Seksion 5

Ti Biag Addaan Grande a Panggep

1, 2. Kasanotay a maibaga a maseknan ti Dios kadatayo, ket sadino ti pangalaantayo kadagiti sungbat dagiti saludsod iti biag?

¹ Ti wagas a pannakaaramid ti daga ken dagiti sibibiag a bambanag a linaonna ipakitana a ti Namarsuada ket Dios ti ayat a talaga a maseknan. Ket ti Biblia, a Saona, ipakitana a maseknan; itdenna dagiti kasayaatan a sungbat kadagiti saludsod nga: Apay addatayo ditoy daga? ken, Sadinot’ papanantayo?

² Masapul a sukimatentayo ti Biblia para kadagita a sungbat. Kunat’ Sao ti Dios: “No isut’ sapulenyo, ipalubosnanto ti bagina a masarakanyo, ngem no isu ti panawanyo panawannakayto.” (2 Cronicas 15:2) Ngarud, ti panangsukimattay iti Sao ti Dios ipalgakna ti ania maipapan iti panggepna kadatayo?

No Apay Pinarsua ti Dios Dagiti Tattao

3. Apay a pinarsua ti Dios ti daga?

³ Ipakita ti Biblia a ti Dios insaganana ti daga a sipapanunot a nangnangruna kadagiti tattao. Kuna ti Isaias 45:18 maipapan iti daga a ti Dios “dina pinarsua dayta nga awan mamaayna [no di ket] binukelna dayta tapno mapagnaedan.” Ket inikkanna ti daga kadagiti amin a kasapulan dagiti tattao, saan la a basta agbiagda, no di ket tapno tagiragsakenda a naan-anay ti biag.—Genesis, kapitulo 1 ken 2.

4. Apay a pinarsua ti Dios dagiti immuna a tattao?

⁴ Sigun iti Saona, ti Dios ibagana a pinarsuana dagiti immuna a tattao, da Adan ken Eva, sana impalgak no aniat’ adda iti panunotna para iti natauan a pamilia. Kinunana: “Aramidenta ti tao sigun iti ladawanta, mayalubog iti kakikitata, ket maaddaanda koma iti panangituray kadagiti ikan ti baybay ken dagiti tumatayab a parsua ti langlangit ken dagiti naamo nga animal ken ti amin a daga ken tunggal aggaraw nga animal nga aggargaraw iti rabaw ti daga.” (Genesis 1:26) Dagiti tattao annongenda koma nga imatonan ti “amin a daga” ken dagiti animal a parsua a linaonna.

5. Adinot’ nangikabilanna kadagiti immuna a tattao?

⁵ Ti Dios nangaramid ti nalawa, kasla parke a hardin iti lugar a naawagan Eden, masarakan idiay Makintengnga a Daya. Idi agangay “inrugina nga innala ti tao ket insaadna iti minuyongan ti Eden tapno talonenna ken aywananna.” Paraiso daydi a naglaon kadagiti amin a kasapulan ti tao a kanen. Ket inramanna ti “tunggal kayo a makaay-ayo iti panagkita ti maysa ken naimbag a kanen,” agraman dadduma a mulmula ken dagiti adu a makapainteres a kita dagiti animal.—Genesis 2:7-9, 15.

6. Naparsua dagiti immuna a tattao nga addaan kadagiti ania a mental ken pisikal a galad?

⁶ Ti bagi dagiti immuna a tattao naparsuada a perpekto, tapno dida agsakit, lumakay, wenno matay. Nasagutanda pay kadagiti dadduma a kalidad, kas iti wayawaya a panagpili. Ti wagas a nakaaramidanda isut’ nailawlawag iti Genesis 1:27: “Ti Dios inrugina a parsuaen ti tao iti ladawanna, iti ladawan ti Dios pinarsuana; lalaki ken babai pinarsuana ida.” Yantangay naparsuatayo sigun iti ladawan ti Dios, saan laeng a dagiti pisikal ken mental a galad ti naited kadatayo no di ket addaantay kadagiti moral ken espiritual nga aspeto, ket masapul a mapennek dagitoy tapno talaga a naragsaktayo. Adda ipaay ti Dios a pamuspusan tapno mapennek dagita a kasapulan agraman kasapulan a taraon, danum, ken angin. Kas kinuna ni Jesu-Kristo, “ti tao agbiag, saan nga iti tinapay laeng, no di ket iti tunggal sao a rummuar iti ngiwat ni Jehova.”—Mateo 4:4.

7. Aniat’ naited a bilin iti immuna a paris?

⁷ Maysa pay, inikkan ti Dios ti immuna a paris ti nakaskasdaaw a bilin idi addada idiay Eden: “Agbungakayo ket agadukayo ket punnuenyo ti daga.” (Genesis 1:28) No kasta mabalinda  ti agpaadu ken agpasngay kadagiti perpekto nga annak. Ket bayat nga umadu ti natauan a populasion, maaddaanda iti nakaay-ayat a trabaho a mangpalawa kadagiti beddeng ti orihinal a kasla parke, paraiso a lugar ti Eden. Pagultimuanna, ti intero a daga agbalinto a paraiso, a pagtaengan dagiti perpekto, naragsak a tattao a mabalin nga agbiag nga agnanayon. Ipakaammo ti Biblia kadatayo a kalpasan nga inyusuatna amin dagitoy, “Ti Dios nakitana amin nga inaramidna ket, adtoy! nasayaatda unay.”—Genesis 1:31.

8. Kasano koma a tamingen dagiti tattao ti daga?

⁸ Nabatad a dagiti tattao nairanta nga usarenda ti napapintas a daga a paglainganda. Ngem masapul nga aramidenda dayta iti responsable a wagas. Dagiti tattao siraraemda koma nga agbalin a mayordomo ti daga, saanda ket a perdien dayta. Ti pannakadadael ti daga a maim-imatangantay ita ket maikontra iti pagayatan ti Dios, ket dagidiay makiramraman iti dayta konkontraenda ti panggep ti biag ditoy daga. Madusadanto gapu iti dayta, ta kunaen ti Biblia a ti Dios “iyegnanto ti pannakadadael dagidiay mangdaddadael iti daga.”—Apocalipsis 11:18.

Panggep Pay La ti Dios

9. Apay nga agtalektayo a matungpalto ti panggep ti Dios?

⁹ No kasta, nanipud punganay panggep ti Dios nga agtaeng ti perpekto a natauan a pamilia ditoy daga nga agnanayon iti paraiso. Ket isu pay laeng ti panggepna! Di bumurong, matungpalto dayta a panggep. Kuna ti Biblia: “Ni Jehova ti buybuyot insapatana, a kunana: ‘Sigurado unay a no kasano a pinanunotko, kastanto ti mapasamak; ket no kasano nga imbalakadko, kastanto ti pumudno.’” “Agpapan pay insaokon dayta; yegkonto met dayta. Binukelko dayta, aramidekto met dayta.”—Isaias 14:24; 46:11.

10, 11. Kasano a nadakawat da Jesus, Pedro, ken ni salmista a David ti Paraiso?

¹⁰ Nadakawat ni Jesu-Kristo maipapan iti panggep ti Dios a mangisubli iti paraiso ditoy daga idi imbagana iti maysa a lalaki a nagtarigagay iti namnama iti masanguanan: “Makikaduakanto kaniak idiay Paraiso.” (Lucas 23:43) Nadakawat met ni apostol Pedro ti um-umay  a baro a lubong idi impadtona: “Adda dagiti baro a langlangit [baro nga urnos ti gobierno nga agturay manipud langit] ken maysa a baro a daga [baro a naindagaan a sosiedad] nga ur-urayentayo sigun iti kari [ti Dios], ket kadagitoy agtaeng ti kinalinteg.”—2 Pedro 3:13.

¹¹ Nagsurat met ni salmista a David maipapan iti um-umay a baro a lubong ken no kasanonto ti kapaut dayta. Impadtona: “Dagiti nalinteg a mismo tagikuaendanto ti daga, ket agnaeddanto nga agnanayon iti rabawna.” (Salmo 37:29) Dayta ti gapu nga inkari ni Jesus: “Naragsak dagidiay naalumamay ti rikriknada, ta tawidendanto ti daga.”—Mateo 5:5.

12, 13. Gupgopenyo ti grande a panggep ti Dios para iti sangatauan.

¹² Anian a grande a namnama dayta, agbiag nga agnanayon iti paraiso a daga nga awanan kadagiti amin a kinadakes, krimen, sakit, ladingit, ken rigat! Sigun iti maudi a libro ti Biblia, gupgopen ti propetiko a Sao ti Dios daytoy grande a panggep babaen ti panangideklarana: “[Ti Dios] punasennanto ti tunggal lua kadagiti matada, ket awanton ni patay, awanto metten ti panagdung-aw wenno panagsangit wenno ut-ot. Dagiti immuna a banag napalabasdan.” Inayonna: “Ket Daydiay situtugaw iti tronona kinunana: ‘Adtoy! Pagbalbalinek dagiti amin a banag a baro.’ Kasta met, kunaenna: ‘Isuratmo, ta dagitoy a sao matalek ken napudnoda.’”—Apocalipsis 21:4, 5.

¹³ Wen, ti Dios adda grande a panggep iti isipna. Isunto dayta ti baro a lubong ti kinalinteg, agnanayon a paraiso, nga impadto Daydiay makabael ken makatungpalto kadagiti karina, ta dagiti “sao[na] matalek ken napudnoda.”

[Salsaludsod]

[Dagiti Ladawan iti panid 20, 21]

Pinanggep ti Dios nga agbiag nga agnanayon dagiti tattao iti paraiso a daga. Isu pay la dayta ti panggepna

[Ladawan iti panid 22]

Ti makinkukua dusaennanto dagiti agnaed a mangdaddadael iti balayna