MABALIN nga ammomon a dagiti tattao ita ket lumakay, agsakit, ken matay. Addada pay ubbing a matay. Rumbeng kadi a pagbutngam ti ipapatay wenno ti asinoman a natayen?— Ammom kadi no ania ti mapasamak no mataytayo?—

Kinapudnona, awan ti sibibiag ita a natay idin sa nagungar tapno estoriaenna dayta kadatayo. Ngem adda lalaki a nagungar idi adda ditoy daga ni Jesus, ti Naindaklan a Mannursuro. Maammuantayo no ania ti mapasamak kadagidiay matay babaen ti panangbasatayo iti maipapan kenkuana. Gayyem ni Jesus daydiay a lalaki ken agnanaed idi idiay Betania, maysa a bassit nga ili iti asideg ti Jerusalem. Lazaro ti naganna, ket adda dua a kakabsatna nga agnagan Marta ken Maria. Kitaenta no ania ti kuna ti Biblia a napasamak.

Maysa nga aldaw, masakit unay ni Lazaro. Adayo idi ti ayan ni Jesus. Gapuna, nangibaon da Marta ken Maria iti mangibaga ken Jesus a masakit ni Lazaro a kabsatda. Inaramidda daytoy gapu ta ammoda a makaumay ni Jesus ket paimbagenna ti kabsatda. Saan a doktor ni Jesus, ngem adda pannakabalinna nga inted ti Dios a mangpaimbag iti amin a kita ti sakit.​​—Mateo 15:​30, 31.

Ngem sakbay a nakapan ni Jesus ken ni Lazaro, kimmaro ti sakit ni Lazaro agingga a natay. Ngem kinuna ni Jesus kadagiti adalanna a matmaturog ni Lazaro ket mapan tapno riingenna. Saan a matarusan dagiti adalan ti kayat a sawen ni Jesus. Gapuna, imbatad ni Jesus: “Ni Lazaro natayen.” Ania ti ipakita daytoy maipapan iti ipapatay?— Wen, ti ipapatay ket kas iti nargaan a turog. Nargaan unay a turog nga awanen ti matagtagainep ti tao.

 Ita, sumarungkaren ni Jesus kada Marta ken Maria. Simmangpeten ti adu a gagayyem ti pamiliada. Napanda tapno liwliwaenda dagiti agkabsat a babbai gapu ta natayen ti kabsatda. Idi naammuan ni Marta nga addan ni Jesus, napanna sinabat. Di nagbayag rimmuar met ni Maria tapno kitaenna ni Jesus. Napalalo ti ladingitna ken agsangsangit, sa nagruknoy iti sakaanan ni Jesus. Agsangsangit met dagiti dadduma a gagayyemda a simmurot ken Maria.

Dinamag ti Naindaklan a Mannursuro no sadino ti nangipananda ken Lazaro. Iti kasta, impanda ni Jesus iti rukib a nakaitaneman ni Lazaro. Idi nakita ni Jesus nga agsangsangit amin a tattao, nagsangit met. Ammona no kasano kasaem ti matayan iti patpatgen.

Adda bato iti wangawangan ti rukib, isu a kinuna ni Jesus: “Ikkatenyo ti bato.” Ikkatenda ngata?— Impagarup ni Marta a saanen a mabalin. Kunana: “Apo, itan nabuyoken, ta uppat nga aldawen.”

Ngem kuna ni Jesus kenkuana: “Saanko aya nga imbaga kenka a no mamatika makitam ti dayag ti Dios?” Kayat a sawen ni Jesus a makakita ni Marta iti banag a pakaidayawan ti Dios. Ania ti aramiden ni Jesus? Idi naikkaten ti bato, nagkararag ni Jesus ken ni Jehova iti napigsa. Kalpasanna, kuna ni Jesus iti napigsa a timek: “Lazaro, rummuarka!” Rummuar ngata? Kabaelanna ngata ti rummuar?—

Kabaelam kadi a riingen ti matmaturog?— Wen, agriing no pigsaam ti agpukkaw. Ngem mariingmo kadi ti tao a natay?— Saan. Uray kasano kapigsa ti pukkawmo, saan a makangngeg ti natay. Awan asinoman kadatayo ditoy daga a makabalin a mangriing iti natay.

Ngem naiduma ni Jesus. Adda naisangsangayan a pannakabalinna nga inted ti Dios. Isu nga idi pinukkawan ni Jesus ni Lazaro, adda nakaskasdaaw a napasamak. Rimmuar iti rukib daydiay tao a natayen  iti uppat nga aldaw! Nagungaren! Makaanges, makapagna, ken makapagsao manen! Wen, pinagungar ni Jesus ni Lazaro.​​—Juan 11:​1-​44.

Ita, panunotem daytoy: Ania ti napasamak ken Lazaro idi natay? Adda kadi simmina kenkuana a kararua wenno espiritu sa napan iti sabali a lugar? Napan kadi idiay langit ti kararua ni Lazaro? Sibibiag kadi idiay langit iti uppat nga aldaw a kaduana ti Dios ken dagiti nasantuan nga anghel?—

Saan. Laglagipem a kinuna ni Jesus a matmaturog ni Lazaro. Ania ti kasasaadmo no matmaturogka? No nargaan unay ti turogmo, ammom kadi ti mapaspasamak iti aglawlawmo?— Ket no makariingka, saanmo nga ammo no kasano kabayag ti pannaturogmo agingga a dimo kitaen ti relo.

Kasta dagiti natay a tattao. Awan ti ammoda. Awan ti mariknada. Ken awan ti maaramidanda. Kasta ni Lazaro idi natay. Ti ipapatay  ket kas iti nargaan a turog nga awan aniaman a malagip ti tao. Kuna ti Biblia: “No maipapan kadagiti natay, saanda a pulos sipapanunot iti aniaman.”​​—Eclesiastes 9:​5, 10.

Panunotem met daytoy: No adda ni Lazaro idiay langit iti uppat nga aldaw, saan aya nga adda koma naibagana maipapan iti dayta?— Ket no napan idiay langit, piliten ngata koma ni Jesus nga agsubli ditoy daga manipud iti dayta a nakasaysayaat a lugar?— Siempre saan!

Ngem adu ti agkuna nga addaantayo iti kararua, ket kunada nga agtultuloy nga agbiag ti kararua kalpasan ti ipapatay ti bagi. Kunada a sibibiag idi ti kararua ni Lazaro iti sabali a lugar. Ngem saan a kasta ti kuna ti Biblia. Kunana a ti Dios inaramidna ti immuna a tao a ni Adan kas “kararua a sibibiag.” Ni Adan ket maysa a kararua. Kuna pay ti Biblia a natay ni Adan kalpasan a nagbasol. Nagbalin a “natay a kararua,” ket nagsubli iti tapok a naggapuanna. Kuna pay ti Biblia nga amin nga annak ni Adan ket natawidda met ti basol ken ipapatay.​​—Genesis 2:7; 3:17-​19; Numeros 6:6; Roma 5:12.

Nalawag ngarud nga awanantayo iti kararua a naisina iti bagitayo. Datayo amin ket kararua. Ket yantangay natawid dagiti tattao ti basol  manipud iti immuna a tao a ni Adan, kuna ti Biblia: ‘Ti kararua nga agbasbasol matayto.’​​—Ezequiel 18:4.

Adda dagiti tattao a mabuteng kadagiti natay. Dida kayat ti umasideg iti sementerio gapu ta ipagarupda nga adda simmina a kararua dagiti natay a mabalin a mangdangran kadagiti sibibiag. Ngem kabaelan kadi ti natay a dangran ti sibibiag?— Saan, dina maaramid dayta.

Patien pay ketdi ti dadduma a makapagsubli dagiti natay kas espiritu tapno sarungkaranda dagiti sibibiag. Dayta ti gapuna nga iyatanganda dagiti natay. Ngem dagidiay agar-aramid iti kasta saanda a talaga a patien ti kuna ti Dios maipapan kadagiti natay. No patientayo ti kuna ti Dios, saantayo a kabuteng dagiti natay. Ket no pudno nga adda panagyamantayo iti Dios gapu iti biagtayo, ipakitatayo dayta babaen ti panagaramidtayo kadagiti banag a makaay-ayo iti Dios.

Ngem mabalin a maisaludsodmo: ‘Pagungaren ngata ti Dios dagidiay natay nga ubbing? Talaga kadi a kayatna nga aramiden dayta?’ Dayta ti sumaganad a pagsaritaanta.