ADDA akem dagiti amin a nagannak iti maysa a napateg a pasamak a di matarusan a naan-anay ti tao. Adda banag nga ited ti tunggal maysa manipud iti bagida. Kas resultana, adda naan-anay a sibibiag a persona a mabukel iti aanakan ti ina. Gapuna, di pakasdaawan a no adda mayanak a maladaga, dakamaten dagiti tattao dayta a pasamak kas “ti milagro ti pannakayanak.”

Siempre, ti panangpataud kadagiti annak ket pangrugian laeng ti responsabilidad dagiti nagannak. Iti damo, gistay nakadepende a kanayon dagiti maladaga. Ngem bayat a dumakkelda, saan laengen a pisikal nga atension ti kasapulanda. Kasapulanda ti tulong tapno rumang-ayda iti mental, emosional, moral, ken espiritual.

Tapno nasayaat ti irarang-ayda, nangnangruna a kasapulan dagiti annak ti ayat dagiti nagannak. Nupay napateg ti panangyebkas iti ayat babaen iti sasao, nasken a mapasingkedan dayta kadagiti aramid. Wen, kasapulan dagiti annak ti nasayaat nga ehemplo dagiti nagannak. Kasapulanda ti moral a panangiwanwan ken prinsipio a surotenda. Ket kasapulanda dagita manipud iti kinaubingda. Nakalkaldaang ti ibungana no naladaw unayen ti panangtulong kadagiti annak.

Iti Biblia ti pakasarakan kadagiti kasayaatan a prinsipio. Awan umasping kadagiti pagimbagan ti instruksion a naibatay iti Biblia. Babaen iti kasta nga instruksion, mangrugi a mabigbig dagiti annak a saan a basta sasao ti tao ti maisursuro kadakuada, no di ket dayta ti ibagbaga ti Namarsua kadakuada, ti nailangitan nga Amada. Daytoy ti gapuna a nabileg ken awan ti umasping iti dayta a balakad.

Paregtaen ti Biblia dagiti nagannak nga ikagumaanda nga itukit dagiti nalinteg a prinsipio iti panunot dagiti annakda. Ngem bayat nga agmataengan dagiti annak, masansan a marigatan dagiti nagannak a makisarita kadakuada maipapan  kadagiti kapatgan a banag. Daytoy a libro nga Agsursuroka iti Naindaklan a Mannursuro ket nairanta a tumulong tapno malapdan ti itatanor ti kasta a situasion. Ipaayannakayo ken dagiti annakyo iti naespirituan a material a basaenyo a sangsangkamaysa. Ngem malaksid iti dayta, daytoy koma ti manggutugot iti panagsasarita dagiti ubbing ken dagidiay mangibasa iti daytoy a libro kadakuada.

Makitamto a daytoy a libro gutugotenna dagiti ubbing a sumungbat. Adu ti maitutop a saludsod a linaonna. Inton madanonmo dagita, adda makitam nga uged (​—). Palagip daytoy tapno sumardengka biit ket paregtaem ti ubing a sumungbat wenno agsao. Magustuan dagiti ubbing ti makipaset. No saan a maikkan ti ubing iti gundaway a makipaset, alisto a mapukaw ti interesna.

Ngem napatpateg pay, dagitoy a saludsod ti tumulong kadakayo a mangammo iti pampanunoten ti ubing. Pudno, mabalin a saan nga umiso ti isungbatna. Ngem ti nayimprenta a material kalpasan ti kada saludsod ket nairanta a tumulong iti ubing a mangpatanor iti nasayaat a panagpampanunot.

Ti maysa a naisangsangayan a linaon ti libro ket dagiti nasurok a 230 a ladawan. Kaaduanna addaanda kadagiti kapsion a manggutugot iti ubing a mangyebkas iti pampanunotenna, maibatay iti nakita ken nabasana. Kaduaenyo ngarud ti ubing a mangusig kadagiti ladawan. Dakkel unay ti maitulong dagita tapno maipaganetget dagiti napateg a banag a naisuro.

Inton masursuro ti ubing ti agbasa, paregtaem nga ipigsana a basaen ti libro. No kanayonna a basaen, ad-adda a maitukit iti panunot ken pusona dagiti nasayaat a balakad iti libro. Ngem tapno umuneg ti panaginnayat ken panagrinnaemyo iti anakyo, rumbeng a basaenyo a dua ti libro, ken aramidenyo dayta a regular.

Maipaspasango dagiti ubbing kadagiti maiparit a sekso, espiritismo, ken dadduma pay a kinadakes iti wagas a kasla di mapanunot kadagiti kallabes a dekada. Kasapulanda ngarud ti proteksion. Dayta ti ipaay daytoy a libro iti nadayaw ngem prangka a wagas. Ngem nangnangruna a kasapulan a maiturong dagiti ubbing iti Gubuayan ti amin a sirib, ti nailangitan nga Amatayo a ni Jehova a Dios. Kasta ti kanayon nga inaramid ni Jesus, ti Naindaklan a Mannursuro. Manginanamakami unay a daytoy a libro tulongannakayo ken ti pamiliayo a mangmolde iti biagyo tapno maparagsakyo ni Jehova ken mabendisionankayo iti agnanayon.