KAS iti nagdagsen nga awit, ti pannakakonsiensia pakapsutennaka. “Nalapunosak iti kaadu dagiti biddutko,” insurat ni Ari David. “Kasda la iti nadagsen nga awit a diak kabaelan a susuonen.” (Salmo 38:4) Nalapunos iti liday ti dadduma a Kristiano ta ipapanda a saan idan a mapakawan ni Jehova. (2 Corinto 2:7) Ngem talaga kadi a kasta? No nakaaramidka iti nadagsen a basol, kayatna kadi a sawen nga inlaksidnakan ni Jehova ket saannakan a mapakawan? Mapakawannaka latta!

Saan a baybay-an ni Jehova dagiti agbabbabawi. Kinapudnona, kayatna ida a tulongan! Iti ilustrasionna maipapan iti nayaw-awan nga anak, inyarig ni Jesus ni Jehova iti naayat nga ama nga addaan iti anak a pimmanaw iti poderna. Nagbalin nga immoral ti biag ti anakna. Idi agangay, nakapagpampanunot ket nagawid. “Uray adayo pay laeng, nakitan ni amana ket naasian unay, isu a timmaray a simmabat. Inarakupna ti anakna ket sidudungngo nga inagkanna.” (Lucas 15:11-20) Kayatmo kadi ti umasideg ken Jehova ngem iti panagriknam ket ‘nakaad-adayoka’ kenkuana? Kas iti ama iti ilustrasion ni Jesus, maasian ni Jehova kenka ken ipatpategnaka. Padpadaananna ti panagsublim.

Ngem kasanon no iti panagriknam ket saannakan a mapakawan ni Jehova gapu ta nadagsen wenno adu unay ti basolmo? Panunotem ti awis kenka ni Jehova a nailanad iti Isaias 1:18: “‘Umaykayo ket aglilinnawagtayo,’ kuna ni Jehova. ‘Uray no nakalablabbaga dagiti basolyo, mapapurawdanto a kas iti niebe.’” Wen, uray pay no dagiti basol ket kas iti nakalablabaga a mantsa iti puraw a bado, mapakawan latta dagita ni Jehova.

Saan a kayat ni Jehova nga agtultuloyka a maparigatan gapu iti pannakakonsiensiam. Ania ngarud ti aramidem tapno pakawanennaka ti Dios ken maaddaanka iti nadalus a konsiensia, iti kasta lumag-an ti riknam? Usigem ti dua a banag nga inaramid ni Ari David. Umuna, kinunana: “Ipudnokto dagiti salungasingko ken Jehova.” (Salmo 32:5) Laglagipem nga inawisnakan ni Jehova nga umasideg kenkuana babaen ti kararag ken ‘makilinnawag’ kenkuana. Patgam koma dayta nga awis. Ipudnom dagiti basolmo ken Jehova, ken iyebkasmo kenkuana ti linaon ti pusom. Gapu iti kapadasan ni David, sikokompiansa nga inkararagna: “Dalusannak iti basolko. . . . Ti nasugatan ken nadunor a puso, O Dios, saanmonto a laksiden.”​—Salmo 51:2, 17.

Maikadua, inawat ni David ti tulong ti Dios babaen ti dinutokanna a pannakabagi a ni propeta Natan. (2 Samuel 12:13) Nangipaay met ni Jehova  ita kadagiti panglakayen iti kongregasion a nasanay tapno tumulong kadagiti agbabbabawi a mangisubli iti relasionda ken Jehova. No makisaritaka kadagiti panglakayen, usarenda ti Biblia ken naimpusuan nga ikararagandaka tapno mabang-aranka, maksayan wenno mapukaw dagiti negatibo a riknam, ken matulonganka nga umimbag iti naespirituan.​—Santiago 5:14-16.

Mabalin a mariknam a nagrigat nga ipudno ti basolmo ken Jehova a Dios ken makisarita kadagiti panglakayen. Kasta met laeng ti narikna ni David. Adda panawen a ‘dina impudno’ ti basolna. (Salmo 32:3) Ngem idi agangay, nakitana ti pagsayaatan ti panangipudno ken panangilintegna iti basolna.

Ti kangrunaan a nagunggona ni David ket ti pannakaisubli ti rag-ona. Insuratna: “Naragsak daydiay napakawan ti salungasingna, daydiay naabbongan ti basolna.” (Salmo 32:1) Inkararagna pay: “O Jehova, luktam ti bibigko, tapno maipakaammo ti ngiwatko ti pannakaidaydayawmo.” (Salmo 51:15) Nadalusen ti konsiensia ni David ken agyamyaman ta pinakawanen ti Dios. Gapuna, natignay a mangisarita iti sabsabali iti maipapan ken Jehova.

Kayat ni Jehova a mariknam ti bang-ar nga itden ti nadalus a konsiensia. Kayatna met a naragsakka a mangisarsarita iti sabsabali iti maipapan kenkuana ken kadagiti panggepna a saan a mapilpilit wenno makonkonsiensia. (Salmo 65:1-4) Laglagipem ti awisna kenka. Kayatna a ‘mapunas dagiti basolmo, tapno ipaay ni Jehova ti pannakabang-ar.’​—Aramid 3:19.

Kasta ti kapadasan ni Martha. Insalaysayna: “Kanayon a patpatulodannak ti anakko iti Pagwanawanan ken Agriingkayo! Ket in-inut a nakasubliak ken Jehova. Ti panagdawatko iti pammakawan iti amin a nagbasolak ti karigatan nga inaramidko tapno makasubliak. Ngem idi agangay, nagkararagak iti Dios ket dimmawatak iti pammakawan. Kasla diak patien a limmabas pay ti 40 a tawen sakbay a nakasubliak ken Jehova. Paneknekan ti kapadasak nga uray adun a tawen nga immadayo ti maysa, adda latta gundawayna nga agserbi manen iti Dios ken agsubli iti ayatna.”