“Tiempo ti Naimbag a Nakem”
Kapitulo Dies
“Tiempo ti Naimbag a Nakem”
1, 2. (a) Ania a bendision ti tinagiragsak ni Isaias? (b) Siasino dagiti nainaig iti naimpadtuan a sasao a nairekord iti umuna a kagudua ti Isaias kapitulo 49?
NABAYAGEN a tagtagiragsaken ti amin a matalek a tattao ti anamong ken salaknib ti Dios. Ngem pilien ni Jehova ti pangipaayanna iti naimbag a nakem. Masapul a makualipikar ti maysa a tao para iti kasta nga awan kapadana a bendision. Maysa ni Isaias kadagiti nakualipikar. Tinagiragsakna ti anamong ti Dios ket inusar ni Jehova kas instrumento a mangipakaammo iti pagayatanna kadagiti sabsabali. Ti maysa a pagarigan iti daytoy ket nairekord iti umuna a kagudua ti kapitulo 49 ti padto ni Isaias.
2 Naimpadtuan a naiturong dagitoy a sasao iti bin-i ni Abraham. Iti damo a kaitungpalanna, dayta a bin-i isu ti nasion ti Israel, a namunganay ken Abraham. Nupay kasta, kaaduan a sasao ket nabatad nga agaplikar iti nabayagen nga inur-urayda a Bin-i ni Abraham, ti naikari a Mesias. Dagiti naipaltiing a sasao agaplikar met kadagiti naespirituan a kakabsat ti Mesias, a nagbalin a paset ti naespirituan a bin-i ni Abraham ken ti “Israel ti Dios.” (Galacia 3:7, 16, 29; 6:16) Nangnangruna a deskribiren daytoy a paset ti padto ni Isaias ti naisangsangayan a relasion ni Jehova ken ti dungdungnguenna nga Anak, a ni Jesu-Kristo.—Isaias 49:26.
Dinutokan ken Sinalakniban ni Jehova
3, 4. (a) Ania a suporta ti tagtagiragsaken ti Mesias? (b) Siasino dagiti kasarsarita ti Mesias?
3 Tagtagiragsaken ti Mesias ti naimbag a nakem, wenno anamong Isaias 49:1.
ti Dios. Impaay ni Jehova kenkuana ti autoridad ken pammatalged a kasapulan tapno maitungpalna ti annongenna. Maikanatad ngarud a kunaen ti agbalinto a Mesias: “Imdengandak, O dakayo nga isla, ket mangipangagkayo, dakayo a nasional a bunggoy iti adayo. Ni Jehova met laeng inayabannak manipud a mismo iti tian. Manipud iti makin-uneg a paspaset ni inak dinakamatna ti naganko.”—4 Kasarsarita ditoy ti Mesias dagiti il-ili “iti adayo.” Nupay naikari ti Mesias kadagiti Judio, ti ministeriona ket pakabendisionanto ti amin a nasnasion. (Mateo 25:31-33) Dagiti “isla” ken “nasional a bunggoy,” nupay saanda a naitulag ken Jehova, rumbeng nga ipangagda ti Mesias ti Israel agsipud ta isu ti naibaon a mangisalakan iti intero a sangatauan.
5. Kasano a napanaganan ti Mesias uray sakbay pay a mayanak kas tao?
5 Kuna ti padto a panaganan ni Jehova ti Mesias sakbay a mayanak kas tao. (Mateo 1:21; Lucas 1:31) Mabayag pay sakbay a mayanak, napanaganan ni Jesus iti “Nakaskasdaaw a Manangbalakad, Mannakabalin a Dios, Agnanayon nga Ama, Prinsipe ti Kappia.” (Isaias 9:6) Ti Emmanuel, a nalabit nagan ti maysa nga anak ni Isaias, ket nabatad a maysa met a propetiko a nagan ti Mesias. (Isaias 7:14; Mateo 1:21-23) Uray ti agbalinto a nagan ti Mesias—a Jesus—ket naipadto sakbay ti pannakayanakna. (Lucas 1:30, 31) Daytoy a nagan ket namunganay iti Hebreo a sao a kaipapananna “Ni Jehova ti Pakaisalakanan.” Nabatad, saan a ni Jesus ti nangdutok iti bagina kas Kristo.
6. Iti ania a wagas a ti ngiwat ti Mesias ket kas iti natadem a kampilan, ken kasano a nailemmeng, wenno naitalimeng ti Mesias?
6 Agtultuloy ti naimpadtuan a sasao ti Mesias: “Ket pinagbalinna ti ngiwatko a kas iti natadem a kampilan. Iti salinong ti imana inlemmengnak. Ket nagin-inut a pinagbalinnak a napasileng a pana. Intalimengnak iti bukodna a taguban.” (Isaias 49:2) Idi dumtengen ti tiempo a panangirugi ti Mesias ni Jehova iti ministeriona ditoy daga idi 29 K.P., ti sasao ken tigtignay ni Jesus ket pudno a kasla kadagiti natadem, napalanas nga igam, a masalputna ti puspuso dagiti agdengdengngeg kenkuana. (Lucas 4:31, 32) Ti sasao ken tigtignayna ti namagpungtot iti kangrunaan a kabusor ni Jehova, a ni Satanas, ken dagiti pasurotna. Ikagumaan ni Satanas a papatayen ni Jesus manipud pay pannakayanakna. Ngem ni Jesus ket kasla pana a nakalemmeng iti mismo a taguban ni Jehova. * Makapagtalek a naan-anay iti pannalaknib ni Amana. (Salmo 91:1; Lucas 1:35) Iti naituding a tiempo, ipaay ni Jesus ti biagna para iti sangatauan. Ngem dumtengto ti tiempo a dumarup kas maysa a maingel a nailangitan a mannakigubat a naiduma ti armasna, nga addaan iti natadem a kampilan a rumrummuar iti ngiwatna. Ita, ti natadem a kampilan iladladawanna ti autoridad ni Jesus a mangyebkas ken mangipatungpal iti panangukom kadagiti kabusor ni Jehova.—Apocalipsis 1:16.
Saan nga Ubbaw ti Panagbannog ti Adipen ti Dios
7. Siasino ti pakayaplikaran ti sasao ni Jehova iti Isaias 49:3, ken apay?
7 Ita dakamaten ni Jehova dagitoy a naimpadtuan a sasao: “Sika ti adipenko, O Israel, sika daydiay pangipakitaakto iti pintasko.” (Isaias 49:3) Dakamaten ni Jehova ti nasion ti Israel kas adipenna. (Isaias 41:8) Ngem ni Jesu-Kristo ti katan-okan nga Adipen ti Dios. (Aramid 3:13) Kadagiti parsua ti Dios, awan ti mangartap ken Jesus a mangyanninaw iti ‘pintas’ ni Jehova. Gapuna, nupay literal a naiturong dagitoy a sasao iti Israel, ni Jesus ti pudno a pagaplikaranna.—Juan 14:9; Colosas 1:15.
8. Kasano ti pannakatrato ti Mesias kadagiti mismo a kailianna, ngem siasino ti namnamaen ti Mesias a mangukom iti balligina?
8 Ngem saan aya a kaaduan kadagiti mismo a kailian ni Jesus ti nanglalais ken nangilaksid kenkuana? Wen. Kaaduanna, saan nga awaten ti nasion ti Israel ni Jesus kas Adipen a pinulotan ti Dios. (Juan 1:11) Amin a gapuanan ni Jesus bayat nga adda ditoy daga ket matmatmatan dagiti kapanawenanna a kasla saan unay a napateg, nga awan pay ketdi ti kaes-eskanna. Daytoy kasla di naballigi a ministeriona ti sumaganad a dakamaten ti Mesias: “Iti awan kapapay-anna a nagbannogak. Iti di kinapudno ken kinaubbaw naan-anay nga inibusko ti bukodko a bileg.” (Isaias 49:4a) Saan a ti pannakaupay ti Mesias ti pagaplikaran dagitoy a sasao. Usigenyo ti sumaganad nga ibagana: “Pudno a ti pannakaukomko adda ken Jehova, ket dagiti supapakko adda iti Diosko.” (Isaias 49:4b) Saan a dagiti tattao ti mangukom iti balligi ti Mesias no di ti Dios.
9, 10. (a) Ania nga annongen ti ited ni Jehova iti Mesias, ket ania dagiti magapuananna? (b) Kasano a maparegta dagiti Kristiano itatta kadagiti kapadasan ti Mesias?
9 Nangnangruna nga interesado ni Jesus iti anamong, wenno naimbag a nakem ti Dios. Iti padto, kuna ti Mesias: “Ita ni Jehova, Daydiay nangbukel kaniak manipud iti tian kas maysa nga adipen a kukuana, kinunana nga isublik kenkuana ni Jacob, tapno ti met laeng Israel maurnong kenkuana. Ket maidaydayawakto kadagiti mata ni Jehova, ket ti mismo a Diosko nagbalinton a pigsak.” (Isaias 49:5) Umay ti Mesias tapno pagsublienna ti puspuso dagiti annak ti Israel iti nailangitan nga Amada. Addada mangipangag ngem kaaduanna ti saan. Nupay kasta, adda ken Jehova a Dios ti pudpudno a supapakna. Saan a dagiti panirigan ti tao ti pakarukodan ti balligina, no di ket kadagiti mismo nga estandarte ni Jehova.
10 Itatta, mabalin a pasaray marikna dagiti pasurot ni Jesus a kasla agbambannogda nga awan mamaayna. Iti dadduma a lugar, kasla bassit ti resulta ti ministerioda no idilig iti kaadu ti nabusbosda a trabaho ken pigsa. Kaskasdi, agibturda yantangay maparegtada iti ulidan ni Jesus. Mapabilegda met kadagiti sasao ni apostol Pablo, a nagsurat: “Iti kasta, dungdungnguek a kakabsat, agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.”—“Silaw Dagiti Nasion”
11, 12. Kasano a nagbalin ti Mesias a “silaw dagiti nasion”?
11 Iti padto ni Isaias, paregtaen ni Jehova ti Mesias babaen ti panangipalagipna kenkuana a saan a “nanumo a banag” ti panagbalin nga Adipen ti Dios. ‘Ibangon [ni Jesus] dagiti tribu ni Jacob ken isublina uray dagidiay nasaluadan iti Israel.’ Ilawlawag pay ni Jehova: “Intedka met a maipaay a silaw dagiti nasion, tapno ti panangisalakanko adda koma agingga iti ungto ti daga.” (Isaias 49:6) Kasano a lawagan ni Jesus dagiti tattao “agingga iti ungto ti daga” idinto ta iti Israel laeng ti pangaramidanna iti ministeriona ditoy daga?
12 Ipakita ti rekord ti Biblia a ti usaren ti Dios a “silaw dagiti nasion” ket saan a naiddep uray kalpasan ti ipapanaw ni Jesus ditoy daga. Agarup 15 a tawen kalpasan ti ipapatay ni Jesus, inadaw da misionero a Pablo ken Bernabe ti padto ti Isaias 49:6 sada inyaplikar dayta kadagiti adalan ni Jesus, dagiti naespirituan a kakabsatna. Inlawlawagda: “Ni Jehova nangipasdek iti bilin kadakami itoy a sasao, ‘Dinutokanka a kas silaw dagiti nasion, tapno agbalinka a pakaisalakanan agingga iti ungto ti daga.’” (Aramid 13:47) Sakbay ti mismo nga ipapatay ni Pablo, nakitana a naikasaba ti naimbag a damag ti pannakaisalakan saan laeng a kadagiti Judio no di ket “iti isuamin a parsua nga adda iti baba ti langit.” (Colosas 1:6, 23) Itatta, dagiti natda kadagiti napulotan a kakabsat ni Kristo itultuloyda daytoy a trabaho. Babaen ti panangsuporta ti “dakkel a bunggoy” nga agdagup iti minilion, agserserbida kas “silaw dagiti nasion” iti nasurok a 230 a pagilian iti intero a lubong.—Apocalipsis 7:9.
13, 14. (a) Ania a reaksion iti trabaho a panangasaba ti nakaipasanguan ti Mesias ken dagiti pasurotna? (b) Aniada a kasasaad ti nabaliktad?
13 Pudno a ni Jehova ti gubuayan ti bileg ti Adipenna a Mesias, dagiti napulotan a kakabsat ti Mesias, ken amin dagidiay kameng ti dakkel a bunggoy a kaduada a mangikaskasaba iti naimbag a damag. Pudno, kas ken Jesus, maipaspasango dagiti adalanna iti pannakalalais ken ibubusor. (Juan 15:20) Ngem iti tiempo nga intuding ni Jehova, kanayon nga ipamuspusanna a mabaliktad dagiti kasasaad tapno maisalakan ken magunggonaan dagiti nasungdo nga adipenna. Maipapan iti Mesias, a “naumsi iti kararua” ken “karimon ti nasion,” ikari ni Jehova: “Ti met laeng ar-ari makitadanto ket sigurado a tumakderda, ken dagiti prinsipe, ket agruknoydanto, gapu ken Jehova, a matalek, Daydiay Santo ti Israel, a mangpilpili kenka.”—Isaias 49:7.
14 Idi agangay, nagsurat ni apostol Pablo kadagiti Kristiano Filipos 2:8-11) Naballaagan dagiti matalek a pasurot ni Kristo a maidadanesdanto met. Ngem kas iti Mesias, maipanamnama kadakuada ti naimbag a nakem ni Jehova.—Mateo 5:10-12; 24:9-13; Marcos 10:29, 30.
idiay Filipos maipapan iti daytoy naipadto a pannakabaliktad dagiti kasasaad. Dineskribirna ni Jesus kas daydiay naibabain iti kayo a pagtutuokan ngem kalpasanna intan-ok ti Dios. Impaayan ni Jehova ti Adipenna iti “nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng.” (“Ti Kangrunaan a Makaay-ayo a Tiempo”
15. Ania a naisangsangayan a “tiempo” ti nadakamat iti padto ni Isaias, ket ania ti ipasimudaag daytoy?
15 Agtultuloy ti padto ni Isaias babaen iti napateg unay a sasao. Kuna ni Jehova iti Mesias: “Iti tiempo ti naimbag a nakem sinungbatanka, ket iti aldaw ti pannakaisalakan tinulonganka; ket sinalsaluadanka tapno maitedka a kas maysa a tulag maipaay kadagiti tattao.” (Isaias 49:8a) Adda umasping a padto a nairekord iti Salmo 69:13-18. Dinakamat ti salmista ti “tiempo ti naimbag a nakem,” nga inusarna ti sasao a “maysa a naparaburan a tiempo.” Ipasimudaag dagitoy a termino a ti naimbag a nakem ken pannalaknib ni Jehova ket maipaay iti naisangsangayan a wagas ngem kabayatan laeng ti espesipiko ken temporario a tiempo.
16. Ania ti tiempo ti naimbag a nakem ni Jehova para iti nagkauna nga Israel?
16 Kaano dayta a tiempo ti naimbag a nakem? Iti orihinal a situasion, dagita a sasao ket paset ti padto maipapan iti pannakaisubli ken impakpakaunana ti isusubli dagiti Judio manipud iti pannakaidestiero. Napasaran ti nasion ti Israel ti tiempo ti naimbag a nakem idi ‘maipulangda ti daga iti sigud a kasasaadna’ ket tagikuaenda manen ti “nalangalang a pagtatawidan a sansanikua.” (Isaias 49:8b) Saandan a “balud” idiay Babilonia. Kabayatan ti panagawidda, sinigurado ni Jehova a dida “agbisin” wenno “mawaw,” ket saanto met a “kabilen ida ti mangparkag a pudot wenno ti init.” Nagsubli dagiti naiwaras nga Israelita iti pagilianda “manipud . . . iti adayo, . . . aggapuda iti amianan ken iti laud.” (Isaias 49:9-12) Iti laksid daytoy damo a dramatiko a kaitungpalanna, ipakita ti Biblia nga addada pay sabali a pagaplikaran daytoy a padto.
17, 18. Ania a tiempo ti naimbag a nakem ti intuding ni Jehova idi umuna a siglo?
17 Umuna, iti pannakayanak ni Jesus, inwaragawag dagiti anghel ti talna ken naimbag a nakem, wenno anamong ti Dios, kadagiti tattao. (Lucas 2:13, 14) Saan a naitukon iti isuamin a tattao daytoy a naimbag a nakem no di ket kadagidiay laeng nangipakita ti pammati ken Jesus. Idi agangay binasa ni Jesus iti publiko ti padto ti Isaias 61:1, 2 sa inyaplikarna dayta iti bagina kas ti manangiwaragawag iti “naparaburan a tawen ni Jehova.” (Lucas 4:17-21) Sinarita ni apostol Pablo ti naisangsangayan a pannalaknib ni Jehova ken Kristo kabayatan ti panaglasagna. (Hebreo 5:7-9) Gapuna, daytoy a tiempo ti naimbag a nakem ket agaplikar iti anamong ti Dios ken ni Jesus kabayatan ti panagbiagna kas tao.
18 Nupay kasta, adda pay kanayonan a pakayaplikaran daytoy a padto. Kalpasan ti panangadawna iti sasao ni Isaias maipapan iti tiempo ti naimbag a nakem, intuloy ni Pablo: “Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.” (2 Corinto 6:2) Insurat ni Pablo dagitoy a sasao 22 a tawen kalpasan ti ipapatay ni Jesus. Agparang a kalpasan ti pannakaipasngay ti kongregasion Kristiano idi Pentecostes 33 K.P., pinaatiddog ni Jehova ti tawen ti naimbag a nakemna tapno mairaman dagiti napulotan a pasurot ni Kristo.
19. Kasano a magunggonaan dagiti Kristiano itatta iti tiempo ti naimbag a nakem ni Jehova?
19 Kadagiti ngay pasurot ni Jesus itatta a saan a napulotan Apocalipsis 7:13-17) Gapuna, amin a Kristiano mabalinda a gundawayan daytoy ababa a tiempo a panangitukon ni Jehova iti naimbag a nakemna kadagiti imperpekto a tattao.
nga agtawid iti nailangitan a pagarian ti Dios? Magunggonaan aya dagidiay addaan iti naindagaan a namnama manipud iti daytoy makaay-ayo a tiempo? Wen. Ipakita ti libro ti Biblia nga Apocalipsis nga itan ti tiempo ti naimbag a nakem ni Jehova iti dakkel a bunggoy a “naggapu iti dakkel a rigat” a mangtagiragsak iti biag iti paraiso a daga. (20. Iti ania a wagas a maliklikan dagiti Kristiano ti pannakaikapis iti panggep ti di kaikarian a kinamanangngaasi ni Jehova?
20 Impakpakauna ni apostol Pablo ti ballaag sakbay nga iwaragawagna ti maipapan iti makaay-ayo a tiempo ni Jehova. Impakpakaasina kadagiti Kristiano a “saan[da] nga awaten ti di kaikarian a kinamanangngaasi ti Dios ket maikapis[da] iti panggepna.” (2 Corinto 6:1) Maitunos iti dayta, aprobetsaren dagiti Kristiano ti tunggal oportunidad a mangparagsak iti Dios ken mangaramid iti pagayatanna. (Efeso 5:15, 16) Pagimbaganda no surotenda ti pammagbaga ni Pablo: “Agannadkayo, kakabsat, ta amangan no addanto ketdi tumanor iti asinoman kadakayo a maysa a nadangkes a puso nga awanan pammati babaen ti iyaadayo iti sibibiag a Dios; no di ket itultuloyyo a bagbagaan ti maysa ken maysa tunggal aldaw, agingga a maaw-awagan dayta iti ‘Ita nga aldaw,’ ta amangan no mapatangken ti asinoman kadakayo babaen ti makaallilaw a pannakabalin ti basol.”—Hebreo 3:12, 13.
21. Ania a makaparag-o a sasao ti pagnguduan ti umuna a paset ti Isaias kapitulo 49?
21 Bayat nga agngudo ti naimpadtuan a panagsarita ni Jehova ken ti Mesiasna, dakamaten ni Isaias ti makaparag-o a sasao: “Mangyesngawkayo iti naragsak a pukkaw, dakayo a langlangit, ket agrag-oka, sika a daga. Maay-ayatan koma unay dagiti bantay buyogen ti naragsak nga ikkis. Ta liniwliwa ni Jehova ti ilina, ket dagiti tattaona a naparigatan ipakitaanna iti Isaias 49:13) Anian a nagimnas a sasao a pangliwliwa kadagiti Israelita idi un-unana ken iti naindaklan nga Adipen ni Jehova, ni Jesu-Kristo, agraman kadagiti napulotan nga adipen ni Jehova ken kadagiti “sabsabali a karnero” a kakaduada itatta!—Juan 10:16.
asi.” (Saan a Lipaten ni Jehova ti Ilina
22. Kasano nga ipaganetget ni Jehova a dinanto pulos lipaten ti ilina?
22 Ituloy itan ni Isaias nga ipadamag dagiti ebkas ni Jehova. Ipadtona nga addanto pagannayasan dagiti naidestiero nga Israelita a mauma ken maawanan iti namnama. Kuna ni Isaias: “Kinunkuna ti Sion: ‘Ni Jehova binaybay-annak, ket ni met laeng Jehova nalipatannak.’” (Isaias 49:14) Pudno kadi daytoy? Binaybay-an kadi ni Jehova ti ilina ken linipatanna ida? Kas pannakangiwat ni Jehova, ituloy ni Isaias: “Mabalinan aya ti asawa a babai a lipatan ti agsussusona iti kasta saanna a kaasian ti anak ti tianna? Uray dagitoy a babbai makalipatda, ngem siak saankanto a malipatan.” (Isaias 49:15) Anian a napnuan ayat a sungbat ni Jehova! Dakdakkel ti ayat ti Dios iti ilina ngem iti ayat ti ina iti anakna. Kanayon a pampanunotenna dagiti nasungdo kenkuana. Laglagipenna ida nga arigna naikitikit ti nagnaganda kadagiti imana: “Adtoy! Inkitikitka kadagiti dakulapko. Dagiti padermo patinayon nga addada iti sanguanak.”—Isaias 49:16.
23. Kasano a pinaregta ni Pablo dagiti Kristiano tapno agtalekda a saan a lipaten ni Jehova ida?
23 Iti suratna kadagiti taga Galacia, binalakadan ni apostol Pablo dagiti Kristiano: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” (Galacia 6:9) Insuratna dagitoy a makaparegta a sasao kadagiti Hebreo: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Ditay koma pulos ipapan a linipatan ni Jehova ti ilina. Kas iti daydi nagkauna a Sion, adda nasayaat a panggapuan dagiti Kristiano nga agrag-o ken aguray a siaanus ken Jehova. Siiinget a salimetmetanna dagiti tulag ken karkarina.
24. Iti ania a wagas a maisublinto ti Sion, ket ania dagiti isaludsodna?
24 Babaen ken Isaias, ipaay ni Jehova ti kanayonan a liwliwa. Saanton a mamagpeggad dagidiay “mangrebrebba” iti Sion, dagiti taga Babilonia man wenno dagiti apostata a Judio. “Nagdardaras” dagiti ‘annak’ ti Sion, dagiti naidestiero a Judio a nagtalinaed a nasungdo ken Jehova. ‘Maummongdanto a sangsangkamaysa.’ Gapu ta napapartak ti panagsublida idiay Jerusalem, dagiti nagsubli a Judio agbalindanto a dekorasion iti siudadda, a kas iti “maysa a nobia” a nakawesan kadagiti “arkos.” (Isaias 49:17, 18) ‘Napagwalangwalang’ dagiti disso ti Sion. Agasenyo ti siddaawna inton pagammuan ta nakaad-adun dagiti agnaed kenkuana, a kasla naileten ti pagnaedanna. (Basaenyo ti Isaias 49:19, 20.) Natural a saludsodenna no sadino ti naggapuan amin dagitoy nga annak: “Sigurado a kunaemto ita pusom, ‘Siasino ti nagbalin nga ama kadagitoy maipaay kaniak, idinto ta maysaak a babai a naulila iti annak ken baog, naidestiero ken naala a balud? No maipapan kadagitoy, siasino ti nangpadakkel kadakuada? Adtoy! Siak nabaybay-anak nga agmaymaysa. Dagitoy—sadino ti ayanda idi?’” (Isaias 49:21) Anian a nakaragragsak a situasion iti dati a lupes a Sion!
25. Iti moderno a tiempo, ania a pannakaisubli ti napasaran ti naespirituan nga Israel?
25 Adda moderno a kaitungpalan dagitoy a sasao. Kadagiti narikut a tawen ti umuna a gubat sangalubongan, napasaran ti naespirituan nga Israel ti tiempo ti pannakalangalang ken pannakakautibo. Ngem naisubli ken nagnaed iti naespirituan a paraiso. (Isaias 35:1-10) Kas iti daydi nadadael a siudad a dineskribir ni Isaias, kayariganna naragsakan idi makitana nga aduanen kadagiti narag-o, aktibo nga agdaydayaw ken Jehova.
“Maysa a Pagilasinan a Maipaay iti Il-ili”
26. Ania a panangiwanwan ti ipaay ni Jehova iti naluk-atan nga ilina?
26 Iti naimpadtuan a wagas, ipan itan ni Jehova ni Isaias iti tiempo a pannakaluk-atto ti ilina manipud iti Babilonia. Umawatdanto ngata iti panangiwanwan ti Dios? Sumungbat ni Jehova: “Adtoy! Itag-aykonto ti imak kadagiti nasion a mismo, ket kadagiti ili ibayogkonto ti pagilasinak. Ket ti annakmo a lallaki iyegdanto iti saklot, ket iti rabaw ti abaga awitendanto dagiti bukodmo nga annak a babbai.” (Isaias 49:22) Iti orihinal a kaitungpalanna, agbalin a “pagilasinan” ni Jehova ti Jerusalem, a dati a sentro ti gobierno ken ayan ti templo ni Jehova. Uray dagiti prominente ken nabileg a tattao ti sabsabali a nasion, a kas kadagiti “ar-ari” ken ‘prinsesa,’ tulonganda dagiti Israelita iti panagsublida sadiay. (Isaias 49:23a) Karamanto kadagitoy a tumulong dagiti ar-ari ti Persia a da Ciro ken Artaxerxes Longimanus ken dagiti sangakabbalayanda. (Esdras 5:13; 7:11-26) Ken adda pay kanayonan a pakayaplikaran ti sasao ni Isaias.
27. (a) Iti dakdakkel a kaitungpalanna, iti ania a “pagilasinan” ti papanan dagiti tattao? (b) Ania ti resultana inton mapilitan amin a nasion nga agruknoy iti panangituray ti Mesias?
27 Dakamaten ti Isaias 11:10 ti maipapan iti “maysa a pagilasinan a maipaay iti il-ili.” Inyaplikar ni apostol Pablo dagitoy a sasao ken ni Kristo Jesus. (Roma 15:8-12) No kasta, iti dakdakkel a kaitungpalanna, ni Jesus ken dagiti napulotan iti espiritu a kakaduana nga agturay isuda ti “pagilasinan” ni Jehova a papanan dagiti tattao. (Apocalipsis 14:1) Inton agangay amin a tattao ditoy daga—uray dagiti agturturay itatta—agruknoydanto iti panangituray ti Mesias. (Salmo 2:10, 11; Daniel 2:44) Ti resultana? Kuna ni Jehova: “Kasapulan a maammuamto a siak ni Jehova, a dagidiay mangin-inanama kaniak saandanto a mabainan.”—Isaias 49:23b.
“Ita ti Pannakaisalakantayo As-asidegen”
28. (a) Babaen iti ania a sasao a patalgedan manen ni Jehova iti ilina a maluk-atandanto? (b) Ania a kari ti kaskasdi a tungtungpalen ni Jehova a mainaig iti ilina?
28 Mabalin a panunoten ti dadduma kadagidiay a naidestiero idiay Babilonia, ‘Talaga kadi a posible a mawayawayaan ti Israel?’ Usigen ni Jehova dayta a saludsod babaen ti panangyimtuodna: “Mabalin kadi a dagidiay naalan ket maala manipud iti mismo a nabileg a lalaki, wenno mabalin kadi nga agtalaw ti bagi dagiti kautibo ti manangikuspil?” (Isaias 49:24) Wen ti sungbat. Ipatalged ni Jehova kadakuada: “Uray ti bagi dagiti kautibo ti nabileg a lalaki maipanawto, ket agtalawto dagidiay naalan ti mismo a manangikuspil.” (Isaias 49:25a) Anian a makaliwliwa a pammatalged! Maysa pay, ti naimbag a nakem ni Jehova iti ilina ket napakuyogan iti natibker a kari a salaknibanna ida. Iti nabatad a sasao, kunana: “Iti asinoman a makisupsupiat kenka siak makisupiatakto, ket siak isalakankonto dagiti bukodmo nga annak.” (Isaias 49:25b) Saan pay a nagpaso dayta a kari. Kas nairekord iti Zacarias 2:8, kuna ni Jehova iti ilina: “Ti mangsagid kadakayo sagidenna ti bukel ti matak.” Pudno, tagtagiragsakentayo ita ti tiempo ti naimbag a nakem bayat nga adda gundaway dagiti tattao iti intero a daga nga agkamang iti naespirituan a Sion. Nupay kasta, agpatingganto dayta a tiempo ti naimbag a nakem.
29. Ania a nakaal-alingget a masanguanan ti agur-uray kadagidiay sumukir ken Jehova?
29 Anianto ti mapasamak kadagidiay talaga a sumukir ken Jehova ken mangidadanes pay ketdi kadagiti agdaydayaw kenkuana? Kunana: “Dagidiay mangirurrurumen kenka pakanekto iti bukodda a lasag; ket kas iti nasam-it nga arak mabartekdanto iti bukodda a dara.” (Isaias 49:26a) Nakaal-alingget a masanguanan! Awan ti manayon a masakbayan dagita a nasubeg a kabusor. Madadaeldanto. Iti kasta, maipakitanto a Manangisalakan ni Jehova, agpadpada babaen ti panangisalakanna iti ilina ken babaen ti panangdadaelna kadagiti kabusorda. “Isuamin a lasag kasapulanto a maammuanda a siak, ni Jehova, ti Manangisalakanmo ken Manangsakam, Daydiay Mannakabalin ni Jacob.”—Isaias 49:26b.
30. Aniada a panangisalakan ti inaramid ni Jehova maigapu iti ilina, ket ania ti aramidennanto pay?
30 Immuna a nagaplikar dagita a sasao idi inusar ni Jehova ni Ciro a mangluk-at iti ilina manipud iti panangkautibo ti Babilonia. Nagaplikar met dagita idi 1919 idi inusar ni Jehova ti naitrono nga Anakna, ni Jesu-Kristo, a mangluk-at iti ilina iti naespirituan a pannakaadipen. Gapuna, agpadpada a dakamaten ti Biblia ni Jehova ken ni Jesus kas manangisalakan. (Tito 2:11-13; 3:4-6) Ni Jehova isu ti Manangisalakantayo, ket ni Jesus a Mesias ti “Kangrunaan nga Ahente” ti Dios. (Aramid 5:31) Pudno unay, nakaskasdaaw dagiti panangisalakan ti Dios babaen ken Jesu-Kristo. Babaen ti naimbag a damag, luk-atan ni Jehova dagiti nalinteg ti panagpuspusoda a tattao manipud iti panangadipen ti palso a relihion. Babaen iti daton a subbot, isalakanna ida iti panangadipen ti basol ken ipapatay. Idi 1919 inispalna dagiti kakabsat ni Jesus manipud iti naespirituan a pannakaadipen. Ket iti umad-adanin a gubat ti Armagedon, isalakannanto ti dakkel a bunggoy dagiti matalek a tattao manipud iti pannakadadael nga umapay kadagiti managbasol.
31. Ania ti rumbeng nga aramiden dagiti Kristiano yantangay aw-awatenda ti naimbag a nakem ti Dios?
31 No kasta, anian a pribilehio ti umawat iti naimbag a nakem ti Dios! Sapay koma ta amintayo usarentayo a nainsiriban daytoy makaay-ayo a tiempo. Ken sapay koma ta agtignaytayo a maitunos iti kinaganat ti tiempotayo, nga ipangagtayo ti sasao ni Pablo kadagiti taga Roma: “Ammoyo ti panawen, nga orasen tapno agriingkayo iti turog, ta ita ti pannakaisalakantayo as-asidegen ngem idi tiempo a nagbalintayo a manamati. Ti rabii adalem unayen; ti aldaw immasidegen. Ikkatentayo ngarud dagiti aramid nga agpaay iti sipnget ket ikapettayo dagiti igam ti lawag. Kas iti aldaw magnatayo koma a sitatakneng, saan a kadagiti naariwawa a panagragragsak ken panagbarbartek, saan nga iti maiparit a pannakidenna ken nalulok a kababalin, saan nga iti ringgor ken imon. No di ket ikawesyo ni Apo Jesu-Kristo, ket dikay aggakat a nasakbay maipaay kadagiti derrep ti lasag.”—Roma 13:11-14.
32. Ania dagiti pammasiguro nga ik-ikutan ti ili ti Dios?
32 Itultuloy a bendisionan ni Jehova dagidiay mangipangag iti balakadna. Ipaayanna ida iti kasapulanda a bileg ken laing a mangikasaba iti naimbag a damag. (2 Corinto 4:7) Usaren ni Jehova dagiti adipenna a kas ti panangusarna iti Liderda a ni Jesus. Pagbalinenna ti ngiwatda a “kas iti natadem a kampilan” tapno maidanonda ti mensahe ti naimbag a damag iti puspuso dagiti naemma. (Mateo 28:19, 20) Salaknibanna ti ilina “iti salinong ti imana.” Kas iti “napasileng a pana,” maitalimengdanto “iti bukodna a taguban.” Wen, saan a baybay-an ni Jehova ti ilina!—Salmo 94:14; Isaias 49:2, 15.
[Footnote]
^ par. 6 “Yantangay sigurado a nabigbig ni Satanas a ni Jesus ket Anak ti Dios ken isu ti naipadto a mangrumek iti ulona (Ge 3:15), inaramidna ti amin a kabaelanna a mangdadael ken Jesus. Ngem, idi ipakaammo ni anghel Gabriel ti panangyinaw ni Maria ken Jesus, kinunana ken ni Maria: ‘Ti nasantuan nga espiritu umayto kenka, ket ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan, Anak ti Dios.’ (Lu 1:35) Sinaluadan ni Jehova ti Anakna. Di nagballigi dagiti panangikagumaan a mangdadael ken Jesus idi maladaga pay.”—Insight on the Scriptures, Tomo 2, panid 868, nga impablaak ti Watchtower Bible and Tract Society of New York, Inc.
[Salsaludsod]
[Ladawan iti panid 139]
Ti Mesias ket kas iti “napasileng a pana” iti taguban ni Jehova
[Ladawan iti panid 141]
Ti Mesias ket nagbalin a “silaw dagiti nasion”
[Ladawan iti panid 147]
Dakdakkel ti ayat ti Dios iti ilina ngem iti ayat ti ina iti anakna