Kapitulo 22

Uppat nga Ad-adalan ti Naawis

KALPASAN iti panangipangtada iti biag ni Jesus idiay ilina a Nasaret, isut’ immakar idiay siudad ti Capernaum nga asideg ti Baybay ti Galilea. Daytoy ti nangtungpal ti sabali manen a padto ni Isaias. Isu daydiay nangipadto a dagiti umili ti Galilea nga agtataeng iti denna ti baybay makakitadanto ti dakkel a lawag.

Bayat ti panangitultuloy ni Jesus iti mangaw-awit iti lawag a trabahona a panangikaskasaba ti Pagarian ditoy, nasarakanna ti uppat kadagiti ad-adalanna. Dagitoy nakipagdaliasatdan kenkuana nga imun-una ngem nagsublida iti panagdakdaklisda idi a nagsublida a kadua ni Jesus manipud Judea. Awan duadua, a birbiruken ita ni Jesus ida, ta panawenen a maaddaan iti agtultuloy, regular a katulongan a mabalinna a sanayen a mangitultuloyto iti ministerio kalpasan ti ipapanawna.

Gapuna bayat a magmagna ni Jesus iti igid ti baybay ken nakitana ni Simon Pedro ken dagiti kakaduana a mangbugbuggo kadagiti iketda, immasideg kadakuada. Isut naglugan iti barangay ni Pedro sana indawat nga iyadayona bassit iti daga. Idi makaadayoda bassiten, nagtugaw ni Jesus iti barangay ket rinugianna a sinursuruan dagiti adu a tattao nga adda idiay igid.

Kalpasanna, kuna ni Jesus ken Pedro: “Agpataawka ket iwayatmo dagiti iketyo, ta kumalapkay pay.”

“Mannursuro,” insungbat ni Pedro, “nagbannogkami a nagpatpatnag ket awan ti naalami, nupay kasta gapu iti saom iwayatko.”

Idi a naibaban dagiti iket, kasta unay a nagadu nga ikan ti nakalapanda ket napugpugsat dagiti iketda. Ket dagdagus, dagiti lallaki sininiasanda dagiti kakaduada iti sabali a barangay tapno umayda tumulong. Di nagbayag dagiti dua a barangay napnoda kadagiti adu nga ikan ket mangrugidan a lumned. Idi makitana daytoy, nagparintumeng ni Pedro iti sanguanan ni Jesus ket kunana: “Adaywannak, ta taoak a managbasol, Apo.”

“Dika agbuteng,” insungbat ni Jesus. “Manipud ita mangngalapkanton kadagiti tattao a sibibiag.”

Ni Jesus inawisna met ni Andres a kabsat ni Pedro. “Umaykay sumurot kaniak,” ingunamgunamna kadakuada, “ket pagbalinenkayto a dumadaklis kadagiti tattao.” Ti kakaduada a dumadaklis a da Santiago ken Juan, nga annak ni Zebedeo, naawisda met iti kasta, ket isuda met, simmurotda nga awan panagalikaka. Gapuna dagitoy uppat pinanawanda ti panagdakdaklisda ket nagbalinda a dagiti umuna nga uppat kadagiti agtultuloy, regular a paspasurot ni Jesus. Lucas 5:1-11; Mateo 4:13-22; Marcos 1:16-20; Isaias 9:1, 2.

▪ Apay inawis ni Jesus dagiti adalanna a sumurot kenkuana, ken asinoda dagitoy?

▪ Ania a milagro ti nangpabuteng ken Pedro?

▪ Ania a kita ti panagdaklis ti nangawisan ni Jesus nga aramiden dagiti adalanna?