Kapitulo 84

Ti Responsabilidad ti Kinaadalan

KALPASAN ti ipapanawna iti balay ti maysa a prominente a Fariseo, a kaawatan kameng ti Sanhedrin, nagturongen ni Jesus idiay Jerusalem. Umariwekwek ti simmurot kenkuana. Ngem aniat’ motiboda? Ania a talaga ti ramanen ti panagbalin a pudpudno a pasurotna?

Bayat ti ikukuyogda, timmalliaw ni Jesus iti umariwekwek ket nalabit kinellaatna ida idi a kinunana: “No asinoman a tao ti umay kaniak ket dina guraen ni amana ken ni inana ken ni asawana ken dagiti annakna ken dagiti kakabsatna a lallaki ken babbai, ken ti kararuana met laeng, saan a makapagbalin nga adalak.”

Aniat’ kayat a sawen ni Jesus? Saan nga ibagbaga ni Jesus a dagiti pasurotna literal a guraenda dagiti kakabagianda. Imbes ketdi, masapul a guraenda ida iti punto nga ayatenda ida a basbassit ngem ti panagayatda kenkuana. Ti inapo ni Jesus a ni Jacob naikuna a “ginurana” ni Lea ken inayatna ni Raquel, a kayatna a sawen a ni Lea ket naayat iti basbassit ngem ni Raquel a kabsatna.

Ket, panunotenyo pay met, a kinuna ni Jesus a ti adalan rebbeng a guraenna “ti kararuana met laeng,” wenno ti biagna a mismo. Ditoy manen ti kayat a sawen ni Jesus a ta ti pudno nga adalan masapul nga agayat Kenkuana iti dakdakkel pay ngem ti panagayatna iti biagna a mismo. Ipagpaganetget ngarud ni Jesus a ti panagbalin nga adalanna ket maysa a serioso a responsabilidad. Daytat’ saan a maysa a banag nga alaen nga awan naannad a panangusig.

Ti rigat ken pannakaidadanes ket nairaman iti panagbalin nga adalan ni Jesus, kas ituloyna nga ipamatmat: “Uray siasino nga umay sumurot kaniak ken dina baklayen ti kayona a pagtutuokan saan a makapagbalin nga adalak.” Gapuna, ti maysa a pudno nga adalan masapul a situtulok a lumasat kadagiti isu met laeng a pannakalalais nga inibturan ni Jesus, agraman, no kasapulan, ti ipapatay iti im-ima dagiti kabusor ti Dios, nga isut’ ngangnganin aramiden ni Jesus.

Ti panagbalin nga adalan ni Kristo, ngarud, ket maysa a banag a masapul nga usigen a siaannad unay dagiti umariwekwek a sumursurot kenkuana. Impaganetget ni Jesus daytoy a kinapudno babaen iti maysa nga ilustrasion. “Ta,” kinunana, “asino kadakayo ti idinto a kayatna a mangbangon ti maysa a torre di agpanunot nga umuna kadagiti masapul a gastuen ta kitaenna no adda umanay a pangleppas? Di la ket ta, inton naikabilnan ti pamuon ket saanna a mabalin a leppasenen, amin dagiti makakita rugianda nga uy-uyungan, a kunkuna, ‘Daytoy a tao nangrugi a nangbangon ket dina nabalin a lineppas.’”

Gapuna inyilustrar ni Jesus kadagiti umariwekwek a sumursurot kenkuana a sakbay ti panagbalinda nga adalanna, rebbeng a naikeddengdan a sititibker a matungpalda dagiti nairaman a bambanag, kas ti maysa a tao a kayatna ti mangbangon ti maysa a torre siguraduenna sakbay a rugianna nga isut’ addaan ti kuarta a pangileppas iti dayta. Babaen iti sabali manen a pangngarig, intuloy ni Jesus:

“Wenno asino ti ari, nga idinto a mapan gumubat iti sabali nga ari, di agpanunot nga umuna ket iyumanna no adda pannakabalinna a mangisango ti sangsangapulo a ribo iti daydiay umay manggubat kenkuana nga addaan duapulo a ribo? Ta no saan, inton ti sabali nga ari adda pay laeng iti adayo mangibaonto ti mapan makitulag kenkuana kadagiti kondision ti kappia.”

Kalpasanna impaganetget ni Jesus ti punto ti ilustrasionna, a kunkunana: “No kasta ngarud, uray siasino kadakayo a dina paglikudan dagiti isuamin a kukuana saan a makapagbalin nga adalak.” Dayta koma ti masapul a situtulok nga aramiden dagiti umariwekwek a sumursurot kenkuana, ken, wen, tunggal maysa pay a makaammo ken Kristo. Masapul a sisasaganada a mangisakripisio ti isuamin nga adda kadakuada​—amin a sanikuada, agraman biag a mismo​—tapno agbalindanto nga adalanna. Situtulokkayo aya a mangaramid iti daytoy?

“Nasayaat ti asin,” intuloy ni Jesus. Idiay Sermonna iti Bantay, kunana a dagiti adalanna isuda “ti asin ti daga,” kayatna a sawen nga addaanda ti makaipreserbar nga impluensia kadagiti tattao, kas met laeng a ti literal nga asin ket preserbatiba. “Ngem no ti asin tumamnay, anianto ti pagtempla? Awanen ti pagpaayanna, uray iti daga ken uray iti pagibellengan ti pagpataba,” impatingga ni Jesus. “Ngem ibellengda iti ruar. Ti adda pagdengngegna dumngeg koma.”

Gapuna ipakpakita ni Jesus nga uray dagidiay nabayagen nga adalanna masapul a saanda koma a kumapuy iti determinasionda nga agtultuloy. No kumapuyda, agbalinda nga awan mamaayna, maysa a pagkakatawaan laeng iti daytoy a lubong ket saanda a maikari iti saklang ti Dios, kinapudnona, pakaumsian ti Dios ida. Gapuna, kas ti timmamnayen, kontaminado nga asin, maibellengdanto iti ruar, wen, madadaeldanto. Lucas 14:25-35; Genesis 29:30-33; Mateo 5:13.

▪ Aniat’ kayat a sawen ti ‘pananggura’ iti kakabagian ti maysa ken ti bagina met laeng?

▪ Ania a dua a pangngarig ti inted ni Jesus, ket ania ti kaipapananda?

▪ Ania ti punto ti pangserra a komento ni Jesus maipapan iti asin?