Apay a Mataytayo?
Apay a Mataytayo?
“Iti tuktok dagiti turod naulimek ita, iti tuktok dagiti kayo awan a pulos mangngeg; nailibay dagiti tumatayab kadagiti kayo: agurayka; di agbayag aginanakan a kas kadagitoy.”—JOHANN WOLFGANG VON GOETHE, ALEMAN A DUMADANIW.
1, 2. (a) Naparsua ti tattao nga addaan iti ania a tarigagay? (b) Ania a kita ti biag ti tinagiragsak ti immuna a natauan a pagassawaan?
TI DIOS pinarsuana ti tao nga addaan iti tarigagay nga agbiag nga agnanayon. Kinapudnona, kuna ti Biblia nga insaadna ti “rikna a kinaagnanayon kadagiti pusoda.” (Eclesiastes 3:11, Beck) Ngem saan laeng a basta inted ti Dios kadagiti tattao ti tarigagay nga agbiag nga agnanayon. Inikkanna met ida iti gundaway a mangragpat iti dayta.
2 Naparsua a perpekto dagiti immuna a nagannak kadatayo, da Adan ken Eva, nga awan pakapilawanda iti panunot wenno bagi. (Deuteronomio 32:4) Agasenyo—awan dagiti nakaro nga ut-ot ken rigat, awan pakadanagan wenno pakaringgoran! Maysa pay, insaad ti Dios ida iti makaay-ayo a paraiso a pagtaengan. Pinanggep ti Dios nga agbiag nga agnanayon ti tao ket inton agangay mapno ti daga kadagiti perpekto nga annakna. (Genesis 1:31; 2:15) Apay ngarud a mataytayo?
Ti Kinasukir Ibungana ti Ipapatay
3. Agpannuray idi iti ania tapno agbiag nga agnanayon da Adan ken Eva?
3 Imbilin ti Dios ken ni Adan: “Kadagiti amin a kayo iti minuyongan mangankanto a siwayawaya: Ngem ti aggapu iti kayo ti pannakaammo ti imbag ken ti dakes saanmonto a kanen: ta iti aldaw a pannanganmo iti daydiay mataykanto a di bumurong.” (Genesis 2:16, 17) Gapuna adda kondisionna ti panagbiag nga agnanayon da Adan ken Eva; agpannuray dayta iti panagtulnogda iti Dios.
4. Idi nagbasol da Adan ken Eva, apay a napukawda ti namnamada nga agbiag nga agnanayon iti Paraiso?
4 Nupay kasta, nakalkaldaang ta sinukir da Adan ken Eva ti linteg ti Dios. (Genesis 3:1-6) Gapu iti dayta, nagbalinda a managbasol, ta ti “basol ket kinakillo.” (1 Juan 3:4) Kas resultana, awanen ti namnama da Adan ken Eva nga agbiag iti agnanayon. Apay? Agsipud ta “dagiti isupapak ti basol isu ti ipapatay.” (Roma 6:23) Gapuna, idi sentensiaanna da Adan ken Eva, kinuna ti Dios: “Tapokka, ket iti tapok agsublikanto.” Kalpasanna napagtalaw dagiti immuna a nagannak kadatayo iti Paraiso a taengda. Iti daydi aldaw a panagbasolda, nangrugin da Adan ken Eva iti in-inut ngem agtultuloy nga ipapatayda.—Genesis 3:19, 23, 24.
“Ti Ipapatay Nagsaknap iti Isuamin a Tattao”
5. Kasano a nagsaknap ti ipapatay iti intero a sangatauan?
5 Ita naibinggas unayen ti basol kadagiti genes da Adan ken Eva. Gapuna, didan makapataud kadagiti perpekto nga annak, no kasano a di makapataud iti perpekto a banag ti maysa nga imperpekto a molde. (Job 14:4) Kinapudnona, tunggal adda mayanak a tao pasingkedanna a napukaw dagiti immuna a nagannak kadatayo ti perpekto a salun-at ken agnanayon a biag para kadakuada ken kadagiti annakda. Insurat ni Kristiano nga apostol Pablo: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti isuamin a tattao agsipud ta nagbasolda amin.”—Roma 5:12; idiligyo ti Salmo 51:5.
6. Apay a mataytayo?
6 Itatta saan nga ammo dagiti sientista no apay a lumakay ken matay dagiti tattao. Nupay kasta, ilawlawag ti Biblia a mataytayo gapu ta nayanaktayo a managbasol, a natawidtayo daytoy a kasasaad kadagiti immuna a nagannak kadatayo. Ngem aniat’ mapasamak kadatayo no mataytayo?
[Salsaludsod]
