Kapitulo 69

Ti Susik iti Kinaama

BAYAT ti piesta, ad-adda a bimmara ti pannakipatang ni Jesus kadagiti papangulo a Judio. “Ammok a kaputotannakayo ni Abraham,” binigbig ni Jesus, “ngem agawaandak a papatayen, ta ti saok awan pagiananna kadakayo. Siak sawek dagiti nakitak ken Amak; ket dakayo met, aramidenyo dagiti nangngegyo ken amayo.”

Nupay dina imbaga no asino ti amada, pinagbalin a nalawag ni Jesus a ti amada ket naiduma iti amana. Gapu ta dida a pagaammo no siasino ti adda iti panunot ni Jesus, insungbat dagiti pangulo a Judio: “Ti amami isu ni Abraham.” Patienda nga addaanda ti isu met laeng a pammati a kas ken ni Abraham, a gayyem ti Dios.

Nupay kasta, kinellaat ni Jesus ida iti sungbatna: “No annaknakayo koma ni Abraham, dagiti aramid ni Abraham koma ti aramidenyo.” Pudno unay, ti pudpudno nga anak tuladenna ni amana. “Ngem ita agawaandak a papatayen,” kuna ni Jesus, “toy tao a nagsao kadakayo iti pudno a nangngegko iti Dios. Daytoy saan nga inaramid ni Abraham.” Gapuna kinuna manen ni Jesus: “Dakayo aramidenyo dagiti ar-aramid ni amayo.”

Kaskasdi saanda a naawatan no siasinot’ sarsaritaen ni Jesus. Inkalinteganda latta nga isuda ti lehitimo nga anak ni Abraham, a kunkunada: “Dakami saankam a naiyanak iti pannakikamalala.” Gapuna, iti panagkunada nga isuda dagiti pudno a managdaydayaw kas ken ni Abraham, impilitda: “Adda maymaysa nga Amami, nga isu ti Dios.”

Ngem ti Dios kadi ti pudpudno nga Amada? “No ti Dios koma ti Amayo,” insungbat ni Jesus, “ayatendak koma, ta immayak ken naggapuak iti Dios. Ta saanak nga immay a naknakemko laeng, ngem Isu imbaonnak. Ania ti gapu a dikay maawatan ti panagsaok?”

Pinadpadas nga impakita ni Jesus kadagitoy a papangulo ti relihion ti pagtungpalan ti panangilaksidda kenkuana. Ngem ita sibabatad a kinunana: “Kukuanakayo ti Diablo nga amayo, ket kayatyo nga aramiden dagiti kalikagum ni amayo.” Ania a kita ti ama ti Diablo? Isu ti impakita ni Jesus kas mammapatay ken kinunana pay: “Isu managulbod ken ama ti kinaulbod.” Gapuna nagpatingga a kinuna ni Jesus: “Ti agtaud iti Dios denggenna dagiti sao ti Dios. Gapu iti daytoy dakayo dikay agdengngeg, ta saankayo a nagtaud iti Dios.”

Gaput’ pannakaungetda iti panangkondenar ni Jesus, insungbat dagiti Judio: “Saan aya a naimbag ti panagkunami a taga Samariaka, ken adda sairom?” Ti termino a “taga Samaria” ket maus-usar kas sao a pananglais ken panangbabalaw, ta dagiti Samaritano ket tattao a kagurgura dagiti Judio.

Iti saanna a panangikankano iti pananglaisda kas maysa a Samaritano, insungbat ni Jesus: “Siak awan ti sairok, no di ket padayawak ni Amak, ket dakayo ibabaindak.” Iti panangituloyna, nangited ni Jesus iti nakaskasdaaw a kari: “No adda mangsalimetmet iti saok, saannanto a makita ni patay uray kaano.” Siempre, di kayat a sawen ni Jesus nga amin dagidiay sumursurot kenkuana ket literal a didanto makita ni patay. Imbes ketdi, kayatna a sawen a didanto pulos makita ti agnanayon a pannakadadael, wenno “maikadua nga ipapatay,” nga iti dayta awanton ti panagungar.

Nupay kasta, ti pannakatarus dagiti Judio iti sasao ni Jesus ket literal. Gapuna, kinunada: “Ita ammomin nga adda sairom. Ni Abraham natay, kasta met dagiti mammadto; ket kunam, ‘No adda mangsalimetmet iti saok, dinanto maramanan ni patay uray kaano.’ Dakdakkelka aya ngem ni amatayo nga Abraham, isu a natay? Ken kasta met, dagiti mammadto natayda. Asino ti panangipapanmo iti bagim?”

Iti amin daytoy a panagpapatang, nalawag nga itudtudo ni Jesus kadagitoy a tattao ti kinapudno nga isu ti naikari a Mesias. Ngem imbes a direkta a sungbatannat’ saludsodda maipapan iti kinasiasinona, kuna ni Jesus: “No dayawek ti bagik met laeng, ti dayawko awan kapapaayanna. Ni Amak ti mangidayaw kaniak, nga isu ti kunayo a Diosyo; ket isu dikay naammuan. Ngem siak ammok. Ket no kunak koma a diak ammo kaslaakto koma kadakayo, a naulbod.”

Iti panangituloyna, dinakamat manen ni Jesus ni matalek nga Abraham, a kunkunana: “Ni Abraham nga amayo nagragsak iti panagkitana iti aldawko, ket nakitana ket nagrag-o.” Wen, babaen kadagiti mata ti pammati, kimmita ni Abraham iti masanguanan iti iyaayto ti naikari a Mesias. Iti kinaawan pammatida, simmungbat dagiti Judio: “Awan pay limapulo a tawenmo, ket nakitam aya ni Abraham?”

“Pudno, pudno, kunak kadakayo,” insungbat ni Jesus, “idi kasanguanan ti pannakaiyanak ni Abraham, addaakon.” Ni Jesus, siempre, tuktukoyenna ti panagbiagna sakbay a nagbalin a tao kas maysa a mannakabalin nga espiritu a persona idiay langit.

Gaput’ pannakapungtotda iti panagkuna ni Jesus nga isu ket addan sakbay ni Abraham, pimmidut dagiti Judio ti batbato tapno uborenda. Ngem isu ti naglemmeng ket rimmuar iti templo a di nadangran. Juan 8:37-59; Apocalipsis 3:14; 21:8.

▪ Kasanot’ panangipakita ni Jesus nga isu ken dagiti kabusorna addaanda kadagiti nagduma nga amma?

▪ Aniat’ kaipapanan ti panangawag dagiti Judio ken ni Jesus a kas Samaritano?

▪ Iti ania a pannakaawat ti kayat a sawen ni Jesus a dagiti pasurotna didanto makita ni patay?