LEKSION 09
Umasidegka iti Dios Babaen ti Kararag
Mariknam kadi a kasapulan nga adda mangidalan kenka? Adda kadi dagiti importante a saludsodmo a kayatmo a masungbatan? Kayatmo kadi a lumag-an ti riknam wenno pumigsa ti pammatim? Kayatmo kadi a marikna a nadekdekketka ken Jehova? Makatulong ti kararag tapno mapasamak dagita. Ngem kasano ti husto a panagkararag? Dengdenggen kadi ti Dios ti amin a kararag? Ania ti aramidem tapno masiguradom a denggenna dagiti kararagmo? Kitaenta.
1. Asino ti pagkararagantayo, ken ania dagiti mabalintayo nga ikararag?
Imbaga ni Jesus a ti laeng Amatayo idiay langit ti masapul a pagkararagantayo. Uray ni Jesus ket nagkararag ken Jehova. Imbagana: “Kastoy ngarud ti panagkararagyo: ‘Amami nga adda iti langit . . . ’” (Mateo 6:9) No agkararagtayo ken Jehova, lumagda ti pannakigayyemtayo kenkuana.
Mabalintayo nga ikararag ti uray ania a banag. Siempre, tapno sungbatan ti Dios dagiti kararagtayo, masapul a saan a maikontra dagita iti pagayatanna. “Uray ania ti dawatentayo maitunos iti pagayatan [ti Dios], denggennatayo.” (1 Juan 5:14) Nangibaga ni Jesus kadagiti banag a mabalintayo nga ikararag. (Basaen ti Mateo 6:9-13.) Saan laeng a dagiti personal a pakaseknan wenno pakadanagantayo ti ikararagtayo. Ditay met liplipatan ti agyaman iti Dios kadagiti amin nga inaramidna para kadatayo, ken ikararagtayo met a tulonganna ti dadduma.
2. Kasano koma ti panagkararagtayo?
Iyaw-awis ti Biblia nga ‘iyebkastayo [iti Dios] dagiti linaon ti pusotayo.’ (Salmo 62:8) Isu a masapul a naggapu iti puso dagiti kararagtayo. Mabalintayo ti agkararag iti napigsa wenno iti naulimek ken iti aniaman a nadayaw a posision. Mabalintayo ti agkararag iti aniaman nga oras ken lugar.
3. Kasano a sungsungbatan ti Dios dagiti kararagtayo?
Sungsungbatanna dagita iti adu a pamay-an. Inted ni Jehova ti Saona, ti Biblia, a pakasarakantayo kadagiti sungbat dagiti saludsodtayo. Ti panagbasa iti Sao ti Dios “pagsiribenna daydiay awan kapadasanna.” (Salmo 19:7; basaen ti Santiago 1:5.) Maikkannatayo ti Dios iti talna ti panunot no adda problematayo. Ken mabalinna nga usaren dagiti agserserbi kenkuana tapno tulongandatayo no kasapulantayo ti tulong.
AMMUEM TI AD-ADU PAY
Kitaem no kasanoka nga agkararag a makaay-ayo iti Dios, ken ammuem no ania ti maitulong kenka ti kararag.
4. Dagiti kayat ti Dios no agkararagtayo
Kasanotayo a maibaga no dagiti kararagtayo ket awaten ti Dios wenno saan? I-play ti VIDEO.
Kayat ni Jehova nga agkararagtayo kenkuana. Basaen ti Salmo 65:2, sa pagsaritaan dagitoy a saludsod:
-
Panagkunam, kayat kadi ti “Managdengngeg iti kararag” nga agkararagka kenkuana? Apay, wenno apay a saan?
Masapul nga agporsegitayo a mangsurot kadagiti paglintegan ti Dios no kayattayo a denggenna dagiti kararagtayo. Basaen ti Mikias 3:4 ken 1 Pedro 3:12, sa pagsaritaan daytoy a saludsod:
-
Kasanotayo a masigurado a denggen ni Jehova dagiti kararagtayo?
No adda gubat, agpada nga agkararag ti dua a grupo tapno mangabakda. Panagkunam, adda ngata sungbatan ti Dios kadakuada?
5. Aggapu koma iti puso dagiti kararagtayo
Naisuro iti dadduma nga ulit-ulitenda dagiti inkabesada a kararag. Ngem kasta kadi ti kayat ti Dios a panagkararagtayo? Basaen ti Mateo 6:7, sa pagsaritaan daytoy a saludsod:
-
Ania ti aramidem tapno saanmo nga “ulit-uliten ti isu met laeng a sasao” iti kararagmo?
Kada aldaw, mangpanunotka iti maysa nga espesipiko a bendision a naawatmo sa pagyamanam ni Jehova iti dayta. Aramidem dayta iti inaldaw iti maysa a lawas ket makitamto a piton nga agduduma a banag ti naikararagmo a saanmo nga inulit-ulit.
6. Ti kararag ket regalo ti Dios
Kasano a makatulong ti kararag lalo no narigat ti situasiontayo? I-play ti VIDEO.
Ikarkari ti Biblia a makatulong ti kararag tapno maaddaantayo iti pudpudno a natalna a panunot. Basaen ti Filipos 4:6, 7, sa pagsaritaan dagitoy a saludsod:
-
Nupay saan a kanayon a mapukaw dagiti problematayo no agkararagtayo, kasano a makatulong dayta?
-
Ania dagiti kayatmo nga ikararag?
Ammom kadi?
Ti sao nga “amen” kaipapananna ti “sapay koma” wenno “sigurado.” Idi pay panawen ti Biblia a maibagbaga ti sao nga “amen” kalpasan dagiti kararag.—1 Cronicas 16:36.
7. Ikkam iti oras ti panagkararag
No dadduma, gapu iti kinaadu ti trabahotayo, malipatantayo ti agkararag. Kasano kaimportante ken Jesus ti panagkararag? Basaen ti Mateo 14:23 ken Marcos 1:35, sa pagsaritaan dagitoy a saludsod:
-
Ania ti inaramid ni Jesus tapno adda gundawayna nga agkararag?
-
Kaano nga adda orasmo nga agkararag?
KUNA TI DADDUMA: “Saysayang laeng ti orasmo nga agkararag; awan met ti dumdumngeg.”
-
Ania ti isungbatmo no adda ti mangibaga iti kasta kenka?
SUMARIO
No aggapu iti puso dagiti kararagtayo, agbalintayo a nadekdekket iti Dios. Maaddaantayo iti natalna a panunot ken pigsa a mangaramid iti pagayatan ni Jehova.
Rebiu
-
Asino ti pagkararagantayo?
-
Kasanotayo nga agkararag?
-
Ania ti maitulong ti kararag?
AGDISKOBREKA PAY
Kitaem ti sungbat dagiti gagangay a saludsod maipapan iti kararag.
“Pito a Banag a Nasken a Maammuam Maipapan iti Kararag” (Ti Pagwanawanan, Oktubre 1, 2010)
Ammuem dagiti importante a rason no apay nga agkararagka ken no kasanom a mapasayaat dagiti kararagmo.
Kitaem no ania ti isursuro ti Biblia no asino ti masapul a pagkararagantayo.
“Rumbeng Kadi nga Agkararagak Kadagiti Santo?” (Artikulo iti website)
Iti daytoy a music video, kitaem no importante met laeng no sadino ti ayantayo wenno kaano nga agkararagtayo.