Kapitulo 100

Ti Pangngarig Dagiti Mina

NALABIT adda pay laeng ni Jesus idiay balay da Zaqueo, a nagsardenganna idi agturong idiay Jerusalem. Patien dagiti adalanna nga inton makagtengda idiay Jerusalem, iwaragawagnanto nga isut’ Mesias ket ibangonnanto ti Pagarianna. Tapno makorehir daytoy a kapanunotan ken ipakita a ti Pagarian ket adayo pay, nangted ti pangngarig ni Jesus.

“Maysa a tao a natan-ok,” insalaysayna, “napan iti maysa a daga nga adayo tapno awatenna ti panagarina ket sa agsublinto.” Ni Jesus daydiay “tao a natan-ok,” ket idiay langit ti “daga nga adayo.” Inton makagteng ni Jesus sadiay, ni Amana ti mangted kenkuana ti naarian a pannakabalin.

Sakbay ti ipapanawna, nupay kasta, ti tao a natan-ok inayabanna ti sangapulo nga ad-adipen ket inikkanna ida a sinaggaysa ti mina a pirak, a kunkunana: “Pagsapulyo agingga iti agsubliak.” Dagiti sangapulo nga adipen iti umuna a kaitungpalanna irepresentarda dagiti immuna nga adalan ni Jesus. Iti napalawa nga aplikasion, iladladawanda dagiti amin a manamnama a makipagtawid a kaduana iti nailangitan a Pagarian.

Dagiti pirak a mina ket napapategda a kuarta, a tunggal maysa agbalor iti agarup tallo bulan a sueldo ti agtartrabaho iti talon. Ngem aniat’ irepresentar dagiti mina? Ken ania a kita ti pagsapulan ti pangusaran dagiti adipen iti dayta?

Dagiti mina irepresentarda dagiti sanikua a mabalin nga usaren dagiti napulotan iti espiritu nga adalan iti panangpataud iti ad-adu pay nga agtawid iti nailangitan a Pagarian agingga iti iyuumay ni Jesus kas Ari iti naikari a Pagarian. Kalpasan ti panagungarna ken panagparangna kadagiti adalanna, intedna kadakuada dagiti simboliko a mina maipaay iti panangaramid iti ad-adu pay nga adalan ket iti kasta mainayonda iti grupo ti Pagarian iti langit.

“Ngem,” intuloy ni Jesus, “dagidi kailianna kinagurada [daydi tao a natan-ok] ket nangibaonda iti bagi dagiti embahador a sumurot kenkuana, a kunaenda, ‘Dikam kayat nga agari daytoy kadakami.’” Dagiti kailianna isuda dagiti Israelita, wenno Judio, a dina iraman dagiti adalanna. Kalpasan ti ipapanaw ni Jesus nga agturong idiay langit, dagitoy a Judio babaen ti panangidadanesda kadagiti adalanna impakaammoda nga isut’ dida kayat nga agbalin nga arida. Iti daytoy a pamay-an agtigtignayda kas kadagiti kailianna a nangibaon iti bagi dagiti embahador.

Kasanot’ panangusar dagiti sangapulo nga adipen kadagiti minada? Ilawlawag ni Jesus: “Ket naaramid nga idi simmubli kalpasan ti panangawatna iti naarian a pannakabalinna, pinaayabanna dagidi nga adipen, isuda a nangtedanna idi ti pirak, tapno maammuanna ti nasapulanda. Ket immay ti immuna, a kunana, ‘Apo ti minam nakagun-od ti sangapulo a mina.’ Ket isu kinunana kenkuana, ‘Naimbag, nalaing nga adipen! Agsipud ta iti bassit unay napagtalkanka, adda turaymo iti sangapulo a siudad.’ Ket immay ti maikadua, a nagkuna, ‘Apo, ti minam nakasapul ti lima a mina.’ Ket iti daytoy kinunana met, ‘Sika, agturayka met iti lima a siudad.’”

Ti adipen nga addaan sangapulo a mina iladladawanna ti maysa a klase, wenno grupo, dagiti adalan manipud Pentecostes ti 33 K.P. agingga ita a mangiraman kadagiti apostol. Dagidiay nakagun-od ti lima a mina irepresentarna met ti maysa a grupo iti dayta met laeng a panawen a, sigun kadagiti gundaway ken abilidadda, parang-ayenda dagiti sanikua ti arida ditoy daga. Agpadpada dagitoy a grupo a sireregta a mangikaskasaba ti naimbag a damag, ket kas resultana, adu a nasingpet panagpuspusona a tattao ti agbalin a Kristiano. Siam kadagiti adipen ti naballigi a pinagsapulda ti mina ket napaaduda ti sanikuada.

“Ngem,” intuloy ni Jesus, “immay ti maysa a kinunana, ‘Apo, adtoy ti minam, nga indulinko iti maysa a panio. Ta nagbutengak kenka, ta taoka a nainget; alaem ti dika inkabil ket aniem ti dika immula.’ Ket kinunana kenkuana, ‘Dakes nga adipen, iti ngiwatmo ti pangukomak kenka. Ammom a taoak a nainget, nga alaek ti diak inkabil ken aniek ti diak immula? Apay-apay ngarud a dika inkabil ti pirakko iti banko? Tapno inton dumtengak singirekto agraman gunggonana?’ Ket kinunana kadagiti adda a sisasango, ‘Ikkatenyo kenkuana ti mina ket itedyo iti addaan kadagiti sangapulo a mina.’”

Iti dakes nga adipen, ti pannakapukaw ti simboliko a mina kaipapananna met ti pannakapukaw ti lugar iti nailangitan a Pagarian. Wen, iti arigna, napukawna ti pribilehio a makipagturay, iti sangapulo a siudad wenno lima a siudad. Kitaenyo pay met, ta ti adipen saan a naawagan a dakes gapu iti aniaman a kinadakes nga inaramidna, no di ket, gaput’ pannakapaayna a di nangparang-ay iti kinabaknang ti pagarian ti apona.

Idi ti mina ti dakes nga adipen naited iti umuna nga adipen, adda simmuppiat a kunada: “Apo, addaanen ti sangapulo a mina!” Kaskasdi, simmungbat ni Jesus: “Siak kunak kadakayo nga uray siasino nga addaan, maikkanto; ngem iti awanan, uray pay ti adda kenkuana, maikkatto. Ngem, kadagidiay kabusorko a dida kayat koma nga agariak kadakuada iyegyo ditoy ket putolanyo ida iti sanguanak.” Lucas 19:11-27; Mateo 28:19, 20.

▪ Aniat’ nangtignay ti pangngarig ni Jesus maipapan kadagiti mina?

▪ Asino daydiay tao a natan-ok, ket ania ti daga a papananna?

▪ Asino dagiti adipen, ket aniat’ irepresentar dagiti mina?

▪ Asino dagiti umili, ken kasanot’ panangipakitadat’ gurada?

▪ Apay a ti maysa nga adipen naawagan ti dakes, ket aniat’ kaipapanan ti pannakapukawna ti mina?