Patgenmi a kabsat:

Kas pagaammomon, naglaon ti Biblia iti adu a salaysay maipapan kadagiti tattao. Adu kadakuada a matalek a lallaki ken babbai ti naaddaan kadagiti problema a kas kadagiti mapaspasarantayo ita. Addaanda iti “rikna a kas kadatayo.” (Santiago 5:17) Naupay ti dadduma kadakuada gapu kadagiti problema ken pakadanagan. Adda dagiti nasaktan unay gapu kadagiti kapamilia wenno kapammatianda. Makonkonsiensia met ti dadduma gapu kadagiti naaramidda a basol.

Ngem talaga kadi a pinanawandan ni Jehova? Saan. Adu kadakuada ti nangikararag iti kas iti inkararag ti salmista: “Kaslaak la napukaw a karnero. Birokennak kas adipenmo, ta diak nalipatan dagiti bilinmo.” (Salmo 119:176) Kasta met kadi ti riknam?

Saan a pulos a lipaten ni Jehova dagiti agdaydayaw kenkuana a nayaw-awan. Tultulonganna ketdi ida​—masansan a babaen kadagiti kapammatianda. Kas pagarigan, usigem no kasano a tinulongan ni Jehova ti adipenna a ni Job idi nakapasar iti nadumaduma a pakarigatan a kas iti pannakapukaw dagiti sanikuana, ipupusay dagiti ay-ayatenna, ken naaddaan iti nakaro a sakit. Inibturanna pay dagiti nasakit a sasao dagiti tattao a mangliwliwa koma kenkuana. Ngem saanna a tinallikudan ni Jehova uray no adda idi gundaway a saan nga umiso ti panangmatmatna iti situasionna. (Job 1:22; 2:10) Kasano a tinulongan ni Jehova ni Job tapno maaddaan iti umiso a panangmatmat?

Ti maysa a pamay-an ket babaen ti panangusarna ken Elihu a kapammatian ni Job. Idi impeksa ni Job ti riknana, dimngeg ni Elihu ken natignay nga agsao. Ania ngata ti ibagana? Babalawenna ngata, konsiensiaen wenno pabainanna tapno laeng ilinteg ni Job ti kapanunotanna? Imbilang kadi ni Elihu nga isu ket nangatngato ngem ni Job? Saan a pulos! Iti panangtignay ti espiritu ti Dios, kinuna ni Elihu: “Agpadata iti sango ti pudno a Dios; napormaak iti pila a kas kenka.” Sa impasiguradona ken Job: “Dinak kabuteng, ken dimo ipapan a mangpadagsen dagiti ibagak kenka.” (Job 33:6, 7) Imbes a nayonan ni Elihu dagiti pakadagsenanna, siaayat a nangipaay iti balakad ken pammaregta a kasapulan ni Job.

Kayatmi a maammuam nga idi insaganami daytoy a broshur, kasta met laeng ti inaramidmi. Dimngegkami nga immuna ken inad-adalmi a naimbag dagiti kasasaad ken karirikna ti dadduma kadagiti immadayo iti kongregasion. (Proverbio 18:13) Kalpasanna, nainkararagan nga inadalmi dagiti salaysay iti Kasuratan maipapan iti panangtulong ni Jehova kadagiti adipenna a naipasango kadagiti isu met la a kasasaad. Kamaudiananna, inusarmi dagiti salaysay iti Kasuratan ken dagiti kapadasan ti kakabsat ita tapno maaramid daytoy a broshur. Naimpusuan nga awisendaka a mangadal iti daytoy a publikasion. Ay-ayatendaka unay.

Bagi a Manarawidwid Dagiti Saksi ni Jehova