Kapitulo 13

Dakkel a Bunggoy iti Sanguanan ti Trono ni Jehova

 1. (a) Sakbay ti panangawat dagiti ad-adipen ti Dios sakbay-ti-panawen-Kristiano wenno dagiti 144,000 ti gunggonada, aniat’ masapul a lak-amenda? (b) Ngem anianto ti posible para iti dakkel a bunggoy nga agbibiag inton dumtengen ti “dakkel a rigat”?

 NUPAY dagiti matalek nga ad-adipen ti Dios manipud ken Abel agingga ken Juan a Mammautisar impangpangrunada ti panagaramid ti pagayatan ti Dios iti biagda, masapul a matayda amin ket urayenda ti panagungar. Dagiti 144,000 a kaduanto ni Kristo iti nailangitan a tronona ti masapul a matayda met sakbay nga awatenda ti gunggonada. Maisupadi iti dayta, naipakita ken apostol Juan babaen ti sirmata nga addanto met dakkel a bunggoy nga aktual a makalasat iti “dakkel a rigat” ken, saandan a matmatay, maaddaandanto ti namnama nga agbiag ti agnanayon.​—Apoc. 7:9-17.

Panangilasin iti “Dakkel a Bunggoy”

 2. Aniat’ nangiturong iti nalawag a pannakaawat iti pakailasinan ti “dakkel a bunggoy” idiay Apocalipsis 7:9?

² Iti adu a siglo ti pakailasinan daytoy “dakkel a bunggoy” ti saan a natarusan. Ngem ti progresibo a pannakaawat kadagiti agkakanaig a padpadto ti nangisagana ti dalan. Idi 1923 natarusan a dagiti “karnero” iti pangngarig ni Jesus idiay Mateo 25:31-46 ken dagiti “sabsabali a karnero” a tinukoyna idiay Juan 10:16 ket isuda dagiti tattao nga agbibiag itan nga addaan gundaway nga agnaed nga agnanayon ditoy daga. Idi 1931 dagidiay nailadawan idiay Ezequiel 9:1-11 kas addaan tanda kadagiti mugingda nga inkabil ti lalaki nga addaan pagtinteroan iti mannurat ti nailasin a kadua dagiti “karnero” idiay Mateo kapitulo 25. Sa, idi 1935, ti “dakkel nga umariwekwek,”  wenno ti “dakkel a bunggoy,” ti Apocalipsis 7:9-17 ti nakita nga isu met laeng dagiti “karnero” iti pangngarig ni Jesus maipapan kadagiti karnero ken kalding. Nupay idi 1923 nabigbigen a sumagmamanon kadagita a kimmarnero a tattao ti nangrugin a mangiparparangarang ti bagbagida, saan laeng nga idi 1935 a nangrugi a dumakkel a sipapardas ti bilangda. Itan literalen a minilmilion ti agsapsapul ti pannakailasinda kas paset dayta addaan pabor ti Dios a “dakkel a bunggoy” dagiti “sabsabali a karnero.”

 3. Apay a ti ‘panagtatakderda iti sanguanan ti trono’ dina kayat a sawen a maysada a nailangitan a klase?

³ Dagidiay adda iti “dakkel a bunggoy” ti nailasinda manipud ti 144,000 a kamkameng ti naespirituan nga Israel, a nadakawat nga immuna iti isu met laeng a kapitulo ti Apocalipsis. Iti sirmatana saan a nakita ni Juan daytoy “dakkel a bunggoy” kas adda idiay langit. Ti kunana nga “agtatakderda iti sanguanan di trono” (Griego: e·noʹpi·on tou throʹnou, “iti imatang ti trono”) ti Dios dina sapulen nga addada idiay langit. Ti posisionda ket basta addada laeng “iti imatang” ti Dios, a mangibagbaga kadatayo a manipud langit kitkitaenna dagiti annak dagiti tattao. (Apoc. 7:9; Sal. 11:4; idiligyo iti Salmo 100:1, 2, kasta met ti Lucas 1:74, 75 ken Aramid 10:33, Kingdom Interlinear.) Kasta met, saanen a nesesita para kadagiti “amin a nasnasion” nga adda idiay langit tapno isuda ti adda iti sanguanan ti trono ni Kristo (iti literal, “iti sanguananna”), kas naisalaysay idiay Mateo 25:31, 32. Ti banag a ti “dakkel a bunggoy, nga awan ti makabalin a bumilang,” saan a maysa a nailangitan a klase ti naipakita babaen panangidilig iti Apocalipsis 7:4-8 ken 14:1-4, a sadiay ti nakaipanayagan ti espesipiko a bilang dagidiay nasubbot manipud daga a maaddanto idiay langit.

 4. (a) Ania ti “dakkel a rigat” a mailasatandanto? (b) Kas kunana idiay Apocalipsis 7:11, 12, asino dagiti mangpalpaliiw iti “dakkel a bunggoy” ken makipaspaset a kaduada iti panagdaydayaw?

⁴ Iti panangilasinna ti “dakkel a bunggoy,” nagsurat ni Juan: “Dagitoy isuda dagiti naggapu iti dakkel a rigat.” Ti mailasatdanto, kinapudnona, ket isu ti kadadakkelan a  rigat a napasaran pay laeng ditoy daga. (Apoc. 7:13, 14; Mat. 24:21) Dagiti makalasat iti dayta nakaal-alingget nga aldaw ni Jehova ti saanna a pagduaduaen no asinot’ responsable iti pannakaispalda. Inton siyayaman nga ipabiangdan ti pannakaisalakanda iti Dios ken iti Kordero, iti kasta, kas nakita ni Juan iti sirmata, amin dagiti matalek a parparsua idiay langit pagkaykaysaendanto ti timekda kadakuada iti panagdaydayaw iti dayta maymaysa a pudno a Dios, a kunkunana: “Amen! Bendision ken dayag ken sirib ken panagyaman ken dayaw ken bileg ken pannakabalin ti maadda koma iti Diostayo iti agnanayon. Amen.”​—Apoc. 7:11, 12.

Nasuotdan no Maipapan ti Pannakaikarida ti Ilalasat

 5. (a) Kasanotay a madeterminar no aniat’ kasapulan tapno agbalin a paset ti “dakkel a bunggoy” a maispalto? (b) Babaen ti panangsungbat kadagiti salsaludsod iti ungto daytoy a parapo, ilawlawagyo no aniat’ kasapulan tapno makalasat iti “dakkel a rigat.”

⁵ Ti pannakaispal ti “dakkel a bunggoy” ti mapasamak a maitunos kadagiti mismo a nalinteg a pagalagadan ni Jehova. Dagiti nalawag a panangipamatmat kadagiti pakailasinan nga ug-ugali dagidiay maisalakan ti nairamanda kadagiti panangtukoy dagiti padto ti Biblia maipapan kadakuada. Gapu iti dayta posible para kadagiti managayat ti kinalinteg nga agtignay itan a simamatmat iti pannakailasatda. Nadakawattayon dagiti kasuratan a sumaruno. Ngem ita usigenyo ida a naimbag, babaen ti tulong dagiti kanayonan a teksto a naisitar, ket usigenyo no aniat’ masapul nga aramidenyo tapno maibagaykayo kadagitoy a propetiko a panangiladawan.

 “Sabsabali a karnero” a natukoy idiay Juan 10:16

 Aniat’ talaga a kaipapananna para iti maysa a tao a dumngeg iti timek ni Jesus? (Juan 10:27; Mat. 9:9; Efe. 4:17-24)

 Kasanotay a maipakita a bigbigbigentayo ni Kristo kas ti “maymaysa a pastortayo”? (Mat. 23:10, 11)

 Dagiti “karnero” iti pangngarig ni Jesus maipapan kadagiti karnero ken kalding (Mat. 25:31-46)

  Asino dagiti “kakabsat” ni Kristo a nangaramid kadagitoy ti naimbag? (Heb. 2:10, 11; 3:1)

 Iti sidong dagiti ania a narigat a sirkumstansia ti nakaawisanda a pangipabigbigan ti bagida a kadua dagiti kakabsat ni Kristo ditoy daga? Ket iti ania a trabaho ti pangpangtedanda ti nasungdo a panangtulong? (Apoc. 12:12, 17; Mat. 24:14; 28:19, 20)

 Tattao a natandaan maipaay iti pannakalasat babaen iti lalaki nga addaan pagtinteroan ti mannurat (Ezeq. 9:1-11)

 Kasanot’ panangipakitada a saanda a makituntunos kadagiti makarimon a bambanag a maar-aramid iti antitipiko a Jerusalem, wenno ti Kakristianuan? (Apoc. 18:4, 5)

 Aniat’ nairaman iti “tanda” a mangigiddiat kadakuada manipud kadagiti sinsinan Kristiano ken mangilinea kadakuada iti pannakaispal? (1 Ped. 3:21; Mat. 7:21-27; Juan 13:35)

 6. Kasano a ti panangiladawan ni Juan iti “dakkel a bunggoy” tulongannatayo a mangtarus no apay a naispalda?

⁶ Ti panangiladawan ti “dakkel a bunggoy” kas masarakan idiay Apocalipsis 7:9-15 ti mangnayon ti dadduma pay a napapateg a detalye. Iti panangisalaysayna kadatayo no kasanot’ panagparang dagidiay “dakkel a bunggoy” kalpasan ti “dakkel a rigat,” ipakita met dagiti Kasuratan dagiti bambanag a nakaiturong iti pannakaispalda.

 7. Aniat’ inaramidda sakbay ti “dakkel a rigat,” ken kasano a naisingasing daytoy?

⁷ Nupay naggapuda manipud amin a nasnasion, tribo, il-ili ken pagsasao, naipakitada a sangsangkamaysa nga “agtatakder iti sanguanan di trono,” a bigbigbigenda ni Jehova, Daydiay situtugaw iti trono, kas ti Sapasap a Soberano. Pinaneknekanda babaen iti wagas ti panagbiagda nga isudat’ nasungdo a manangsuportar ti panagturayna. Ti kinapudnona a “binuggoanda dagiti pagan-anayda ket pinapudawda ida iti dara ti Kordero” ipamatmatna a binigbigda ti pannakasapulda iti makaabbong-basol a merito iti daton ni Jesus kas Kordero ti Dios. (Juan 1:29; 1 Juan 2:2) Babaen ti pammati indedikarda ti bagbagida iti Dios a naibatay iti dayta a daton, nga insimboloda daytoy babaen iti pannakaitanebda iti danum ket itan tagtagiragsakendan ti nadalus a takderda iti sanguanan  ti Dios, kas iladladawan ti napapudaw a pagan-anayda. Saanda a nagkedked manipud panangipakaammo iti publiko ti pammatida iti Anak ti Dios. (Mat. 10:32, 33) Maitunos kadagitoy amin, naipakita a kaslada adda iti templo ti Dios, wenno iti sapasap a balay a pagdaydayawan, kas managdaydayaw a mangipapaay iti Dios ti “sagrado a serbisio iti aldaw ken rabii.” Iti kasta nakaaramidda ti rekord kas nasusungdo a manangsuportar iti pudno a panagdaydayaw ken kas manangiwaragawag iti Pagarianna.​—Isa. 2:2, 3.

 8. Tapno makagunggona daytoy nga impormasion kadatayo, aniat’ masapul nga aramidentayo?

⁸ Maibagay met aya dagitoy a detalye ti propetiko a ladladawan kadakayo? Addada kadi pamay-an a kasapulanyo pay a pangitunosan a naan-anay iti biagyo sigun ti adda a naisalaysay ditoyen? No kasta, itan ti panawen a panangaramid iti dayta!

Agbibiag iti Naespirituan a Paraiso

 9. Kasanot’ panangisalaysay ni Juan kadagiti naespirituan a bendision a tagtagiragsaken ti “dakkel a bunggoy” uray pay itan?

⁹ Maysakayo aya a manginanama a makalasat kas paset ti “dakkel a bunggoy”? No nakitunoskayon kadagiti nalinteg a daldalan ni Jehova, no kasta awan duadua nga inrugiyo metten a tagtagiragsaken dagiti naikari a kasasaad a maiyanatup a naawaganen kas naespirituan a paraiso. Naibaga ken apostol Juan: “Didanto agbisinen wenno mawawen, ket didanto met mainitanen wenno aniaman a pudot, ta ti Kordero nga adda iti tengnga ti trono, ipastorannanto ida, ket iturongnanto ida kadagiti ubbog ti danum ti biag. Ket punasento ti Dios ti amin a lulua kadagiti matada.” (Apoc. 7:16, 17) Kasano a pudno daytoyen iti kasoyo?

10. (a) Iti naespirituan a kaipapananna kasano a pudno a ti “dakkel a bunggoy” “didanto agbisinen wenno mawawen”? (b) Napasaranyo kadi daytoyen?

¹⁰ Sakbay ti iyaayyo iti sidong ti naayat a panangaywan ti Naimbag a Pastor, a ni Jesu-Kristo, mabisbisin ken mawawankayo aya ti kinalinteg? (Idiligyo iti Mateo 5:6.) No kasta, ti il-iliwenyo ket maysa a banag a ni laeng  Jehova ti makaipaay babaen iti Anakna. Idi naadalyo ti maipapan kadagiti nalinteg a daldalan ni Jehova​—ti panggepna a mangdadael kadagiti managdakdakes, kaskasdi ti di kaikarian a kinamanangaasina a mamagbalin a posible ti pannakaisalakan dagiti putot ni Adan​—ngarud, awan duadua, iti damdamona unay iti panagbiagyo nariknayo ti pudpudno a pannakapnekyo. Ti naespirituan a taraon ken inumen manipud Sao ti Dios, kas maiserserbi babaen iti organisasionna, ti nagtultuloy a nangiyeg ti pannakapnek kadakayo. (Isa. 65:13, 14) Ket no indedikaryon ti bagiyo iti Dios baeten ken Kristo addaankay itan ti pudpudno a panggep iti biag. (Idiligyo iti Juan 4:32-34.) Adda iti sanguananyo ti makaparagsak a namnama ti biag nga awan inggana iti maysa a Paraiso a daga, agsipud ta ti Kordero “iturongnanto ida [dagiti “dakkel a bunggoy”] kadagiti ubbog ti danum ti biag.”

11. (a) Iti ania a pamay-an a pudno a ‘didanto met mainitanen wenno aniaman a pudot’? (b) Kasano kapateg dayta kadakayo?

¹¹ Kas dagiti managtalek a “karnero,” dagidiay adda iti “dakkel a bunggoy” ti masalaknibanda met ken sitatalged a maiturongda babaen ti Naimbag a Pastor. Isut’ gapuna a, iti piguratibo a panagsao, ‘didanto met mainitanen wenno aniaman a pudot.’ Di kayat a sawen daytoy a, kas maysa a paset ti “dakkel a bunggoy,” saankayton nga agsagaba ti pannakaidadanes manipud iti lubong. Imbes ketdi, kaipapanan dayta a masaluadankayton manipud iti makasinit a pudot ti mismo a panagpungtot ti Dios. Ket inton pagtuduennan ti nasantuan a panangdadaelna kadagiti managdakdakes, daytanto ti saan a mangiyeg kadakayo iti pannakapukaw. Daytoy naparabur a pannakirelasion ti agtultuloyto iti agnanayon.​—Ezeq. 38:​22, 23; idiligyo iti Salmo 11:6; 85:3, 4.

12. Kasano a napunasen ti lulua kadagiti matmatayo uray pay itattan?

¹² Anian a nakaskasdaaw a rason ti inkay panagrag-o ti adda kadakayo no pudpudno a maysakayo met iti dayta “dakkel a bunggoy”! Addaankayo iti nakaskasdaaw a namnama ti pannakakita ti naan-anay a pannakaikkat ti  kinadakes ket kalpasanna aktual a mawayawayaan metten ti mismo nga isip ken bagiyo manipud kadagiti amin nga epekto ti basol. Ngem uray pay itattan ti sinnaay a laklak-amen dagiti tattao gaput’ kinakunengda iti Dios ti saan a mangsapsaplit kadakayo. Mangrugrugin a maammuanyo ti rag-o nga agpaay laeng kadagiti tattao a ti Diosda isu ni Jehova. (Sal. 144:15b) Iti daytoy a pamay-an mangrugrugin a laklak-amenyon ti kaitungpalan ti kari nga: “Punasento ti Dios ti amin a lulua kadagiti matada.”

13. Anianto ti mainayon kadagiti pagrag-oan iti naespirituan a paraiso bayat a rumangrang-ay ti panagturay ni Kristo iti milenio?

¹³ Kas ti “dakkel a bunggoy” mailasatdanto iti panungpalan daytoy a sistema dagiti bambanag, kasta met ti naespirituan a paraiso. No maysakayto kadakuada, no kasta agtultuloykayto a mangtagiragsak ti naespirituan a rambak dagiti nalukmeg a banag bayat a rumangrang-ay ti panagturay ni Kristo ti milenio. Ti pannakaammoyo iti Dios mismo ti umun-uneg met bayat a makitkitayo ti naballigi a panggepna nga agturong iti nadayag a pannakatungpalna. Ti rag-oyo ti dumakkel bayat ti pannakipaspasetyonto met a mangabrasa ti panagsubli ti dumakdakkel nga umariwekwek manipud ken patay a maitiponton kadakayo iti pudno a panagdaydayaw. Ket dagiti pisikal a bendision a maipaayto ti nangnangruna a napategto kadagiti amin a nasungdo nga ad-adipen ti Dios ta dagitanto ti makita kas ebkas ti ayat ni Jehova a mismo.​—Isa. 25:6-9; Sant. 1:17.

Repaso a Pagsasaritaan

● Iti ania a naisalsalumina a pasamak ti nanginaigan ti Biblia ti “dakkel a bunggoy,” ken kasano?

● No talaga a kayattayo ti mairaman iti dayta pinaraburan ti Dios a “dakkel a bunggoy,” aniat’ masapul nga aramidentayo itan?

● Kasano kapateg kadakayo dagiti bendision ti naespirituan a paraiso?

[Salsaludsod]