat ngem impanayagna dagiti nakaskasdaaw a bambanag kadagiti napakumbaba, kadagiti ub-ubbing, iti kaiyariganna.
Kamaudiananna, impaay ni Jesus ti makaallukoy a panangawis: “Umaykayo kaniak, dakayo amin nga agrigrigat ken madagdagsenan ta paginanaenkayto. Alaenyo ti sangolko kadakayo, ket agsursurokayo kaniak, ta siak naemmaak ken napakumbabaak ti panagpuspuso, ket makasarakkayto ti inana a maipaay kadagiti kararuayo. Ta ti sangolko nalaka ken nalag-an ti awitko.”
Kasano ti panangipaay ni Jesus ti inana? Aramidenna dayta babaen ti panangipaayna ti wayawaya manipud kadagiti makaadipen a tradision nga isu ti impabaklay dagiti narelihiusuan a papangulo kadagiti tattao, agraman kas pangarigan, dagiti makalapped unay a pagalagadan ti panangsalimetmet iti aldaw a Panaginana. Impakitana met ti dalan nga agturong iti pakabang-aran kadagidiay mangrikna iti napalalo a kinadagsen ti panangdominar dagiti napolitikaan a turturay ken dagidiay madagdagsenan kadagiti basbasolda gapu iti maburiburan a konsiensiada. Impanayagna kadagita a madagdagsenan no kasano a mapakawan ti basbasolda ken no kasano a matagiragsakda ti nasudi a pannakirelasion iti Dios.
Ti nalag-an a sangol nga ituktukon ni Jesus isut’ maysa a naan-anay a dedikasion iti Dios, a makapagserbi iti manangngaasi, managayat a nailangitan nga Amatayo. Ket ti nalag-an nga awit nga ituktukon ni Jesus kadagiti umay kenkuana isu ti panagtulnog kadagiti pagalagadan ti Dios a maipaay ti biag, a dagitoy dagiti bilbilinna a naisurat iti Biblia. Ket ti panagtulnog kadagitoy saanda pulos a makapadagsen. Mateo 11:16-30; Lucas 1:15; 7:31-35; 1 Juan 5:3.
▪ Kasano a dagiti natangsit, managbaliwbaliw a tattao iti kaputotan ni Jesus naipadisda kadagiti ub-ubbing?
▪ Apay a natignay ni Jesus a mangidayaw iti nailangitan nga Amana?
▪ Kadagiti ania a pamay-an a madagdagsenan dagiti tattao, ket ania a panangpalag-an ti intukon ni Jesus?