Kapitulo 27

Ti Pannakaawis ni Mateo

DI NAGBAYAG kalpasan ti panangagasna iti paralitiko, rimmuar ni Jesus manipud Capernaum a napan idiay Baybay ti Galilea. Immay manen dagiti adu a tattao kenkuana, ket rinugianna a sinursuruan ida. Bayat ti pampannagnana, nakitana ni Mateo, a maaw-awagan met Levi, a situtugaw iti pagsingiran ti buis. “Surotennak,” inyawis ni Jesus.

Awan duadua, pagaammo ni Mateo dagiti pannursuro ni Jesus, kas met kada Pedro, Andres, Santiago, ken ni Juan idi a naawisda. Ket kas kadakuada, dagus a nagtignay ni Mateo iti dayta nga awis. Isut’ timmakder, pinanawanna dagiti responsabilidadna kas agsingsingir ti buis, ket sinurotnan Jesus.

Kamaudiananna, nalabit tapno rambakan ti panangawatna iti pannakaawisna, nangangay ni Mateo ti dakkel a padayá idiay balayna. Mainayon ken Jesus ken kadagiti adalanna, dagiti dati a kakadua ni Mateo ti siimatang. Dagitoy a lallaki kadarato a lalaisen dagiti padada a Judio gapu ta agsingsingirda ti buis a maipaay iti kagurgurada nga agtuturay a Romano. Mainayon pay, masansan a sisusuitikda nga agdawat ti ad-adu a kuarta manipud kadagiti tattao ngem iti gagangay a pagbayadda a buis.

Idi nakitada ni Jesus iti padayá a kadua dagiti kakasta a tattao, dagiti Fariseo nagsaludsodda kadagiti adalanna: “Apay-apay makipangan ti mannursuroyo kadagiti agsingsingir ti buis ken kadagiti managbasol?” Idi nangngegna ti saludsod, simmungbat ni Jesus kadagiti Fariseo: “Dagiti nakaradkad awan ti pakasapulanda iti mangngagas, no di dagiti masakit. Inkayo, ngarud, ket adalenyo no ania ti kayatna a sawen daytoy, ‘Asi ti kalikagumak, ket saan a daton.’ Ta saanak nga immay nga agayab kadagiti nalinteg, no di ket kadagiti managbasol.”

Nalawag, inawis ni Mateo dagitoy nga agsingsingir ti buis idiay balayna tapno denggenda ni Jesus ken umawatda iti naespirituan a pannakaagas. Gapuna nakilangen ni Jesus kadakuada tapno tulonganna ida a makagun-od iti nasalun-at a pannakirelasion iti Dios. Saan a laisen ni Jesus dagiti kakasta, a kas kadagiti managinsisingpet a Fariseo. Imbes ketdi, gapu iti pannakatignay ti asina isu, iti kayariganna, nagserbi kas naespirituan a mangngagas kadakuada.

Gapuna ti panangipakita ni Jesus ti asina kadagiti managbasol ket saan a panangkonsintir kadagiti basbasolda no di ket ebkas ti isu met laeng a kinamanagayat nga impamatmatna kadagiti masaksakit iti pisikal. Malagipyo pay, kas pangarigan, idi siaasi nga ingaw-atna ti imana iti maysa nga agkukutel, a kunkunana: “Kayatko. Madalusanka koma.” Sapay koma ta mangipakitatayo met ti asi babaen iti panangtulong kadagiti tattao nga agkasapulan, a tulongan ida nangnangruna iti naespirituan a pamay-an. Mateo 8:3; 9:9-13; Marcos 2:13-17; Lucas 5:27-32.

▪ Sadinot’ yan ni Mateo idi isut’ makita ni Jesus?

▪ Aniat’ panggedan ni Mateo, ket apay a dagiti kakasta a tattao ti lalaisen dagiti dadduma a Judio?

▪ Ania a reklamo ti naaramid a maibusor ken Jesus, ket kasano ti panangsungbatna?

▪ Apay a nakilangen ni Jesus kadagiti managbasol?