Ti Panggep ti Dios Dandanin Matungpal
Seksion 7
Ti Panggep ti Dios Dandanin Matungpal
1, 2. Apay a masiguradotayo nga agtignayto ti Dios tapno panungpalenna ti kinadakes ken panagsagaba?
1 Nupay impalubos ti Dios ti kinaimperpekto ken panagsagaba iti naunday a tiempo no iti panangmatmat ti tao, dinanto ipalubos dagiti dakes a kasasaad nga agtultuloy nga awan inggana. Ibaga ti Biblia kadatayo nga adda espesipiko a tiempo a panangipalubos ti Dios a mapasamak dagitoy.
2 “Maipaay iti isuamin a banag adda naituding a tiempo.” (Eclesiastes 3:1) Inton agngudo ti naipawayway a tiempo ti Dios a pannakaipalubos ti kinadakes ken panagsagaba, iti kasta makiballaetton kadagiti ganuat ti tao. Iyegnanton ti panungpalan ti kinadakes ken panagsagaba ket tungpalennanto ti orihinal a panggepna a mangpunno iti daga iti perpekto, naragsak a natauan a pamilia a sagsagrapenda ti naan-anay a talna ken ekonomiko a kinatalged iti tengnga dagiti Paraiso a kasasaad.
Dagiti Panangukom ti Dios
3, 4. Kasanot’ panangdeskribir ti libro ti Proverbio kadagiti resulta ti ibaballaet ti Dios?
3 Anagenyo ti sumagmamano kadagiti adu a padto ti Biblia a mangibaga ti kaipapanan ti ibaballaet ti Dios, kayatna a sawen, dagiti resulta dagiti panangukomna agpaay iti natauan a pamilia:
4 “Ti napalungdo isudanto dagidiay agtaeng iti daga, ket dagiti awanan tulaw isudanto dagidiay agtalinaed kenkuana. No maipapan kadagiti nadangkes, magessatdanto manipud iti mismo a daga; ket no maipapan kadagiti nagulib, maparutdanto kenkuana.”—Proverbio 2:21, 22.
5, 6. Kasanot’ panangipakita ti Salmo 37 ti mapasamak inton bumallaet ti Dios?
5 “Dagiti agaramid iti dakes magessatdanto, ngem dagidiay manginanama ken Jehova isudanto dagidiay mangtagikua iti daga. Ket iti bassit laengen a darikmat, ket daydiay nadangkes awanton . . . Ngem dagidiay naemma a mismo tagikuaendanto ti daga, ket talaga a maay-ayatandanto iti kinaruay ti talna.”—Salmo 37:9-11.
6 “Manginanamaka ken Jehova ket salimetmetam ti dalanna, ket itan-oknakanto a mangtagikua iti daga. Inton magessat dagidiay nadangkes, makitamto. Mingmingam ti awanan tulaw ket matmatam daydiay napalungdo, ta ti masanguanan dayta a tao natalnanto. Ngem dagiti managlabsing a mismo sigurado a matalipuposdanto nga agkakadua; ti masanguanan dagiti managdakdakes talaga a magessatto.”—Salmo 37:34, 37, 38.
7. Ania a nabileg a balakad ti ited ti Sao ti Dios kadatayo?
7 No kasta, gapu iti karkarna a masanguanan a tawidento dagidiay mangbigbig iti kalintegan ti mannakabalin-amin a Namarsua a mangituray kadatayo, naidagadag kadatayo: “Dagiti bilinko salimetmetam koma dita pusom, ta inayondanto kenka ti kaatiddog dagiti aldaw ken tawtawen ti panagbiag ken talna.” Kinapudnona, ti biag nga agnanayon mainayonto kadagidiay kaykayatda nga aramiden ti pagayatan ti Dios! Gapuna, ibalakad ti Sao ti Dios: “Agtalekka ken Jehova iti amin a pusom ket dika agtaklin iti bukodmo a pannakaawat. Kadagiti amin a dalanmo isu ti bigbigem, ket isu a mismo palintegennanto dagiti desdesmo.”—Proverbio 3:1, 2, 5, 6.
Turay ti Dios Manipud Langit
8, 9. Aniantot’ usaren ti Dios a pangdalus itoy daga?
8 Ti Dios itungpalnanto daytoy a pannakadalus ti daga babaen iti panangusarna iti kasayaatan a gobierno a magun-odan ti tao. Gobierno dayta a mangiparangarang iti nailangitan a sirib ngamin agturay dayta manipud langit iti sidong ti panangiwanwan ti Dios. Ket dayta a nailangitan a Pagarian ikkatennanto amin a porma ti natauan a turay ditoy daga. Dinton pulos maikkan ti gundaway dagiti tattao a mangituray nga agwaywayas iti Dios.
9 Maipapan itoy imbaga ti padto ti Daniel 2:44: “Iti al-aldaw dagita nga ar-ari [dagiti agdama a gobierno] ti Dios ti langit mangipasdekto ti maysa a pagarian [sadi langit] a dinto pulos madadael. Ket ti pagarian a mismo saanto a maiyawat iti sabali nga ili [dagiti tattao didanto pulos mapalubosan nga agturay nga agwaywayasda iti Dios]. Burakburaken ken pagpatinggaennanto amin dagitoy a pagpagarian [nga adda ita], ket isunto a mismo ti agtakder agingga kadagiti tiempo a di nakedngan.”—Kitaenyo pay ti Apocalipsis 19:11-21; 20:4-6.
10. Apay a masiertotayo nga iti sidong ti nailangitan a Pagarian ti Dios, awanton a pulos ti panagdakes ti turay?
10 Gapuna, ti sangatauan dinto pulos maaddaanen kadagiti nakillo a porma ti turay, ta kalpasan a pagpatinggaen ti Dios daytoy a sistema, awanton a pulos ti natauan a turay nga agwaywayas kenkuana. Ket ti Pagarian nga agturay manipud langit saanto nga agkillo, yantangay Dios ti Nangipunganay ken Nangitalimeng. Imbes ketdi, agandarto para iti kasayaatan a paginteresan dagiti tattao nga iturayanna. Ti pagayatanto ti Dios ngarud ti maaramid iti intero a daga a kas idiay langit. Dayta ti gapu nga insuro ni Jesus dagiti adalanna nga ikararagda iti Dios: “Umay koma ti pagariam. Maaramid koma ti pagayatam, no kasano sadi langit, kasta met ditoy daga.”—Mateo 6:10.
Kasanot’ Kaasidegtayon?
11. Adino ditoy Biblia ti pakasarakantayo kadagiti padto a mangtulong kadatayo a mangikeddeng ti kinaasideg ti panungpalan daytoy a sistema?
11 Kasanot’ kaasidegtayon iti panungpalan daytoy di makapnek a sistema ti bambanag ken ti panangrugi ti baro a lubong ti Dios? Ti padto ti Biblia sibabatad nga itedna kadatayo ti sungbat. Kas pangarigan, impadto a mismo ni Jesus ti intay seggaan tapno maikeddengtayo ti sasaadentayo, kas iti insao ti Biblia a mainaig iti “panagngudo ti sistema ti bambanag.” Nairekord daytoy iti Mateo kapitulo 24 ken 25, Marcos 13, ken Lucas 21. Kasta met, kas nailanad idiay 2 Timoteo kapitulo 3, impadto ni apostol Pablo nga addanto tiempo a maawagan “ti maudi nga al-aldaw” a dagiti nagduduma a pasamak ad-addanto pay a mangpasingked no adinot’ ayantayo sigun iti ayus ti tiempo.
12, 13. Aniat’ sinao da Jesus ken Pablo no maipapan iti tiempo ti panungpalan?
12 Kinuna ni Jesus a daytoy a tiempo ket mangruginto kadagitoy a pasamak: “Ti nasion tumakderto a maibusor iti nasion ket ti pagarian a maibusor iti pagarian, ket addanto panagkirang ti taraon ken dagiti ginggined iti nadumaduma a lugar.” (Mateo 24:7) Ipakita ti Lucas 21:11 a dinakamatna pay nga “addanto ti angol iti nadumaduma a lugar.” Ken impakdaarna, met, “ti yaadu ti kinakillo.”—Mateo 24:12.
13 Impadto ni apostol Pablo: “Ngem ammuem daytoy, nga iti maudi nga al-aldaw addanto ditoy dagiti narigat a tiempo a pakilangenan. Ta dagiti tattao managayatdanto iti bagbagida, managayatda iti kuarta, managpasindayaw, napalangguad, managtabbaaw, nasukir kadagiti dadakkelda, awan panagyamanda, nagulib, awananda ti ayat a nakayanakan, narigatda a katultulag, manangpardaya, awanan iti panagteppel, nauyong, awananda iti ayat ti kinaimbag, manangliliput, nasubeg, natangsit, managayatda iti ragragsak imbes a managayatda iti Dios, addaanda ti langa ti nadiosan a debosion ngem libakenda ti pannakabalin dayta . . . Dagiti nadangkes a tattao ken manglimlimo dumakesdanto la a dumakes, a mangyaw-awanda ken maiyaw-awanda.”—2 Timoteo 3:1-5, 13.
14, 15. Kasano a dagiti pasamak itoy maika-20 siglo pasingkedanda a talaga nga addatayon iti maudi nga al-aldaw?
14 Natungpal kadin dagita a bambanag nga impadto da Jesus ken Pablo itoy tiempotayo? Wen, sigurado a kasta. Ti Gubat Sangalubongan I isut’ kakaruan a gubat agingga idi a tiempo. Isut’ immuna a sangalubongan a gubat ket isut’ kanito a nagbaliwan ti moderno a historia. Naikanunong iti dayta a gubat ti kinakirang ti taraon, panagraira ti sakit, ken dagiti dadduma a kalamidad. Dagita a pasamak nanipud 1914 agingga ita, kas imbaga ni Jesus, isuda “ti punganay ti saem ti rigat.” (Mateo 24:8) Rinugianda ti naipadto a tiempo a naawagan “ti maudi nga al-aldaw,” ti nangrugian ti maudin a kaputotan a panangipalubos ti Dios ti kinadakes ken panagsagaba.
15 Nalabit kabisadoyo dagiti napasamak iti maika-20 a siglo. Ammoyo ti rimsua a riribuk. Agarup 100 milion a tattao ti natay kadagiti gubat. Ginasut a milion pay a sabsabali dagiti natay iti bisin ken sakit. Di mabilang dagiti pinatay dagiti ginggined. Kumarkaro ti dida panangikabilangan iti biag ken sanikua. Ti panagbuteng iti krimen nagbalinen a paset ti inaldaw a biag. Dagiti moral nga estandarte naipadisidan. Ti yaadu ti populasion namartuat kadagiti problema a dida marisut. Ti polusion perdienna ti kalidad ti biag ken pagpegpeggadenna pay ketdi. Talaga, addatayon iti maudi nga al-aldaw nanipud 1914 ket umas-asidegtayon iti panagpatingga dagiti padto ti Biblia iti tiempotayo.
16. Kasanot’ kaunday ti tiempo a saklawen ti maudi nga al-aldaw?
16 Kasanot’ kapautto daytoy maudi nga al-aldaw? Kinuna ni Jesus maipapan iti panawen a makapasar iti “punganay ti saem ti rigat” nanipud 1914 agingga ita: “Daytoy a kaputotan dinto pulos a lumabas agingga a maaramid amin dagitoy a bambanag.” (Mateo 24:8, 34-36) Gapuna, amin dagiti paset ti maudi nga al-aldaw masapul a maangayda iti las-ud ti panagbiag ti maysa a kaputotan, ti kaputotan ti 1914. Gapuna dadduma kadagidiay sibibiag idi 1914 ti sibibiagto pay inton manungpal daytoy a sistema. Dayta a kaputotan dagiti tattao lallakayda unayen, a mangipasimudaag nga awan unayen ti adu a tiempo a nabati sakbay nga iyeg ti Dios ti panungpalan daytoy agdama a sistema ti bambanag.
17, 18. Ania a padto ti mangipakita a nakaas-asidegtayon iti panungpalan?
17 Sabali pay a padto a mangipakita nga asideg unayen ti panungpalan daytoy sistema ti bambanag isut’ inted ni apostol Pablo, a nangipadto: “Ti aldaw ni Jehova um-umay nga apaghushusto a kas iti mannanakaw iti rabii. Inton sasawenda: ‘Talna ken talged!’ iti kasta ti kellaat a pannakadadael ti giddato nga umapayto kadakuada . . . , ket didanto pulos makalisi.”—1 Tesalonica 5:2, 3; kitaenyo pay ti Lucas 21:34, 35.
18 Itatta, nalpasen ti Cold War, ket ti internasional a gubat nalabit saanen a nakaro a pagam-amkan. Isu a dagiti nasion mabalin nga ipapanda nga asidegda unayen iti maysa a baro a lubong nga urnos. Ngem inton impagarupda nga agbalballigin ti ganuatda, agbanagto a kasupadi ti impapanda, yantangay daytanto ti maudin a senial a dumtengen ti panangdadael ti Dios iti daytoy a sistema. Laglagipenyo, dagiti napolitikaan a negosasion ken tratado saanda nga ibungbunga ti pudno a panagbalbaliw dagiti tao. Dida maisuro kadagiti tao nga ayatenda ti maysa ken maysa. Ket dagiti lider toy lubong dida mapasardeng ti krimen, ket dida met maikkat ti sakit ken ipapatay. Isu a diyo talken ti aniaman nga itatanor ti natauan a talna ken talged a kunam no daytoy a lubong ket agturturongen iti pannakarisut dagiti problemana. (Salmo 146:3) Ti talaganto a kaipapanan ti kasta a pukkaw a ta daytoy a lubong asideg unayen iti panungpalanna.
Pannakaikasabat’ Naimbag a Damag
19, 20. Ania a padto maipapan iti panangasaba iti daytoy maudi nga al-aldaw ti makitkitatayon a matungtungpal?
19 Sabali pay a padto a mangipakita nga addatayon iti maudi nga al-aldaw nanipud 1914 isu daydiay inted ni Jesus: “Iti isuamin a nasion ti naimbag a damag maikasabanto nga umuna.” (Marcos 13:10) Wenno kas panangiyulog ti Mateo 24:14: “Daytoy naimbag a damag ti pagarian maikasabanto iti isuamin a mapagnaedan a daga a maipaay a pammaneknek kadagiti amin a nasion; ket iti kasta umayton ti panungpalan.”
20 Itatta, damo unay iti historia, a ti naimbag a damag ti panungpalan daytoy a lubong ken ti um-umay a Paraiso a baro a lubong iti sidong ti Pagarian ti Dios ket maikaskasaba iti amin a daga. Babaen kadagiti asino? Babaen kadagiti minilion a Saksi ni Jehova. Mangaskasabadan iti amin a pagilian ditoy daga.
21, 22. Ania, nangnangruna, ti pakailasinan kadagiti Saksi ni Jehova kas pudno a Kristiano?
21 Mainayon iti panangikasabada iti Pagarian ti Dios, dagiti Saksi ni Jehova agtigtignayda iti wagas a pakailasinan kadakuada kas pudpudno a pasurot ni Kristo, ta indeklarana: “Gapu itoy maammuandanto a dakayo dagiti adalak, no adda ayatyo iti maysa ken maysa.” Gapuna, dagiti Saksi ni Jehova nagkaykaysada iti sangalubongan a panagkakabsat gapu iti di magsat a singgalut ti ayat.—Juan 13:35; kitaenyo pay ti Isaias 2:2-4; Colosas 3:14; Juan 15:12-14; 1 Juan 3:10-12; 4:20, 21; Apocalipsis 7:9, 10.
22 Dagiti Saksi ni Jehova mamati ken alagadenda ti kuna ti Biblia: “Ti Dios saan a mangidumduma, ngem iti tunggal nasion ti tao nga agbuteng kenkuana ken agaramid iti kinalinteg awatenna.” (Aramid 10:34, 35) Matmatanda dagiti padada a Saksi kadagiti isuamin a pagilian kas naespirituan a kakabsatda, uray pay aniat’ rasa wenno kolorda. (Mateo 23:8) Ket gapu ta adda kasta a sangalubongan a panagkakabsat ditoy lubong itatta mangnayon dayta nga ebidensia a ti panggep ti Dios ket dandanin matungpal.
[Salsaludsod]
[Ladawan iti panid 26]
Ti perpekto a nailangitan a Pagarian ti Dios isunto laengen ti agturay iti sangatauan idiay baro a lubong
