Kapitulo Bainte Dos

Tumubo ti Kinalinteg Idiay Sion

Isaias 61:1-11

1, 2. Ania a panagbalbaliw ti dandanin mapasamak iti Israel, ket siasino ti mangaramid iti daytoy?

MAIWARAGAWAG koma ti wayawaya! Determinado ni Jehova a mangwayawaya iti ilina ken isublina ida iti daga dagidi inapoda. Kas iti bukel a tumubo kalpasan ti tudo, tumaudto manen ti pudno a panagdayaw. Inton dumteng dayta nga aldaw, ti kinaliday masuktanto iti narag-o a panangidaydayaw, ket dagiti ulo a dati a naabungotan iti dapdapo ti ladingit makoronaanto iti anamong ti Dios.

² Siasino ti mangaramid iti daytoy nakaskasdaaw a panagbalbaliw? Ni Jehova laeng ti makaaramid iti kasta. (Salmo 9:19, 20; Isaias 40:25) Naimpadtuan nga imbilin ni propeta Sofonias: “Agdir-ika a sirarag-o, O anak a babai ti Sion! Agpukkawka a siraragsak, O Israel! Agrag-oka ken agragsakka buyogen ti isuamin a puso, O anak a babai ti Jerusalem! Ni Jehova inikkatna dagiti panangukom kenka.” (Sofonias 3:14, 15) Anian a nagragsakto dayta a tiempo! Inton urnongen ni Jehova dagiti naisubli a natda manipud Babilonia iti 537 K.K.P., kaslanto maysa dayta a tagtagainep a pimmudno.​—Salmo 126:1.

3. Ania dagiti kaitungpalan ti naimpadtuan a sasao ti Isaias kapitulo 61?

³ Naipadto daytoy a pannakaisubli iti Isaias kapitulo 61. Ngem, nupay nabatad a naaddaan iti kaitungpalan dayta a padto idi 537 K.K.P., ad-adda a detalyado ti pannakatungpalna iti maud-udi a tiempo. Ti ad-adda a detalyado a kaitungpalanna ket nainaig ken Jesus ken kadagiti pasurotna idi umuna a  siglo ken iti ili ni Jehova iti moderno a tiempo. Gapuna, anian a nagpateg dagitoy a naipaltiing a sasao!

“Tawen ti Naimbag a Nakem”

4. Siasino ti naikkan iti annongen a mangipakaammo iti naimbag a damag iti immuna a kaitungpalan ti Isaias 61:1, ket siasino iti maikadua?

⁴ Insurat ni Isaias: “Ti espiritu ti Soberano nga Apo Jehova adda kaniak, gapu ta ni Jehova pinulotannak a mangibaga iti naimbag a damag kadagidiay naemma. Imbaonnak a mangpatapat iti nasnaayan ti pusona, a mangiwaragawag iti wayawaya kadagidiay nakautibo ken iti pannakalukat a naimbag ti matmata uray kadagiti balud.” (Isaias 61:1) Siasino ti naikkan iti annongen a mangipakaammo iti naimbag a damag? Nalabit ti damo ket ni Isaias, a pinaltiingan ti Dios a mangirekord iti naimbag a damag para kadagiti kautibo idiay Babilonia. Nupay kasta, intudo ni Jesus ti kangrunaan a kaitungpalan dayta idi inyaplikarna iti bagina ti sasao ni Isaias. (Lucas 4:16-21) Wen, naibaon ni Jesus a mangipakaammo iti naimbag a damag kadagiti naemma, ket daytoy ti gapuna a napulotan iti nasantuan nga espiritu idi nabautisaran.​—Mateo 3:16, 17.

5. Siasino dagiti nangikaskasaban iti naimbag a damag iti agarup 2,000 a tawenen?

⁵ Maysa pay, sinursuruan ni Jesus dagiti pasurotna tapno agbalinda nga ebanghelisador, wenno mangaskasaba iti naimbag a damag. Idi Pentecostes 33 K.P., agarup 120 kadagitoy ti napulotan iti nasantuan nga espiritu ken nagbalin a naespirituan nga annak ti Dios. (Aramid 2:1-4, 14-42; Roma 8:14-16) Naipaayanda met iti annongen a mangipakaammo iti naimbag a damag kadagiti naemma ken malmaldaangan. Dagidiay a 120 ti damo kadagiti 144,000 a napulotan iti kastoy a wagas. Iti kaaldawantayo, aktibo pay laeng ditoy daga dagiti natda a kameng daytoy a grupo. Gapuna, agarup 2,000 a tawenen nga inkaskasaba dagiti napulotan a pasurot ni Jesus ti “maipapan ti panagbabawi iti Dios ken ti pammati ken Apotayo a Jesus.”​—Aramid 20:21.

6. Siasino dagiti immawat iti bang-ar idi mangngegda a maikaskasaba ti naimbag a damag idi un-unana, ket iti ngay kaaldawantayo?

 ⁶ Nangyeg iti bang-ar kadagiti agbabbabawi a Judio idiay Babilonia ti naipaltiing a mensahe ni Isaias. Idi kaaldawan ni Jesus ken dagiti adalanna, nangyeg dayta iti bang-ar kadagidi Judio a malmaldaangan gapu iti kinadakes ti Israel ken agsagsagaba iti panangkautibo dagiti palso a narelihiosuan a tradision ti immuna a siglo a Judaismo. (Mateo 15:3-6) Iti kaaldawantayo, “agsensennaay ken umas-asug” dagiti minilion a nasiluan kadagiti pinapagano a kustombre ti Kakristianuan ken kadagiti mangibabain iti Dios a tradision gapu kadagiti nakarimrimon a banag a maar-aramid iti sidong dayta a narelihiosuan a sistema. (Ezequiel 9:4) Dagidiay mangipangag iti naimbag a damag maluk-atanda iti dayta a nakapimpiman a kasasaad. (Mateo 9:35-38) Maluktan a naimbag dagiti mata ti pannakaawatda no masursuroda a dayawen ni Jehova “buyogen ti espiritu ken kinapudno.”​—Juan 4:24.

7, 8. (a) Ania dagiti dua a kaitungpalan ti “tawen ti naimbag a nakem”? (b) Ania dagiti “aldaw ti pammales” ni Jehova?

⁷ Adda naituding a tiempo ti panangikasaba iti naimbag a damag. Daytoy ti annongen ni Jesus ken dagiti pasurotna: “Mangiwaragawag iti tawen ti naimbag a nakem iti biang ni Jehova ken ti aldaw ti pammales iti biang ti Diostayo; a mangliwliwa kadagidiay amin nga agledleddaang.” (Isaias 61:2) Naunday ti maysa a tawen, ngem adda pangrugian ken pagpatinggaanna. Ti “tawen ti naimbag a nakem” ni Jehova isu ti tiempo a panangipaayna iti gundaway kadagiti naemma tapno ipangagda ti panangiwaragawagna iti wayawaya.

⁸ Idi umuna a siglo, ti tawen ti naimbag a nakem para iti nasion a Judio ket nangrugi idi 29 K.P. idi inrugi ni Jesus ti ministeriona ditoy daga. Kinunana kadagiti Judio: “Agbabawikayo, ta ti pagarian ti langlangit asidegen.” (Mateo 4:17) Nagpaut dayta a tawen ti naimbag a nakem agingga iti “aldaw ti pammales” ni Jehova, a dimteng ti kangitingitanna idi 70 K.P. idi impalubos ni Jehova a dadaelen dagiti buyot ti Roma ti Jerusalem ken ti templona. (Mateo 24:3-22) Agbibiagtayo itatta iti sabali pay a tawen  ti naimbag a nakem, a nangrugi iti pannakaipasdek ti Pagarian ti Dios idiay langit idi 1914. Agngudonto daytoy a tawen ti naimbag a nakem iti sabali pay a nasaksaknap nga aldaw ti pammales inton dadaelen ni Jehova daytoy intero a sangalubongan a sistema ti bambanag kabayatan ti “dakkel a rigat.”​—Mateo 24:21.

9. Siasino itatta dagiti magunggonaan iti tawen ti naimbag a nakem ni Jehova?

⁹ Siasino itatta dagiti magunggonaan iti tawen ti naimbag a nakem ti Dios? Dagidiay mangawat iti mensahe, mangipakita iti kinaemma, ken sireregta a mangsuporta iti pannakaiwaragawag ti Pagarian ti Dios kadagiti “amin a nasion.” (Marcos 13:10) Mabigbig dagita a tattao a ti naimbag a damag ket mangyeg iti napaypayso a liwliwa. Nupay kasta, dagidiay mangilaksid iti mensahe, a dida aprobetsaren ti tawen ti naimbag a nakem ni Jehova, dandanidan sanguen ti kinapudno ti aldaw ti pammalesna.​—2 Tesalonica 1:6-9.

Dagiti Naespirituan a Bunga a Mangitan-ok iti Dios

10. Ania ti epektona kadagiti Judio nga agsubli manipud Babilonia ti naindaklan nga aramid ni Jehova nga agpaay kadakuada?

¹⁰ Mabigbig dagiti Judio nga agsubli manipud Babilonia a nangaramid ni Jehova iti naindaklan a banag nga agpaay kadakuada. Ti panagleddaangda kas kautibo ket agbalin a panagragsak ken pannakaidaydayaw agsipud ta maluk-atandan. Gapuna, tungpalen ni Isaias ti naimpadtuan nga annongenna, nga isu daytoy, “a mangituding kadagidiay agledleddaang gapu iti Sion, tapno ited kadakuada ti dalungdong imbes a dapdapo, ti lana ti panagragsak imbes a panagleddaang, ti kagay ti pannakaidaydayaw imbes a ti espiritu a naupay; ket maawagandanto iti dadakkel a kaykayo ti kinalinteg, ti mula ni Jehova, tapno isu mapapintas.”​—Isaias 61:3.

11. Siasinoda idi umuna a siglo ti addaan iti nasayaat a panggapuan a mangidaydayaw ken Jehova gapu iti naindaklan nga aramidna?

¹¹ Idi umuna a siglo, dagiti Judio a naluk-atan iti panangadipen ti palso a relihion indaydayawda met ti Dios gapu iti naindaklan nga aramidna nga agpaay kadakuada. Nasuktan ti kinalidayda  iti “kagay ti pannakaidaydayaw” idi nakaluk-atdan iti nasion a natay iti naespirituan. Damo a napasaran dagiti adalan ni Jesus ti kasta a panagbalbaliw idi a ti panagleddaangda gapu iti ipapatayna ket nagbalin a panagragsak gapu ta pinulotan ida ni napagungar nga Apoda iti nasantuan nga espiritu. Di nagbayag kalpasanna, kasta met laeng a panagbalbaliw ti napasaran dagiti 3,000 a naemma a tattao a nangipangag iti panangasaba dagidiay nabiit pay a napulotan a Kristiano ket nagpabautisarda idi Pentecostes 33 K.P. (Aramid 2:41) Anian a nagsayaat idi nga inanamaen ti pamendision ni Jehova! Imbes nga “agledleddaang gapu iti Sion,” immawatda iti nasantuan nga espiritu ken napasalibukagda iti “lana ti panagragsak,” a mangisimbolo iti panagragsak dagidiay sibabaknang a binendisionan ni Jehova.​—Hebreo 1:9.

12, 13. (a) Siasino ti “dadakkel a kaykayo ti kinalinteg” kadagiti nagsubli a Judio idi 537 K.K.P.? (b) Siasino ti “dadakkel a kaykayo ti kinalinteg” sipud pay idi Pentecostes 33 K.P.?

¹² Bendisionan ni Jehova ti ilina iti “dadakkel a kaykayo ti kinalinteg.” Siasino dagitoy a dadakkel a kaykayo? Kadagiti simmaganad a tawen kalpasan ti 537 K.K.P., isuda dagidi nangadal ken nangmennamenna iti Sao ti Dios ken nangannurot kadagiti nalinteg a pagalagadan ni Jehova. (Salmo 1:1-3; Isaias 44:2-4; Jeremias 17:7, 8) Dagiti lallaki a kas kada Esdras, Haggeo, Zacarias, ken ti Nangato a Padi a ni Josue nagbalinda a naisangsangayan a “dadakkel a kaykayo”​—dagiti nangitandudo iti kinapudno ken nangbusor iti naespirituan a polusion iti nasion.

¹³ Manipud idi Pentecostes 33 K.P. nga agpatpatuloy, nangimula ti Dios kadagiti umasping a “dadakkel a kaykayo ti kinalinteg”​—natutured a napulotan a Kristiano​—iti naespirituan a kasasaad ti baro a nasionna, ti “Israel ti Dios.” (Galacia 6:16) Iti panaglabas dagiti siglo, nagbalin a 144,000 ti bilang dagitoy a “kaykayo,” a mangpataud kadagiti nalinteg a bunga a mangpapintas, wenno mangted iti dayag ken Jehova a Dios. (Apocalipsis 14:3) Ti natda kadagitoy a nadaeg a “kaykayo” rimmukbosda sipud pay idi 1919, idi pinagungar ni Jehova dagiti natda ti Israel ti Dios iti temporario a di aktibo a kasasaadda. Babaen ti  panangtedna kadakuada iti aglaplapusanan a naespirituan a danum, nangpataud ni Jehova iti kasla kabakiran ti kinalinteg ken kaykayo nga agbunga.​—Isaias 27:6.

14, 15. Ania dagiti proyekto nga inaramid dagiti naluk-atan nga agdaydayaw ken Jehova nangrugi idi (a) 537 K.K.P.? (b) 33 K.P.? (c) 1919?

¹⁴ Kas panangitampok iti trabaho dagitoy a “kaykayo,” ituloy ni Isaias: “Masapul a bangonenda manen dagiti nakabaybayagen a walangwalang a disso; patakderendanto uray dagiti langalang a disso dagiti nagkauna a tiempo, ket sigurado a pabaruendanto dagiti walangwalang a siudad, dagiti disso a langalang iti kinapkaputotan.” (Isaias 61:4) Iti sidong ti pammilin ni Ari Ciro ti Persia, dagiti matalek a Judio a nagsubli manipud Babilonia imbangonda manen ti Jerusalem ken ti templona, a nabayagen a nabaybay-an a langalang. Kadagiti tawen kalpasan ti 33 K.P. ken 1919, adda met dagiti naaramid a proyekto a panangisubli.

¹⁵ Idi 33 K.P., naldaangan unay dagiti adalan ni Jesus gapu iti pannakatiliw, pannakabista, ken ipapatayna. (Mateo 26:31) Nupay kasta, nagbaliw ti panangmatmatda idi nagparang ni Jesus kadakuada kalpasan ti panagungarna. Ket idi naiparukpok kadakuada ti nasantuan nga espiritu, nagbalinda nga okupado iti trabaho a panangikasaba iti naimbag a damag, “agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Iti kasta, rinugianda nga isubli ti nasin-aw a panagdayaw. Iti umasping a wagas, nanipud 1919 nga agpatpatuloy, tinignay ni Jesu-Kristo ti natda kadagiti napulotan a kakabsatna tapno ibangonda manen “dagiti disso a langalang iti kinapkaputotan.” Iti adu a siglo, napaay dagiti klero ti Kakristianuan a mangiburay iti pannakaammo ni Jehova, a sinuktanda dayta kadagiti inaramid ti tao a tradision ken di nainkasuratan a doktrina. Dinalusan dagiti napulotan a Kristiano dagiti kongregasionda babaen ti panangikkatda kadagiti aramid a tinulawan ti palso a relihion tapno rumang-ay ti pannakaisubli ti pudno a panagdayaw. Ket isuda ti nangirugi iti agbalin a kadaklan a kampania a panangasaba ditoy lubong.​—Marcos 13:10.

16. Siasinoda ti tumultulong kadagiti napulotan a Kristiano iti trabahoda a panangisubli, ket ania dagiti trabaho a naitalek kadakuada?

 ¹⁶ Dakkel unay idi daytoy nga annongen. Kasano a maaramid ti sumagmamano laeng a natda ti Israel ti Dios ti kasta a trabaho? Pinaltiingan ni Jehova ni Isaias a mangipakaammo: “Dagiti sangsangaili pudno nga agtakderdanto ket ipastoranda dagiti arbanyo, ket dagiti ganggannaet isudanto dagiti mannalonyo ken dagiti agaywan kadagiti kaubasanyo.” (Isaias 61:5) Dagiti piguratibo a sangsangaili ken ganggannaet isuda ti “dakkel a bunggoy” dagiti “sabsabali a karnero” ni Jesus. * (Apocalipsis 7:9; Juan 10:11, 16) Saanda a napulotan iti nasantuan nga espiritu a manginanama iti nailangitan a tawid. Imbes ketdi, addaanda iti namnama nga agbiag nga agnanayon iti paraiso a daga. (Apocalipsis 21:3, 4) Nupay kasta, ay-ayatenda ni Jehova ket naitalek kadakuada ti naespirituan a panagipastor, panagtalon, ken panagaywan iti kaubasan. Saan a nanumo a trabaho dagita. Iti sidong ti panangiwanwan dagiti natda iti Israel ti Dios, tumultulong dagitoy a trabahador iti panagipastor, panagaywan, ken panagani iti tattao.​—Lucas 10:2; Aramid 20:28; 1 Pedro 5:2; Apocalipsis 14:15, 16.

17. (a) Anianto ti maipanagan kadagiti kameng ti Israel ti Dios? (b) Ania ti kakaisuna a daton a kasapulan iti pannakapakawan dagiti basol?

¹⁷ Ti met ngay Israel ti Dios? Kuna ni Jehova kadakuada baeten ken Isaias: “No maipapan kadakayo, mapanaganankayto iti papadi ni Jehova; maawagankayto iti ministro ti Diostayo. Kanenyonto ti sansanikua dagiti nasion, ket iti dayagda agsaokayto a siraragsak unay maipapan iti bagbagiyo.” (Isaias 61:6) Iti nagkauna nga Israel, impaay ni Jehova ti Levitico a kinapadi tapno agdaton a maipaay kadagiti mismo a papadi ken kadagiti padada nga Israelita. Nupay kasta, idi 33 K.P., insardengen ni Jehova nga usaren ti Levitico a kinapadi ket nangirugi iti nasaysayaat nga urnos. Inawatna ti perpekto a biag ni Jesus kas daton a para kadagiti  basol ti sangatauan. Sipud idin, saanen a kasapulan ti sabali pay a daton. Maikanatad iti amin a tiempo ti daton ni Jesus.​—Juan 14:6; Colosas 2:13, 14; Hebreo 9:11-14, 24.

18. Ania a kita ti kinapadi ti buklen ti Israel ti Dios, ket ania ti annongenda?

¹⁸ No kasta, kasano a “papadi ni Jehova” dagiti kameng ti Israel ti Dios? Iti surat ni apostol Pedro kadagiti padana a napulotan a Kristiano, kinunana: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna.” (1 Pedro 2:9) Gapuna, kas maysa a grupo, dagiti napulotan a Kristiano ti mangbukel iti kinapadi nga addaan iti espesipiko nga annongen: tapno ipadamagda kadagiti nasion ti maipapan iti dayag ni Jehova. Masapul nga agbalinda a saksina. (Isaias 43:10-12) Kadagiti maudi nga aldaw, simamatalek nga intungpal dagiti napulotan a Kristiano daytoy napateg nga annongen. Kas resultana, minilion itan ti kaduada a mangikaskasaba iti Pagarian ni Jehova.

19. Anianto a serbisio ti pribilehio nga aramiden dagiti napulotan a Kristiano?

¹⁹ Maysa pay, adda namnama dagiti kameng ti Israel ti Dios nga agserbi kas papadi iti sabali pay a wagas. Kalpasan ti ipapatayda, mapagungarda iti imortal nga espiritu a biag idiay langit. Agserbida sadiay saan laeng a kas kakadua ni Jesus nga agturay iti Pagarianna no di pay ket kas papadi ti Dios. (Apocalipsis 5:10; 20:6) Gapu iti dayta, addaandanto iti pribilehio a mangyaplikar kadagiti pagimbagan ti daton a subbot ni Jesus iti matalek a sangatauan ditoy daga. Iti sirmata ni apostol Juan a naisurat iti Apocalipsis kapitulo 22, nadeskribirda manen sadiay kas “kaykayo.” Makita nga adda amin idiay langit dagiti 144,000 a “kaykayo,” a mangpatpataud iti “sangapulo ket dua nga apit a bunga, a mangipapaay kadagiti bungada iti tunggal bulan. Ket ti bulbulong dagiti kayo agpaayda iti pannakaagas dagiti nasion.” (Apocalipsis 22:1, 2) Anian a nakaskasdaaw dayta a serbisio dagiti papadi!

 Pannakaibabain ken Pannakaipababa, Kalpasanna Panagrag-o

20. Iti laksid ti ibubusor, ania a bendision ti agur-uray iti naarian a kinapadi?

²⁰ Sipud idi 1914, idi nangrugi ti tawen ti naimbag a nakem ni Jehova, naynay ti panangbusor dagiti klero ti Kakristianuan iti naarian a kinapadi. (Apocalipsis 12:17) Nupay kasta, idi agangay napaay amin a panangikagumaan a mangpasardeng iti panangikasaba iti naimbag a damag. Impakpakauna daytoy ti padto ni Isaias, a kunana: “Imbes a pakaibabainanyo addanto mamindua a bingay, ket imbes a pannakaipababa agdir-idanto a sirarag-o gapu iti binglayda. Gapuna iti dagada tagikuaendanto uray ti mamindua a bingay. Ti panagrag-o agingga iti tiempo a di nakedngan isu ti agbalinto a kukuada.”​—Isaias 61:7.

21. Kasano a tinagiragsak dagiti napulotan a Kristiano ti doble a bingay a bendision?

²¹ Kabayatan ti Gubat Sangalubongan I, napasaran dagiti napulotan a natda ti pannakaibabain ken pannakaipababa iti im-ima ti nasionalistiko a Kakristianuan. Karaman dagiti klero kadagidiay siuulbod a nangpabasol iti sedision kadagiti walo a matalek a kakabsat iti hedkuarter idiay Brooklyn. Di nainkalintegan a naibalud dagitoy a kakabsat iti siam a bulan. Kamaudiananna, naluk-atanda idi primavera ti 1919, ket kalpasanna naabsueltoda iti amin a nakaidarumanda. Gapuna, baliktad ti napasamak iti gandatda a mangpasardeng iti trabaho a panangasaba. Imbes nga ipalubosna a lak-amen dagiti agdaydayaw kenkuana ti agtultuloy a pannakaibabain, linuk-atan ida ni Jehova ken insublina ida iti naespirituan a kasasaadda, “iti dagada.” Immawatda sadiay kadagiti doble a bingay a bendision. Ti pananggun-od iti pamendision ni Jehova ket naruay unay a supapak iti amin a sinagabada. Pudno unay nga addaanda iti panggapuan nga agdir-i a sirarag-o!

22, 23. Kasano ti panangtulad dagiti napulotan a Kristiano ken ni Jehova, ket kasanona a sinupapakan ida?

 ²² Ti sumaganad nga ibaga ni Jehova ipaayanna dagiti Kristiano itatta iti sabali pay a panggapuanda nga agrag-o: “Siak, ni Jehova, ayatek ti kinahustisia, guraek ti panagtakaw agraman ti kinakillo. Ket itedkonto a sipupudno ti supapak kadakuada, ket mamatalgedakto kadakuada iti di nakedngan ti kapautna a tulag.” (Isaias 61:8) Babaen ti panagadalda iti Biblia, nasursuro dagiti napulotan a natda nga ayaten ti kinahustisia ken guraen ti kinadakes. (Proverbio 6:12-19; 11:20) Nasursuroda a ‘pitpiten dagiti kampilanda a pagbalinen a subsob ti arado,’ a nagtalinaedda a neutral kadagiti gubat ken napolitikaan a riribuk ti sangatauan. (Isaias 2:4) Inidianda met dagiti aramid a mangibabain iti Dios, a kas ti panangpardaya, pannakikamalala, panagtakaw, ken panagbartek.​—Galacia 5:19-21.

²³ Gapu ta dagiti napulotan a Kristiano ket kaasping ti Namarsua kadakuada nga ayatenna ti kinahustisia, inted ni Jehova “a sipupudno ti supapak kadakuada.” Ti maysa a “supapak” isu ti di nakedngan ti kapautna a tulag​—ti baro a tulag​—nga impakaammo ni Jesus kadagiti pasurotna iti daydi rabii sakbay ti ipapatayna. Maibatay iti daytoy a tulag a nagbalinda a naespirituan a nasion, naisangsangayan nga ili ti Dios. (Jeremias 31:31-34; Lucas 22:20) Iti sidong dayta, iyaplikarto ni Jehova amin a pagimbagan ti daton a subbot ni Jesus, agraman ti pannakapakawan ti basbasol agpadpada kadagiti napulotan ken amin a sabsabali pay a matalek iti sangatauan.

Panagragsak Kadagiti Pamendision ni Jehova

24. Siasino “dagiti putot” a mabendisionan manipud kadagiti nasion, ket kasano nga agbalinda a “putot”?

²⁴ Nabigbig ti dadduma iti nasnasion a bembendisionan ni Jehova ti ilina. Naipakpakauna daytoy iti kari ni Jehova: “Dagiti putotda pudno a maammuanto uray iti tengnga dagiti nasion, ken dagiti kaputotanda iti tengnga dagiti ili. Amin dagidiay makakita kadakuada mabigbigdanto ida, nga isuda dagiti putot a binendisionan ni Jehova.” (Isaias 61:9) Dagiti kameng  ti Israel ti Dios, dagiti napulotan a Kristiano, aktiboda kadagiti nasion kabayatan ti tawen ti naimbag a nakem ni Jehova. Itatta minilionen ti nangipangag iti ministerioda. Babaen ti nasinged a pannakipagtrabahoda iti Israel ti Dios, dagidiay naggapu kadagiti nasion addaanda iti pribilehio nga agbalin a “putot a binendisionan ni Jehova.” Makita ti intero a sangatauan ti kinaragsakda.

25, 26. Kasano a mayanninaw dagiti amin a Kristiano ti panangmatmat a nayebkas iti Isaias 61:10?

²⁵ Amin a Kristiano, agpadpada dagiti napulotan ken sabsabali a karnero, il-iliwenda nga idayaw ni Jehova iti agnanayon. Umanamongda a naimpusuan ken propeta Isaias, a napaltiingan a nangikuna: “Di bumurong nga agragsakakto ken Jehova. Ti kararuak agrag-onto iti Diosko. Ta kinawesannak kadagiti pagan-anay ti pannakaisalakan; iti awan manggasna a lambon ti kinalinteg binalkutnak, kas iti nobio nga, iti wagas ti maysa a padi, agdalungdong, ken kas iti nobia a mangarkos iti bagina iti bambanag a pagarkos.”​—Isaias 61:10.

²⁶ Gapu ta nakawesan iti “awan manggasna a lambon ti kinalinteg,” determinado dagiti napulotan a Kristiano nga agtalinaed a nasin-aw ken nadalus iti imatang ni Jehova. (2 Corinto 11:1, 2) Yantangay indeklara ni Jehova a nalintegda ken addaan iti namnama nga agtawid iti nailangitan a biag, didanto pulos agsubli iti langalang a kasasaad ti Babilonia a Dakkel a nakawayawayaanda. (Roma 5:9; 8:30) Nakapatpateg kadakuada dagiti pagan-anay ti pannakaisalakan. Umasping iti dayta, determinado met dagiti sabsabali a karnero a kakaduada a mangannurot kadagiti natan-ok a pagalagadan ni Jehova a Dios iti nasin-aw a panagdayaw. Yantangay “linabaanda dagiti pagan-anayda ket pinapudawda ida iti dara ti Kordero,” naideklarada a nalinteg ket makalasatdanto “iti dakkel a rigat.” (Apocalipsis 7:14; Santiago 2:23, 25) Kabayatanna, tultuladenda dagiti napulotan a kakaduada a mangidian iti aniaman a panangtulaw ti Babilonia a Dakkel.

27. (a) Kabayatan ti Milenio a Panagturay, anianto daydiay naisangsangayan a ‘panagtubo’? (b) Kasano nga agtubtubon ti kinalinteg iti sangatauan?

²⁷ Itatta, pagragsakan dagiti agdaydayaw ken Jehova ti kaaddada  iti naespirituan a paraiso. Din agbayag tagiragsakendanto met ti Paraiso iti pisikal a wagas. Segseggaantayo a naimpusuan dayta a tiempo, a sibabatad a nailadawan iti pangserra a sasao ti Isaias kapitulo 61: “Kas iti panangpataud ti mismo a daga iti tarubongna, ken kas iti panangpatubo ti minuyongan a mismo iti bambanag a naimula iti dayta, iti umasping a pamay-an pagtubuento ti Soberano nga Apo Jehova ti kinalinteg ken ti panangidaydayaw iti sanguanan dagiti amin a nasion.” (Isaias 61:11) Kabayatan ti Milenio a Panagturay ni Kristo, sagrapento ti daga ti ‘panagtubo ti kinalinteg.’ Agdir-into a sibaballigi dagiti tattao, ket agsaknapto ti kinalinteg iti intero a daga. (Isaias 26:9) Nupay kasta, saantayon nga urayen dayta a nadayag nga aldaw tapno ipaaytayo iti panangidaydayaw iti sanguanan dagiti amin a nasion. Agtubtubo itan ti kinalinteg kadagiti minilion a mangipapaay iti dayaw iti Dios ti langit ken mangipakpakaammo iti naimbag a damag maipapan iti Pagarianna. Uray pay itan, ti pammati ken namnamatayo ipaayannatay iti panggapuan nga agragsak kadagiti pamendision ti Diostayo.

[Footnote]

[Salsaludsod]

 [Ladawan iti panid 323]

Adda naimbag a damag nga ipakaammo ni Isaias kadagiti kautibo a Judio

 [Ladawan iti panid 331]

Nangrugi idi 33 K.P., nangimula ni Jehova iti 144,000 a “dadakkel a kaykayo ti kinalinteg”

[Ladawan iti panid 334]

Agtubonto ti kinalinteg ditoy daga