LEKSION 50
Kasano nga Agbalin a Naragsak ti Pamiliam?—Paset 2
Dagiti annak ket regalo ni Jehova. Kayatna nga ipateg ken aywanan dagiti nagannak dayta a regalona. Nangted ni Jehova kadagiti makatulong a balakad tapno maaramid dayta dagiti nagannak. Ipakita met dagiti balakadna no ania ti aramiden dagiti annak tapno agbalin a naragsak ti pamiliada.
1. Ania ti balakad ni Jehova kadagiti nagannak?
Kayat ni Jehova nga ayaten dagiti nagannak dagiti annakda ken adu koma ti orasda para kadakuada. Kayatna met a protektaran dagiti nagannak dagiti annakda ken usarenda dagiti prinsipio ti Biblia a mangisuro kadakuada. (Proverbio 1:8) Ibagbagana kadagiti amma: “Itultuloyyo . . . a padakkelen [dagiti annakyo] iti . . . pammagbaga ni Jehova.” (Basaen ti Efeso 6:4.) Maragsakan ni Jehova no suroten dagiti nagannak ti instruksionna iti panangpadakkel kadagiti annakda, ken saanda nga ipasa dayta a responsabilidad iti sabali.
2. Ania ti balakad ni Jehova kadagiti annak?
Ibilbilin ni Jehova kadagiti annak: “Agtulnogkayo kadagiti nagannakyo.” (Basaen ti Colosas 3:20.) No respetuen ken agtulnog dagiti annak kadagiti nagannakda, maparagsakda ni Jehova ken dagiti nagannakda. (Proverbio 23:22-25) Nangipakita ni Jesus iti nagsayaat a pagtuladan idi ubing pay. Uray no perpekto, nagtulnog ken rinespetona dagiti nagannakna.—Lucas 2:51, 52.
3. Kasano nga agbalin a nadekdekket iti Dios ti pamiliayo?
No maysaka a nagannak, sigurado a kayatmo nga ayaten dagiti annakmo ni Jehova kas iti panagayatmo kenkuana. Kasanom a maaramid dayta? No aramidem ti ibagbaga ti Biblia: “Isuroyo [ti sasao ni Jehova] kadagiti annakyo ken isarsaritayo kadakuada no nakatugawkayo iti balayyo [ken] no magmagnakayo iti dalan.” (Deuteronomio 6:7) Iti footnote ti Deuteronomio 6:7, ti sao nga “isuro” mabalin a kaipapananna met ti panangulit wenno panangipaganetget. Kasta met, no isursurom ti anakmo iti maysa a banag, mabalin nga ulit-ulitem dayta tapno matandaananna. Kayatna a sawen a masapul a regular a mangbirokka iti oportunidad a makisarita kadagiti annakmo maipapan ken Jehova. Isu a nasayaat no adda eskediulyo kada lawas nga agdaydayaw ken Jehova kas pamilia. No awan anakyo, pagsayaatanyo latta no mangiwayakayo iti tiempo kada lawas a mangadal iti Sao ti Dios.
AMMUEM TI AD-ADU PAY
Kitaem dagiti makatulong a suhestion tapno agbalin a naragsak ken natalged ti rikna ti pamilia.
4. Sanayem dagiti annakmo iti naayat a pamay-an
Mabalin a narigat ti mangsanay iti anak. Kasano a makatulong ti Biblia? Basaen ti Santiago 1:19, 20, sa pagsaritaan dagitoy a saludsod:
-
Kasano a maipakita dagiti nagannak ti ayat no makisarsaritada kadagiti annakda?
-
Apay a saan koma a disiplinaen dagiti nagannak dagiti annakda no makapungpungtotda? a
5. Protektaranyo dagiti annakyo
Tapno maprotektaranyo dagiti annakyo, nagpateg a kasaritayo ida maipapan iti seks. Mabalin a saankayo a komportable a mangaramid iti dayta. I-play ti VIDEO, sa pagsaritaan dagiti sumaruno a saludsod.
-
Apay a marigatan ti dadduma a nagannak a makisarita kadagiti annakda maipapan iti seks?
-
Kasano nga ilawlawag ti dadduma a nagannak ti maipapan iti seks kadagiti annakda?
Kas naipadto, dumakdakes a dumakdakes ti lubong ni Satanas. Basaen ti 2 Timoteo 3:1, 13, sa pagsaritaan daytoy a saludsod:
-
Karaman kadagiti dakes a tattao a nadakamat iti bersikulo 13 dagiti seksual a mangab-abuso kadagiti ubbing. Isu nga apay a napateg nga isuro dagiti nagannak dagiti annakda maipapan iti seks ken no kasanoda a protektaran ti bagbagida kadagiti manangabuso?
Ammom kadi?
Adu a video, publikasion, ken artikulo ti ar-aramiden dagiti Saksi ni Jehova a makatulong kadagiti nagannak tapno maisuroda dagiti annakda maipapan iti seks ken tapno maprotektaran dagiti annakda kadagiti manangabuso. Kas pagarigan, kitaen ti:
-
Protektaranyo Dagiti Annakyo (video)
-
“Panangisuro iti Anakmo Maipapan iti Seks” (Agriingkayo! No. 5 2016)
6. Respetuem dagiti nagannakmo
Maipakita dagiti ubbing ken tin-edyer a resrespetuenda dagiti nagannakda no nasayaat ti pannakisaritada kadakuada. I-play ti VIDEO, sa pagsaritaan dagiti sumaruno a saludsod.
-
Apay a napateg a narespeto ti pannakisarita ti maysa nga agtutubo kadagiti nagannakna?
-
Kasano koma ti pannakisaritana tapno maipakitana a resrespetuenna dagiti nagannakna?
Basaen ti Proverbio 1:8, sa pagsaritaan daytoy a saludsod:
-
Ania koma ti reaksion ti maysa nga agtutubo no bagbagaan isuna dagiti nagannakna?
7. Dayawenyo ni Jehova kas maysa a pamilia
Kada lawas, adda eskediul dagiti pamilia a Saksi ni Jehova nga agkakadua nga agdaydayaw ken Jehova. Ania ti ar-aramidenda no ag-family worship-da? I-play ti VIDEO, sa pagsaritaan dagiti sumaruno a saludsod.
-
Kasano nga agbalin a regular ti Family Worship ti maysa a pamilia?
-
Ania ti mabalin nga aramiden dagiti nagannak tapno agbalin a makaisuro ken makaparagsak ti family worship-da?—Kitaen ti piktiur iti rugi daytoy a leksion.
-
Apay a mabalin a marigatankayo no dadduma nga agkakadua nga agadal?
Imbilin ni Jehova kadagiti nagkauna nga Israelita a kanayon koma a pagsaritaan dagiti pamilia ti Kasuratan. Basaen ti Deuteronomio 6:6, 7, sa pagsaritaan daytoy a saludsod:
-
Kasanom a mayaplikar daytoy a prinsipio?
Dagiti mabalin nga aramiden iti family worship:
-
Agsagana para iti gimong ti kongregasion.
-
Basaen ken pagsaritaan ti maysa a salaysay ti Biblia a magustuan ti pamiliayo.
-
No adda ubbing pay nga annakmo, i-download wenno i-print ti maysa nga aktibidad iti jw.org.
-
No adda tin-edyer nga annakmo, pagsaritaan ti maysa nga artikulo para kadagiti tin-edyer iti jw.org.
-
Iyakto ti maysa nga estoria iti Biblia a kadua dagiti annakmo.
-
Buyaen ken pagsaritaan ti maysa a video iti jw.org.
KUNA TI DADDUMA: “Narigat a maawatan dagiti ubbing ti Biblia.”
-
Ania ti ibagam?
SUMARIO
Kayat ni Jehova nga ayaten, sanayen, ken protektaran dagiti nagannak dagiti annakda, respetuen ken agtulnog dagiti annak kadagiti nagannakda, ken agkakadua nga agdayaw kenkuana dagiti pamilia.
Rebiu
-
Kasano a sanayen ken protektaran dagiti nagannak dagiti annakda?
-
Kasano a maipakita dagiti annak a resrespetuenda dagiti nagannakda?
-
Ania dagiti pagimbaganna no adda eskediul dagiti pamilia nga ag-family worship iti kada lawas?
AGDISKOBREKA PAY
Ania dagiti leksion a mangisagana kadagiti annakmo iti kinaadulto?
“Innem a Leksion a Masapul a Sursuruen Dagiti Ubbing” (Agriingkayo! No. 2 2019)
Ammuem dagiti makatulong a balakad ti Biblia para kadagiti mangay-aywan kadagiti nataenganen a nagannakda.
Kitaem no kasano a nagbalin a nasayaat nga ama ti maysa a lalaki a saanna idi nga ammo ti mangpadakkel iti annak.
Insuronakami ni Jehova a Mangpadakkel Kadagiti Annakmi (5:58)
Kitaem no kasano a mapalagda dagiti amma ti relasionda kadagiti annakda a lallaki.
“Kasano nga Agtalinaed a Nasinged ti Ama iti Anakna a Lalaki?” (Ti Pagwanawanan, Nobiembre 1, 2011)
a Iti Biblia, ti “disiplina” ket tumukoy iti panangisuro ken panangidalan iti ubing ken panangtulong kenkuana a mangbalbaliw iti saan a nasayaat a kababalinna. Saan a tumukoy dayta iti panangabuso wenno kinaulpit.—Proverbio 4:1.
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
