Ania ti Pammati dagiti Saksi ni Jehova?

“Ngem kayatmi a mangngegan ti pammatiyo, ta ti laeng ammomi maipapan kadagitoy a Kristiano a ta masupsuppiatda iti isuamin a disso!” (Aramid 28:22, The Living Bible) Dagitoy a pangulo ti komunidad idiay Roma idi umuna a siglo nangipakitada ti nasayaat nga ulidan. Kayatda ti dumngeg manipud iti gubuayan, imbes a manipud kadagiti makinruar laeng a kritiko.

Umas-asping iti dayta, dagiti Saksi ni Jehova itatta ti masansan met a masupsuppiatda, ket maysa a biddut a manginanama a maammuan ti kinapudno maipapan kadakuada manipud gubuayan nga adda panagil-ilemna. Gapuna maragsakankami a mangilawlawag kadakayo ti sumagmamano kadagiti kangrunaan a pammatimi.

Ti Biblia, ni Jesu-Kristo, ken ti Dios

Mamatikami nga “amin a Kasuratan impaltiing ti Dios ken naimbag a pakasursuroan.” (2 Timoteo 3:16) Ket nupay kuna ti dadduma a saankami kano a pudno a Kristiano, saan a pudno dayta. Anamonganmi a naan-anay ti pammaneknek ni apostol Pedro maipapan ken Jesu-Kristo: “Ta awan ti sabali a nagan iti babaen ti langit a naited kadagiti tao a pakabalinantayo a maisalakan.”—Aramid 4:12.

Nupay kasta, yantangay kinuna ni Jesus nga isu ti “Anak ti Dios” ken ti “Ama imbaonnak,” patien dagiti Saksi ni Jehova a ti Dios ti dakdakkel ngem ni Jesus. (Juan 10:36; 6:57) Ni Jesus mismo binigbigna: “Ni Ama dakdakkel ngem  siak.” (Juan 14:28; 8:28) Gapuna dikam patien a ni Jesus ti pumatas iti Ama, kas kunaen ti doktrina a Trinidad. Imbes ketdi, patienmi nga isut’ pinarsua ti Dios ket isut’ nababbaba Kenkuana.—Colosas 1:15; 1 Corinto 11:3.

Iti pagsasao nga Iloko, ti nagan ti Dios ket Jehova. Kuna ti Biblia: “Siksika laeng, nga agnagan JEHOVA, ti kangatuan a ringbawam ti amin a daga.” (Salmo 83:18, King James Version) Maitunos iti daytoy nga ebkas, dakkel panangipaganetget ni Jesus iti nagan ti Dios, nga insurona a kararagen ti paspasurotna: “Amami nga addaka iti langlangit, masantipikar koma ti naganmo.” Ken isu a mismo ti nagkararag iti Dios: “Impalawagko ti naganmo kadagiti tao nga intedmo kaniak.”—Mateo 6:9; Juan 17:6.

Patien dagiti Saksi ni Jehova a rebbeng nga agbalinda kas ken Jesus iti panangiparangarang ti nagan ken pangpanggep ti Dios kadagiti dadduma. Gapuna imbaklaymi ti nagan a dagiti Saksi ni Jehova agsipud ta tultuladenmi ni Jesus, “ti Matalek a Saksi.” (Apocalipsis 1:5; 3:14) Maiyanatup unay, kuna ti Isaias 43:10 iti ili a pannakabagi ti Dios: “‘Dakayo dagiti saksik,’ kuna ni Jehova, ‘ken ti adipenko a pinilik.’”

Ti Pagarian ti Dios

Sinuruan ni Jesus dagiti paspasurotna nga agkararag, “Umay koma ti pagariam,” ket pinagbalinna dayta a Pagarian a kangrunaan a tema ti panangisursurona. (Mateo 6:10; Lucas 4:43) Patien dagiti Saksi ni Jehova a ti Pagarian ket pudpudno a gobierno manipud langit, a daytanto ti mangituray ti intero a daga, ket ni Jesu-Kristo ti nadutokan a di makita nga Arina. “Ti gobierno maiparabawto iti abagana,” kuna ti Biblia. “Ti idadakkel ti gobiernona ken ti kappia awanto ti inggana.”—Isaias 9:6, 7, KJ.

Nupay kasta, ni Jesu-Kristo ket saanto nga isut’ kakaisuna nga Ari ti gobierno ti Dios. Adunto dagiti kaduana nga agturay idiay langit. “No makaibturtayo,” insurat ni apostol Pablo, “agaritayto met a mairanud kenkuana.” (2 Timoteo  2:12) Ipamatmat ti Biblia a dagidiay tattao a mapagungar nga agturay a kadua ni Kristo idiay langit ti nakednganda iti “sangagasut ken uppatapulo ket uppat a ribo, isuda a nasubbot itoy daga.”—Apocalipsis 14:1, 3.

Siempre, aniaman a gobierno ti masapul nga addaan kadagiti iturayan, ket patien dagiti Saksi ni Jehova a binilbilion pay malaksid kadagidiay nailangitan nga agtuturay ti umawatto ti biag nga agnanayon. Iti agangay ti daga, a napagbalinton a nagpintas a paraiso, ti mapnonto kadagitoy maikari nga iturayan ti Pagarian ti Dios, nga amin agpasakopdanto iti panagturay ni Kristo ken dagiti agturay a kakaduana. Gapuna kumbinsido unay dagiti Saksi ni Jehova a ti daga nikaanoman dinto madadael ken matungpalto ti kari ti Biblia: “Ti sililinteg tawidennanto ti daga, ket agtaengto kenkuana nga agnanayon.”—Salmo 37:29; 104:5.

Ngem kasanot’ iyaay ti Pagarian ti Dios? Babaen aya ti panagpasakop a siboboluntario amin a tattao iti gobierno ti Dios? Maisungani iti dayta, sibabatad nga ipakita ti Biblia a ti iyaay ti Pagarian sapulenna ti direkta nga ibaballaet ti Dios kadagiti ar-aramid iti daga: “Ti Dios ti langit mamangonto iti maysa a pagarian a kaanoman dinto madadael. Ket ti pagarian mismo . . . burakennanto ken ibusennanto amin dagitoy a pagpagarian, ket isu agtalinaedto iti panawen a di nakedngan.”—Daniel 2:44.

Kaanonto ti iyaay ti Pagarian ti Dios? Sigun kadagiti padto ti Biblia a matungtungpal itan, patien dagiti Saksi ni Jehova a daytat’ umayen iti mabiit. Awisendakayo a mangusig ti sumagmamano kadagiti padto a mangipakpakauna ti ramramit  “dagiti maudi nga al-aldaw” daytoy dakes a sistema dagiti bambanag. Nailanadda idiay Mateo 24:3-14; Lucas 21:7-13, 25-31; ken 2 Timoteo 3:1-5.

Agsipud ta ‘inayatmi ni Jehova a Diosmi iti amin a pusomi, kararuami, isip, ken pigsami, ken ti kaarrubami kas ti bagimi met laeng,’ saankam a nabingaybingay sigun iti pagilian, rasa, ken iti kagimongan. (Marcos 12:30, 31) Agdindinamagkami iti ayat a maiparparangarang iti nagbabaetanmi kas agkakabsat a Kristiano a masarakan iti amin a nasnasion. (Juan 13:35; 1 Juan 3:10-12) Gapuna salsalimetmetanmi ti neutral a takder kadagiti napolitikaan nga ar-aramid dagita a nasnasion. Pagregreggetanmi ti agbalin kas kadagiti immuna nga adalan ni Jesus, a nagkunaanna: “Saanda a paset ti lubong, a kas kaniak a saanak a paset ti lubong.” (Juan 17:16) Patienmi a ti pannakaisina iti lubong kaipapananna ti panangliklik kadagiti imoral a kababalin a nakasaksaknap itatta, agraman panagulbod, panagtakaw, pannakiabig, pannakikamalala, homoseksualidad, di umiso a panangusar iti dara, panagdayaw iti ladladawan, ken dadduma pay a bambanag nga ilunod ti Biblia.—1 Corinto 6:9-11; Efeso 5:3-5; Aramid 15:28, 29.

Namnama iti Masanguanan

Patien dagiti Saksi ni Jehova a ti agdama a biagtayo iti daytoy a lubong ket saan laeng nga isut’ adda. Patienmi a ni Jehova imbaonna ni Kristo ditoy daga tapno ibukbokna ti darana kas daton tapno dagiti tattao maaddaanda ti nalinteg a kasasaad iti Dios ket umawatda ti biag nga agnanayon iti maysa a baro a sistema dagiti bambanag. Kas kinuna ti apostol ni Jesus: “Datayo napalintegtayon babaen iti dara.” (Roma 5:9; Mateo 20:28) Siyayaman unay dagiti Saksi ni Jehova iti Dios ken iti Anakna gapu itoy a sagana ti subbot a mamagbalin a posible iti masanguanan a biag.

Adda naan-anay a panagtalek dagiti Saksi ni Jehova iti masanguanan a biag, babaen iti panagungar manipud ken patay iti sidong ti Pagarian ti Dios. Patienmi, kas isursuro ti  Biblia, a no matay ti tao talaga nga agpukaw ti biagna, “iti dayta met la nga aldaw dagiti pampanunotna mapukawda.” (Salmo 146:3, 4; Ezequiel 18:4; Eclesiastes 9:5) Wen, ti masanguanan a biag kadagiti natay ket maibatay ti pananglaglagip ti Dios kadakuada iti panagungar.—Juan 5:28, 29.

Nupay kasta, kumbinsido dagiti Saksi ni Jehova nga adu itan a sibibiag ti makalasat inton iyegen ti Pagarian ti Dios ti panagpatingga amin dagiti agdama a gobierno ken, kas ken ni Noe ken ti pamiliana nakalasatda iti Layus, agtultuloydanto a sibibiag a mangtagiragsak ti biag nga agnanayon iti nadalusanen a daga. (Mateo 24:36-39; 2 Pedro 3:5-7, 13) Ngem patienmi a ti ilalasat ket agpannuray iti pannakaragpat kadagiti pagannurotan ni Jehova, kas kunaen ti Biblia: “Ti lubong aglabas . . . , ngem ti agaramid iti pagayatan ti Dios mataginayon.”—1 Juan 2:17; Salmo 37:11; Apocalipsis 7:9, 13-15; 21:1-5.

Nalawag, saan a mabalin a saklawen amin ditoy ti pammati dagiti Saksi ni Jehova, ngem awisendakayo a mangala pay ti kanayonan nga impormasion.

Malaksid no naipakita, amin a panagadaw iti Biblia ket naggapuda iti New World Translation of the Holy Scriptures.

[Blurb iti panid 4]

Imbaklaymi ti nagan a dagiti Saksi ni Jehova agsipud ta tultuladenmi ni Jesus