LEKSION 38
Ipategmo ti Regalo a Biag
Nakaragragsak ti agbiag. Uray adda dagiti problematayo, adda latta dagiti banag a pakaragsakantayo. Kasanotayo a maipakita nga ipatpategtayo ti regalo a biag? Ken ania ti kapatgan a rason nga aramidentayo dayta?
1. Apay a masapul nga ipategtayo ti biag?
Masapul nga ipategtayo ti biag ta regalo dayta ti naayat nga Amatayo, ni Jehova. Isu “ti ubbog ti biag”—pinarsuana ti amin a biag. (Salmo 36:9) “Isu ti mangipapaay iti biag ken anges ken amin a banag iti amin a tattao.” (Aramid 17:25, 28) Ipapaay ni Jehova ti amin a kasapulantayo tapno agtultuloytayo nga agbiag. Ngem saan la a dayta. Nakaad-adu ken agduduma ti nagsasayaat nga ipapaayna tapno ma-enjoy-tayo ti biag.—Basaen ti Aramid 14:17.
2. Kasanotayo a maipakita ken Jehova nga ipatpategtayo ti regalo a biag?
Iyin-inawnaka pay laeng ni nanangmo, ipatpategnakan ni Jehova. Iti maysa a kararag nga impaisurat ni Jehova iti Saona, imbaga ni David: “Nakitanak uray idi maysaak pay laeng a sikog.” (Salmo 139:16) Nakapatpateg ken Jehova ti biagmo. (Basaen ti Mateo 10:29-31.) Masaktan unay ni Jehova no igagara ti maysa a pagpatinggaen ti biag ti sabali, wenno uray ti mismo a biagna. a (Exodo 20:13) Masaktan met ni Jehova no isarsaraktayo ti biagtayo ken agpeligro ti biag ti dadduma gapu ta saantayo a naannad. No ipategtayo ti biagtayo ken ti biag ti dadduma, ipakpakitatayo a napateg kadatayo ti nagsayaat a regalo a biag.
AMMUEM TI AD-ADU PAY
Kitaem dagiti mabalinmo nga aramiden tapno maipakitam nga ipatpategmo ti regalo a biag.
3. Aywanam ti salun-atmo
Gapu ta inkaritayo ken Jehova a kanayon nga aramidentayo ti pagayatanna, us-usarentayo ti intero a biagtayo nga agserbi kenkuana. Arigna it-itedtayo ti bagitayo kas daton iti Dios. Basaen ti Roma 12:1, 2, sa pagsaritaan dagitoy a saludsod:
-
Ania ti kapatgan a rason nga aywanam ti salun-atmo?
-
Ania ti dadduma a pamay-an a maaramidmo dayta?
4. Kanayonka nga agannad tapno awan ti maaksidente wenno matay
Parparegtaennatayo ti Biblia a mangliklik kadagiti ar-aramid a mamagpeligro iti biagtayo. I-play ti VIDEO tapno maammuam dagiti mabalinmo nga aramiden tapno natalgedka.
Basaen ti Proverbio 22:3, sa pagsaritaan no kasanoka nga agbalin a natalged ken ti dadduma . . .
-
iti balaymo.
-
iti pagtrabahuam.
-
no agay-ayamka iti isports.
-
no agmanmanehoka wenno no sika ti pasahero.
5. Ipategmo ti biag ti saan pay a nayanak nga ubing
Inlawlawag ni David nga interesado ni Jehova iti amin a mapaspasamak iti maysa a maisiksikog nga ubing. Basaen ti Salmo 139:13-17, sa pagsaritaan daytoy a saludsod:
-
Para ken Jehova, kaano a mangrugi ti biag ti maysa—inton mayanak wenno bayat a sikog pay laeng ti inana?
Adda dagiti linteg ni Jehova iti nagkauna nga Israel a nangprotektar kadagiti inna ken kadagiti saan pay a nayanak nga annakda. Basaen ti Exodo 21:22, 23, sa pagsaritaan dagitoy a saludsod:
-
Ania ti pangibilangan ni Jehova iti maysa a tao nga aksidente a nakaigapuan ti ipapatay ti maysa a sikog?
-
Ania met ti mariknana no inggagara ti maysa nga aramiden dayta? b
-
Ania ti makunam iti dayta?
Uray ammo ti maysa a babai a napateg ti biag, mabalin a mariknana nga awanen sabali a pagpilianna no di ti agparegreg. Basaen ti Isaias 41:10, sa pagsaritaan dagitoy a saludsod:
-
No kasla mapilitan ti maysa a babai nga agparegreg, asino koma ti pagpatulonganna? Apay?
KUNA TI DADDUMA: “Desision ti maysa a babai no kayatna ti agparegreg—bagina met daydiay.”
-
Ania ti nangkombinsir kenka nga ipatpateg ni Jehova agpadpada ti biag ti ina ken ti sikogna?
SUMARIO
Isursuro ti Biblia nga ipateg, respetuen, ken protektarantayo ti regalo ni Jehova a biag—ti biagtayo ken ti biag ti dadduma.
Rebiu
-
Apay a nakapatpateg ken Jehova ti biag ti maysa a tao?
-
Ania ti marikna ni Jehova no igagara ti maysa a pagpatinggaen ti biag ti maysa a tao?
-
Apay nga agyamyamanka iti regalo a biag?
AGDISKOBREKA PAY
Kasanotayo a maipakita nga agyamyamantayo ken Jehova iti regalona a biag?
Kitaem ti sungbat ti saludsod a, Mapakawan kadi ti Dios ti maysa a babai a napadasanna ti nagparegreg?
“Ania ti Kuna ti Biblia Maipapan iti Aborsion?” (Artikulo iti website)
Ammuem no ania ti maitulongna iti panagpilim iti paglinglingayan no ammom ti pangibilangan ti Dios iti biag.
“‘Aglablabes nga Isports’—Sarakusokem Aya ti Peggad?” (Agriingkayo!, Oktubre 8, 2000)
Kasanon no mapampanunot ti maysa ti agpakamatay? Kitaem no kasano a makatulong ti Biblia.
a Ipatpateg unay ni Jehova dagiti nasaktan ti pusoda. (Salmo 34:18) Maawatanna ti nasaem a marikrikna dagiti mayat nga agpakamatay ket kayatna ida a tulongan. Tapno maammuam no kasano a tultulongan ken liwliwaen ni Jehova ti maysa a mayat nga agpakamatay, basaen ti artikulo a “Kayatkon ti Matay—Makatulong Kadi ti Biblia no Mapampanunotko ti Agpakamatay?” nga adda iti seksion nga Agdiskobreka Pay iti daytoy a leksion.
b Saan koma a malapunos iti pannakakonsiensia dagiti babbai a nagparegreg—mapakawan ida ni Jehova. Para iti ad-adu pay nga impormasion, kitaen ti “Ania ti Kuna ti Biblia Maipapan iti Aborsion?” iti seksion nga Agdiskobreka Pay iti daytoy a leksion.
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
