No Sadino ti Pagbirokan Kadagiti Sungbat
No Sadino ti Pagbirokan Kadagiti Sungbat
“Ti teoria ti agnanayon a panagsagaba ket maisupadi iti pammati nga adda ayat ti Dios kadagiti banag a naparsua. . . . Ti panamati iti agnanayon a pannakadusa ti kararua gapu kadagiti nagbasolanna iti sumagmamano a tawen, a di maikkan iti gundaway tapno mailinteg, ket saan a pulos a nainkalintegan.”—NIKHILANANDA, HINDU A PILOSOPO.
1, 2. Maigapu kadagiti nadumaduma a pammati maipapan iti Sumuno a biag, ania dagiti saludsod a tumaud?
KAS iti Hindu a pilosopo a ni Nikhilananda, adu itatta ti mariribukan iti sursuro nga agnanayon a panagtutuok. Umasping iti dayta, marigatan dagiti dadduma a mangtarus kadagiti kapanunotan a kas ti panangragpat iti Nirvana ken pannakikaykaysa iti Tao.
2 Kaskasdi, gapu iti ideya nga imortal ti kararua, dagiti relihion agpadpada iti Dumaya ken Lumaud nangpatanorda kadagiti makatikaw nga agbaliwbaliw a pammati maipapan iti Sumuno a biag. Posible kadi a maammuan ti kinapudno no aniat’ mapasamak kadatayo kalpasan ti ipapataytayo? Pudno kadi nga imortal ti kararua? Sadino ti pagbirokantay kadagiti sungbat?
Siensia ken Pilosopia
3. Masungbatan kadi ti siensia wenno nasientipikuan a wagas ti panagsukimat dagiti saludsod maipapan iti biag kalpasan ti ipapatay?
3 Masungbatan kadi ti siensia wenno nasientipikuan a wagas ti panagsukimat dagiti saludsod mainaig iti Sumuno a biag? Maibatay kadagiti nabiit pay a salaysay iti dandani ipapatay wenno kapadasan iti ‘ruar ti bagi,’ pinadas ti dadduma a managsirarak ti agpaliiw maipapan iti biag kalpasan ti ipapatay. Iti panangrepasona iti dadduma kadagiti salaysayda iti palawagna nga “Ipapatay kas Iseserrek iti Lawag?,” kinuna ti Katoliko a teologo a ni Hans Küng: “Dagiti kastoy a kapadasan dida paneknekan a posible nga adda biag kalpasan ti ipapatay: mapasamak laeng dagitoy kadagiti maudi a lima a minuto sakbay ti ipapatay ket saan nga iti agnanayon a biag kalpasan ti ipapatay.” Innayonna: “Ti isyu a posible nga adda biag kalpasan ti ipapatay ket nakapatpateg iti sibibiag a tao. Masapul nga adda sabali a pangbirokan iti sungbat no di masungbatan dayta ti medisina.”
4. Matulongannatay kadi ti pilosopia nga agbirok kadagiti sungbat babaen iti adu a posibilidad nga isingsingasing ti nadumaduma a relihion maipapan iti biag kalpasan ti ipapatay?
4 Ti ngay pilosopia? Matulongannatay kadi dayta nga agbirok kadagiti sungbat manipud kadagiti adu a posibilidad nga isingsingasing ti nadumaduma a relihion maipapan iti biag kalpasan ti ipapatay? Dagiti pilosopikal a panagsukisok ramanenna ti “panangpattapatta,” kuna ti maika-20 a siglo a pilosopo a Britano a ni Bertrand Russell. Ti pilosopia, sigun iti The World Book Encyclopedia, ket “maysa a kita ti panagsukimat—panangusig, panangtingiting, panangipaulog, ken panangpattapatta.” No maipapan iti tema a Sumuno a biag, dagiti pilosopikal a pattapatta ket nagduduma manipud panangtukoyda iti imortalidad kas ar-arapaap laeng agingga iti panangikunada a naisigud dayta kas kalintegan ti tunggal tao.
Naisangsangayan a Gubuayan Dagiti Sungbat
5. Ania ti kadadaanan pay laeng a libro a naisurat?
5 Nupay kasta, adda libro a naglaon kadagiti napudno a sungbat dagiti napapateg a saludsod maipapan iti biag ken ipapatay. Dayta ti kadadaanan pay laeng a libro a naisurat, a ti dadduma a pasetna nabukel iti agarup 3,500 a tawenen ti napalabas. Naisurat ti umuna a paset daytoy a libro sumagmamano a siglo sakbay a naputar dagiti kauunaan a himno ti kasuratan a Hindu, dagiti Veda, ken agarup sangaribu a tawen sakbay a nagbiag ditoy daga da Buddha, Mahāvīra, ken Confucius. Nakompleto daytoy a libro idi 98 K.P., nasurok a 500 a tawen sakbay nga imbangon ni Muḥammad ti Islam. Daytoy a naisangsangayan a gubuayan ti superior a sirib isu ti Biblia. *
6. Apay a manamnamatayo nga ibaga kadatayo ti Biblia no ania ti kararua?
6 Ti Biblia naglaon iti kauumisuan a nagkauna a historia a masarakan iti aniaman a libro itatta. Ti historia a nairekord iti Biblia sublianna ti punganay ti sangatauan ken ilawlawagna no kasanotayo a napaadda ditoy daga. Isublinatay pay iti kasakbayan ti pannakaparsua ti tattao. Ti kasta a libro pudno nga ikkannatay iti pannakaawat no kasano a naparsua ti tao ken no ania ti kararua.
7, 8. Apay a makapagtalektayo a masarakantay iti Biblia dagiti napudno ken makapnek a sungbat maipapan iti no aniat’ mapasamak no mataytayo?
7 Mainayon pay, ti Biblia ket libro a naglaon kadagiti padto nga eksakto ti pannakatungpalna. Kas pagarigan, impadtona iti adu a detalye ti itatanor ken pannakatnag dagiti imperio ti Medo-Persia ken Grecia. Umiso unay dagitoy a sasao ta uray la nga inkagumaan nga ipaneknek dagiti kritiko, nupay napaayda, a naisurat dagitoy kalpasan ti pannakapasamakda. (Daniel 8:1-7, 20-22) Dadduma a padto a nailanad iti Biblia detalyado a matungtungpalda iti mismo a panawentayo. *—Mateo, kapitulo 24; Marcos, kapitulo 13; Lucas, kapitulo 21; 2 Timoteo 3:1-5, 13.
8 Nupay kasanot’ kinasirib ti tao, awan makaipadto kadagiti masanguanan a pasamak a kasta ti kinaumisona. Ti laeng Namarsua a mannakabalin-amin ken kasisiriban iti uniberso ti makaaramid iti dayta. (2 Timoteo 3:16, 17; 2 Pedro 1:20, 21) Pudno a ti Biblia ket libro a naggapu iti Dios. Sigurado, dayta a libro maipaayannatayo kadagiti napudno ken makapnek a sungbat maipapan iti no aniat’ mapasamak kadatayo no mataytayo. Kitaentay nga umuna ti kunana maipapan iti kararua.
[Footnotes]
^ par. 5 Kitaenyo ti broshur a Libro Para iti Amin a Tao, nga impablaak ti Watchtower Bible and Tract Society of New York, Inc.
^ par. 7 Kitaenyo Ti Biblia—Saot’ Dios wenno iti Tao?, nga impablaak ti Watchtower Bible and Tract Society of New York, Inc.
[Salsaludsod]
[Ladawan iti panid 18]
Ti kadadaanan pay laeng a libro a naisurat
[Ladawan iti panid 18]
Ti libro a mangipaay kadagiti mapagtalkan ken makapnek a sungbat
