Agbiagkay nga Agnanayon iti Paraiso a Daga
Seksion 8
Agbiagkay nga Agnanayon iti Paraiso a Daga
1, 2. Anianto ti kita ti biag iti sidong ti turay ti Pagarian ti Dios?
1 Anianto ti kita ti biag inton ikkaten ti Dios ti kinakillo ken panagsagaba ditoy daga sananto iserrek ti baro a lubong iti sidong ti naayat a panangituray ti nailangitan a Pagarian? Inkari ti Dios a ‘luktanna ti imana ket penkenna ti tarigagay ti tunggal sibibiag a banag.’—Salmo 145:16.
2 Ania dagiti nainkalintegan a tarigagayyo? Saan kadi a para iti naragsak a biag, makapnek a trabaho, material a kinaruay, napintas nga aglawlaw, talna kadagiti amin nga il-ili, ken wayawaya iti kinadangkok, sakit, panagsagaba, ken ipapatay? Ket ania ngay maipapan iti naragsak a naespirituan a panangmatmat? Amin dagita matungpaldanto iti mabiiten iti sidong ti turay ti Pagarian ti Dios. Anagenyo ti kuna dagiti padto ti Biblia maipapan kadagiti nakaskasdaaw a bendision nga umayto iti dayta baro a lubong.
Ti Sangatauan Addaan Perpekto a Talna
3-6. Aniat’ mangipasigurado kadatayo a dagiti tattao addaandanto ti talna idiay baro a lubong?
3 “[Ti Dios] pasardengenna dagiti gubat inggana iti ungto ti daga. Rungrungduenna ti bai ket gupdenna a pirpirsayen ti gayang; dagiti karwahe [ti gubat] puoranna iti apuy.”—Salmo 46:9.
4 “Pitpitendanto dagiti kampilanda nga agbalin a dingding dagiti arado ket dagiti pikada nga agbalin a kumkumpay. Ti nasion dinanton itag-ay ti kampilanna a maibusor iti nasion, didanto metten adalen ti gubat uray kaano.”—Isaias 2:4.
5 “Dagiti naemma a mismo tagikuaendanto ti daga, ket talaga a maay-ayatandanto iti kinaruay ti talna.”—Salmo 37:11.
6 “Ti intero a daga naginanan, nawayawayaanen iti riribuk. Dagiti umili rimmagsakdan a buyogen dagiti narag-o nga ikkis.”—Isaias 14:7.
Ti Tao ken An-animal Agkappiada
7, 8. Anianto ti adda a talna iti nagbaetan dagiti tattao ken an-animal?
7 “Ti lobo makipagnaedto iti kordero, ket ti leopardo makikaiddanto iti urbon a kalding, ket ti urbon a baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida. Ket ti baka ken ti oso agarabdanto; dagiti urbonda agkakaiddadanto. Ket uray ti leon manganto ti garami a kas iti toro. Ket ti ubing nga agsuso sigurado nga agay-ayamto iti abut ti kobra; ket iti rukib ti nagita nga uleg ikautto ti kapuspusot nga ubing ti imana. Didanto mangranggas wenno mangdadael.”—Isaias 11:6-9.
8 “Maipaay kadakuada sigurado a mangaramidakto ti tulag iti dayta nga aldaw a nainaig kadagiti atap nga animal ti tay-ak ken kadagiti tumatayab iti langlangit ken kadagiti agkarkarayam a banag ti daga . . . Pagiddaekto ida a sitatalged.”—Oseas 2:18.
Perpekto a Salun-at, Agnanayon a Biag
9-14. Deskribirenyo ti kasasaad ti salun-at idiay baro a lubong.
9 “Iti dayta a tiempo dagiti mata dagiti bulsek maluktanto, ket dagiti mismo a lapayag dagidiay tuleng maluktanto. Iti dayta a tiempo daydiay pilay agkalay-atto a kas iti ugsa, ket ti dila daydiay umel agpukkawto a siraragsak.”—Isaias 35:5, 6.
10 “[Ti Dios] punasennanto ti tunggal lua kadagiti matada, ket awanton ni patay, awanto metten ti panagdung-aw wenno panagsangit wenno ut-ot.”—Apocalipsis 21:4.
11 “Awanto ti agtaeng nga agkuna: ‘Masakitak.’”—Isaias 33:24.
12 “Ti lasagna agbalin a nasalsalibukag ngem iti kinaagtutubo; agsublinto iti al-aldaw ti bileg ti kinaagtutubona.”—Job 33:25.
13 “Ti sagut nga ited ti Dios isu ti agnanayon a biag baeten ken Kristo Jesus nga Apotayo.”—Roma 6:23.
14 “Tungal maysa a mangalagad ti pammati kenkuana . . . maaddaan[to] ti agnanayon a biag.”—Juan 3:16.
Dagiti Natay Agbiagdanto
15-17. Aniat’ namnama dagidiay natayen?
15 “Addanto panagungar nga agpada ti nalinteg ken ti nakillo.”—Aramid 24:15.
16 “Ti oras um-umay nga amin dagidiay adda kadagiti pakalaglagipan a tanem [lagip ti Dios] mangngegdanto ti timekna ket rummuarda.”—Juan 5:28, 29.
17 “Ti baybay inyawatna dagiti natay nga adda kenkuana, ket ti patay ken ti Hades [ti tanem] inyawatda dagiti natay nga adda kadakuada.”—Apocalipsis 20:13.
Ti Daga, Paraiso ti Kinawadwad
18-22. Anianto ti pagbalinan ti intero a daga?
18 “Dagiti agarubos a tudo ti bendision mapaneknekanto nga adda. Ket ti kayo iti away masapul a mangtedto iti bungana, ket ti daga a mismo itednanto ti apitna, ket aktual a mapaneknekanto nga addada iti dagada a sitatalged.”—Ezequiel 34:26, 27.
19 “Ti daga a mismo sigurado nga itednanto ti bungana; ti Dios, a Diostayo, bendisionannatayto.”—Salmo 67:6.
20 “Ti let-ang ken ti disso nga awanan danum agragsakto, ket ti disierto a tanap agrag-onto ket agsabongto a kas iti safron.”—Isaias 35:1.
21 “Dagiti bantay ken turturod a mismo pumgaakdanto iti sanguananyo a buyogen iti narag-o nga ikkis, ket dagiti mismo a kaykayo iti away agpalakpakto dagiti imada. Imbes a ti siitan a kalunay tumubonto ti parua. Imbes a ti makasiit a kasumba tumubonto ti arayan.”—Isaias 55:12, 13.
22 “Makikaduakanto kaniak idiay Paraiso.”—Lucas 23:43.
Napintas a Balbalay Para iti Isuamin
23, 24. Aniat’ mangipasigurado kadatayo nga addanto umdas a napintas a balbalay para kadagiti isuamin?
23 “Isuda sigurado a bangonendanto dagiti balay ken agtaengdanto kadakuada . . . Didanto mangbangon ket sabali ti agnaed; didanto agmula ket sabali ti mangan. . . . Dagiti pinilik agragsakdanto iti mabayag iti aramid dagiti imada. Isuda didanto agtrabaho iti ubbaw, didanto agpasngay a maipaay iti didigra.”—Isaias 65:21-23.
24 “Talaga nga agtugawdanto, tunggal maysa iti sirok ti kaubasanna ken iti sirok ti kayona nga higos, ket awanto ti mangpakintayeg kadakuada.”—Mikias 4:4.
Mabalinyo ti Agbiag nga Agnanayon iti Paraiso
25. Ania a karkarna a panangmatmat ti adda kadatayo iti masanguanan?
25 Anian a karkarna a panangmatmat iti masanguanan! Anian a pudpudno nga addaan panggep a biag ti maadda itan no maitaklin iti solido a namnama nga inton baro a lubong ti Dios amin a problema itatta ket agnanayonton a napalabas! “Ti immuna a bambanag saanto a malagipen, saandanto metten a sumnek iti puso.” (Isaias 65:17) Ket anian a makaliwliwa a maammuan a ti biag ket agnanayonton: “[Ti Dios] talaga nga alimonennanto nga agnanayon ni patay.”—Isaias 25:8.
26. Aniat’ tulbek ti panagbiag nga agnanayon iti baro a lubong ti Dios?
26 Kayatyo kadi ti agbiagto nga agnanayon iti dayta Paraiso a baro a lubong nga asideg unayen? ‘Ania ti rumbeng nga aramidek tapno magun-odak ti parabur ti Dios inton manungpal toy lubong ket makalasatak agingga idiay baro a lubongna?’ maiyimtuodyo. Masapul nga aramidenyo ti impasimudaag ni Jesus sigun iti kararagna iti Dios: “Daytoy kaipapananna ti agnanayon a biag, ti panangalada iti pannakaammo kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.
27. Aniat’ masapul nga aramidenyo tapno makipasetkayo iti panggep ti Dios?
27 Gapuna, mangalakayo iti Biblia, ket pasingkedanyo ti nabasayo itoy a broshur. Birukenyo dagidiay mangad-adal ken mangisursuro kadagitoy a kinapudno ti Biblia. Suminakayo kadagiti managinsisingpet a relihion a mangisursuro ken mangar-aramid kadagiti banag a maikontra iti Biblia. Adalenyo no kasano a dakayo, agraman dagiti minilion pay a sabsabali nga agar-aramid itan iti pagayatan ti Dios, makiramankayo iti panggep ti Dios a dagiti tattao agbiagda nga agnanayon iti paraiso a daga. Ket ipapusoyo ti ideklara ti naipaltiing a Sao ti Dios maipapan iti asidegen a masanguanan: “Ti lubong aglablabasen ken kasta met ti tarigagayna, ngem ti agaramid iti pagayatan ti Dios agtalinaedto nga agnanayon.”—1 Juan 2:17.
[Salsaludsod]
[Ladawan iti panid 31]
Ti panggep ti Dios a mangisubli iti naindagaan a paraiso dandanin matungpal
