MAYSA nga aldaw, adda maysa a lalaki a nangbirok ken Jesus. Ammona a masirib unay ni Jesus, isu a kinunana kenkuana: ‘Mannursuro, ibagam iti kabsatko nga ibingayannak kadagiti sanikuana.’ Impagarup ti lalaki a rumbeng nga adda bingayna kadagita a sanikua.

No sika koma ni Jesus, ania koma ti imbagam?⁠— Nakita ni Jesus nga adda parikut ti lalaki. Ngem ti parikut ket saan a gapu ta kasapulanna ti sanikua ti kabsatna. Ti parikut ti lalaki ket saanna nga ammo no ania ti pudno a napateg iti biagna.

Panunotenta daytoy. Ania koma ti kapatgan kadatayo? Ti kadi maaddaan kadagiti napintas nga ay-ayam, baro a kawes, wenno dadduma pay a bambanag?⁠— Saan, adda sabali a napatpateg nga amang. Ket daytoy ti leksion a kayat idi nga isuro ni Jesus. Isu nga adda inestoriana maipapan iti maysa a tao a nakalipat iti Dios. Kayatmo kadi a maammuan dayta?⁠—

Nakabakbaknang daytoy a tao. Adu ti daga ken kamarinna. Naruay ti bunga dagiti mulana. Saanen nga umdas dagiti kamarinna a pagidulinanna iti amin nga apitna. Isu nga ania ti aramidenna? Kinunana iti bagina: ‘Rakrakekto dagiti kamarinko ket mangbangonak iti daddadakkel. Ket idulinkonto dagiti amin nga apitko ken ti amin a naimbag a bambanagko kadagita a baro a kamarin.’

Impagarup ti nabaknang a tao a nainsiriban daytoy. Impapanna a  masirib unay no agurnong iti adu a banag. Kinunana iti bagina: ‘Adu ti naimbag a banag a naidulinko. Umdasen dagitoy a maipaay kaniak iti adu a tawen. Isu nga ita nanam-ayakon. Mangan, uminum, ken agragsakak.’ Ngem saan nga umiso ti pampanunoten ti nabaknang a tao. Ammom kadi no apay?⁠— Ti laeng bagina ken ti bukodna a pagragsakan ti pampanunotenna. Nalipatanna ti Dios.

Gapuna, nagsao ti Dios iti nabaknang a tao. Kinunana: ‘Maag a tao. Matayka iti daytoy a rabii. Asino ngarud ita ti agtagikua iti bambanag nga inurnongmo?’ Mausar kadi ti nabaknang a tao dagita a banag kalpasan ti ipapatayna?⁠— Saan. Adda sabali a mangala kadagita. Kinuna ni Jesus: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”​​—⁠Lucas 12:13-​21.

Dimo kayat a tuladen dayta a nabaknang a tao, di ngamin?⁠— Ti kangrunaan a panggepna iti biag ket agurnong iti material a bambanag.  Biddut dayta. Kanayon a kayatna ti ad-adu pay. Ngem saan a “nabaknang iti Dios.”

Adu a tattao ti kas iti dayta a nabaknang. Kanayon a kayatda ti ad-adu pay. Ngem mangituggod daytoy iti dadakkel a parikut. Kas pagarigan, addada abalbalaymo, di ngamin?⁠— Mangibagaka man iti dadduma kadagiti abalbalaymo.⁠— Ania ngay no ti maysa kadagiti gagayyemmo ket addaan iti bola wenno munieka wenno dadduma pay nga abalbalay nga awan kenka? Nasayaat kadi no ipapilitmo nga igatangandaka da tatang ken nanangmo?⁠—

Mabalin nga adda tiempo a kasla nakapatpateg ti maysa nga abalbalay. Ngem anianto ti mapasamak iti dayta?⁠— Dumaanto. Mabalin a madadael, ket kalpasanna saanmonto pay ketdin a kayat. Kinapudnona, addaanka iti napatpateg nga amang ngem kadagiti abalbalay. Ammom kadi no ania dayta?⁠—

Ti biagmo. Nakapatpateg ti biagmo gapu ta no awan dayta, awan maaramidmo. Ngem ti biagmo ket agpannuray iti panagaramidmo no ania ti makaay-ayo iti Dios, di ngamin?⁠— Ditay koma ngarud tultuladen dayta maag a nabaknang a tao a nanglipat iti Dios.

 Saan laeng a dagiti ubbing ti mabalin nga agaramid iti minamaag a bambanag a kas iti dayta a nabaknang a tao. Ar-aramiden met dayta ti adu a nataengan. Dadduma kadakuada ti kanayon nga agtarigagay iti ad-adu pay ngem ti adda kadakuada. Mabalin nga addaanda met iti umdas a makan, pagkawes, ken pagnaedan. Ngem kayatda ti ad-adu pay. Kayatda ti adu a kawes. Ken kayatda ti daddadakkel a balbalay. Nangina dagita. Isu nga igaedda ti agtrabaho tapno makaurnongda iti adu a kuarta. Ket no ad-adu ti kuartada, ad-adu met ti tarigagayanda.

Dagiti dadduma a nataengan okupadoda unay nga agbirok iti kuarta isu nga awanen ti panawenda iti pamiliada. Ken awanen ti panawenda iti Dios. Makapagbiagda kadi nga agnanayon gapu iti kuartada?⁠— Saan. Mausardanto kadi ti kuartada kalpasan ti ipapatayda?⁠— Saan. Awan ngaminen ti maaramidan dagiti natay.​—⁠Eclesiastes 9:​5, 10.

Kayatna kadi a sawen a dakes ti adda kuartana?⁠— Saan. Makagatangtayo iti makan ken kawes no adda kuartatayo. Kuna ti Biblia a maysa dayta a salaknib. (Eclesiastes 7:12) Ngem agpeggadtayo no ayatentayo ti kuarta. Agbalintayto a kas iti dayta a maag a nabaknang a nagurnong kadagiti bukodna a gameng ken saan a nabaknang iti Dios.

Ania ti kayat a sawen ti panagbalin a nabaknang iti Dios?⁠— Kayatna a sawen nga ipangpangrunatayo ti Dios iti biagtayo. Ibagbaga ti dadduma a tattao a mamatida iti Dios. Pagarupenda nga umdasen ti panamatida kenkuana. Ngem talaga kadi a nabaknangda iti Dios?⁠— Saan. Kapadada ti nabaknang a tao a nanglipat iti Dios.

Di pulos linipat ni Jesus ti nailangitan nga Amana. Saanna nga inkagumaan ti agurnong iti adu a kuarta. Ken awan ti adu a material a sanikuana. Ammo ni Jesus no ania ti pudno a napateg iti biag. Ammom kadi no ania dayta?⁠— Ti panagbalin a nabaknang iti Dios.

Ibagam man, kasanotayo nga agbalin a nabaknang iti Dios?⁠— Agbalintayo a nabaknang iti Dios no aramidentayo dagiti makaay-ayo kenkuana. Kinuna ni Jesus: “Kankanayon nga aramidek ti bambanag a  makaay-ayo kenkuana.” (Juan 8:29) Maragsakan ti Dios no aramidentayo dagiti ipapaaramidna kadatayo. Ibagam man kaniak no ania dagiti maaramidmo a pakaragsakan ti Dios.⁠— Wen, mabalinmo a basaen ti Biblia, makigimong, agkararag iti Dios, ken tumulong iti sabsabali a mangammo kenkuana. Dagita ti pudno a kapapatgan iti biag.

Gapu ta nabaknang ni Jesus iti Dios, ni Jehova ti nangaywan kenkuana. Inikkanna ni Jesus iti gunggona a biag nga agnanayon. No tuladentayo ni Jesus, ayaten ken aywanannatayo met ni Jehova. Tuladentayo koma ngarud ni Jesus ken ditay pulos tultuladen daydiay nabaknang a tao a nanglipat iti Dios.