ADDA kadi am-ammom a kanayon a kayatna nga isu ti umuna?— Mabalin nga iduronna ti sabali tapno isu ti makauna iti pagpilaan. Nakakitaka kadin iti kasta?— Nakita ti Naindaklan a Mannursuro nga uray dagiti nataengan kalikagumanda a gun-oden dagiti katan-okan wenno kapatgan a puesto. Ket dina kayat ti kasta. Kitaenta ti napasamak.

Kuna ti Biblia a naawis ni Jesus iti dakkel a padaya iti pagtaengan ti maysa a Fariseo ken natan-ok a panguluen ti relihion. Idi nakasangpeten ni Jesus, nakitana ti iseserrek ti dadduma a sangaili ket pinilida dagiti kasayaatan a puesto. Gapuna, adda inestoriana kadagidiay naawis. Kayatmo kadi a denggen dayta?—

 Kinuna ni Jesus: ‘No adda mangawis kenka iti padaya ti kasar, saanmo a pilien ti kasayaatan, wenno katan-okan a puesto.’ Ammom kadi no apay a kasta ti imbaga ni Jesus?— Inlawlawagna nga amangan no adda naawis a natantan-ok. Gapuna, kas makitam iti ladawan, immay ti nagpadaya ket kinunana: ‘Itedmo iti daytoy a tao dayta a puesto, ket mapanka sadiay.’ Ania ngata ti marikna ti sangaili?— Mabainan gapu ta kitkitaen dagiti amin a sangaili ti iyaakarna iti nanumnumo a puesto.

Impakita ni Jesus a saan nga umiso ti agtarigagay iti katan-okan a puesto. Isu a kinunana: ‘No maawiska iti padaya ti kasar, agtugawka iti kanunumuan a puesto. Iti kasta umayto ti tao a nangawis kenka ket kunaenna, “Gayyem, mapanka iti nangatngato.” Iti kasta maaddaankanto iti dayaw iti sanguanan dagiti amin a sangaili bayat nga umakarka iti nasaysayaat a puesto.’​​—Lucas 14:​1, 7-​11.

Natarusam kadi ti kababagas ti estoria ni Jesus?— Usigenta ti maysa a pagarigan tapno makitam no natarusam dayta. Panunotem a lumuganka iti napekpek a bus. Rumbeng kadi nga apuraem ti agtugaw ket bay-am nga agtakder ti maysa a lakay wenno baket?— Maragsakan ngata ni Jesus no kasta ti aramidem?—

Mabalin nga adda agkuna a saan a maseknan ni Jesus iti ar-aramidentayo. Ngem patiem kadi dayta?— Idi adda ni Jesus iti dayta a dakkel a padaya iti pagtaengan ti Fariseo, kitkitaenna dagiti tattao bayat nga agpilpilida iti pagtugawanda. Panagkunam saan ngata a kasta met laeng ti panaginteresna iti ar-aramidentayo ita?— Yantangay addan ni Jesus idiay langit, sigurado a makitanatayo a naimbag.

 Tumaud ti riribuk no adda asinoman a makiinnuna. Masansan nga adda riri, ken marurod dagiti tattao. No dadduma mapasamak daytoy no agkakalugan dagiti ubbing iti bus. No maluktanen ti bus, agiinnuna dagiti ubbing. Tarigagayanda dagiti kasayaatan a tugaw, dagidiay asideg iti tawa. Ania ngay ti mapasamak?— Wen, makapungtotda.

Tumaud ti nakaro a riribuk no tarigagayantayo a datayo ti umuna. Nangpataud met dayta iti riribuk uray kadagidi apostol ni Jesus. Kas naammuanta iti Kapitulo 6 daytoy a libro, nagririkkiaranda no siasino ti katan-okan kadakuada. Ania ngay ti inaramid ni Jesus?— Wen, tinubngarna ida. Ngem di nagbayag, adda manen sabali a nagririkkiaranda. Kitaenta no kasano a nangrugi dayta.

Agdaldaliasat idi dagiti apostol ken dagiti sabsabali pay bayat a kaduada ni Jesus iti maudin a gundaway a mapan idiay siudad ti Jerusalem. Imbaga ni Jesus kadakuada ti maipapan iti Pagarianna, isu a pinampanunot  da Santiago ken Juan ti panagturaydanto kas ar-ari a kakaduana. Imbagada pay dayta ken ni nanangda a Salome. (Mateo 27:56; Marcos 15:40) Isu a bayat nga agturturongda idiay Jerusalem, immasideg ni Salome ken ni Jesus, nagruknoy kenkuana, ken nagkiddaw.

Dinamag ni Jesus: “Ania ti kayatmo?” Imbaga ni Salome nga iti sidong ti Pagarianna, kayatna nga ipatugaw ni Jesus dagiti annakna iti mismo nga abayna, maysa iti makannawan ken maysa iti makannigidna. Idi naammuan dagiti sangapulo a dadduma pay nga apostol ti impakiddaw da Santiago ken Juan ken ni nanangda, ania ngata ti nariknada?—

Wen, napalalo ti pungtotda kada Santiago ken Juan. Gapuna, nangted ni Jesus iti nainsiriban a balakad kadagiti amin nga apostolna. Kuna ni Jesus kadakuada a dagiti agturay iti nasnasion magustuanda unay ti agbalin a nabileg ken natan-ok. Tarigagayanda ti natan-ok a saad tapno  isuda ti pagtulnogan dagiti isuamin. Ngem kuna ni Jesus kadagiti pasurotna a saan koma a kasta ti kababalinda. Imbes ketdi, kuna ni Jesus: “Siasinoman a kayatna ti agbalin nga umuna kadakayo masapul nga agbalin nga adipenyo.” Panunotem dayta!​​—Mateo 20:20-​28.

Ammom kadi no ania ti trabaho ti adipen?— Pagserbianna dagiti sabsabali, a dina inanamaen nga isu ti pagserbianda. Mapan iti kababaan a puesto, saan nga iti umuna a puesto. Ipakitana nga isu ti kanunumuan, saan a ti kapapatgan. Ket laglagipem a kinuna ni Jesus a ti asinoman nga agtarigagay nga isu ti umuna agtignay koma a kas adipen dagiti sabsabali.

Ita, ania ti ammom a kaipapanan dayta kadatayo?— Makiriri kadi ti adipen iti apona no siasino ti agpuesto iti kasayaatan a tugaw? Wenno makiriri kadi no siasino ti umuna a mangan? Ania ti makunam?— Inlawlawag ni Jesus a ti adipen kanayon a paunaenna ti apona.​​—Lucas 17:​7-​10.

Isu nga imbes a tarigagayantayo ti umuna, ania ti rumbeng nga aramidentayo?— Wen, agbalintayo koma a kas adipen dagiti sabsabali. Ket kaipapanan dayta a paunaentayo dagiti sabsabali. Kayatna a sawen nga ibilangtayo a napatpateg dagiti sabsabali ngem kadatayo. Addada kadi mapanunotmo a wagas a mabalinmo nga ibilang a napatpateg dagiti sabsabali?— Subliam ti panid 40 ken 41 ket kitaem manen ti sumagmamano a wagas tapno maipakitam a napatpateg dagiti sabsabali babaen ti panagserbim kadakuada.

Malagipmo a ti Naindaklan a Mannursuro imbilangna a napatpateg dagiti sabsabali babaen ti panagserbina kadakuada. Iti daydi naudi a rabii a pannakikaduana kadagiti apostolna, nagparintumeng pay ken binugguanna ti saksakada. No ibilangtayo met a napatpateg dagiti sabsabali babaen ti panagserbitayo kadakuada, maparagsaktayo nga agpadpada ti Naindaklan a Mannursuro ken ti Amana, ni Jehova a Dios.