NANGANKA kadin ita nga aldaw?— Ammom kadi no siasino ti nangisagana iti dayta?— Mabalin a ni nanangmo wenno adda sabali, ngem apay a rumbeng nga agyamantayo iti Dios?— Gapu ta ti Dios ti mangpatpataud kadagiti taraon. Nupay kasta, agyamantayo met koma iti daydiay nangisagana iti taraon wenno iti daydiay nangidasar.

No dadduma malipatantayo ti agyaman no adda naimbag a maaramidan kadatayo dagiti sabsabali, di ngamin? Idi adda ditoy daga ti Naindaklan a Mannursuro, adda sumagmamano nga agkukutel a nakalipat nga agyaman.

Ammom kadi no ania ti agkukutel?— Maysa dayta a tao nga adda sakitna a maawagan iti kukutel. Ti kasta a sakit mabalinna pay a runoten ti dadduma a lasag ti tao. Idi adda ni Jesus ditoy daga, nasken a maisina ti pagyanan dagiti agkukutel. Ket no makita ti agkukutel nga adda sabali nga umasideg, masapul a pakdaaranna dayta a tao nga umadayo kenkuana. Kastoy idi ti aramidenda tapno saan unay nga umasideg dagiti sabsabali, ta amangan no maakaranda iti sakit ti agkukutel.

Napalalo ti panangngaasi ni Jesus kadagiti agkukutel. Maysa nga aldaw, bayat nga agturong ni Jesus idiay Jerusalem, nasken a lumasat iti maysa a bassit nga ili. Idi makaasidegen iti ili, adda sangapulo nga agkukutel a simmabat kenkuana. Nadamagda nga adda pannakabalin ni Jesus manipud iti Dios a mangpaimbag iti amin a kita ti sakit.

Saan nga immasideg ken Jesus dagiti agkukutel. Adayo ti ayanda. Ngem namatida a mapaimbag ni Jesus ti kukutelda. Isu nga idi nakita  dagiti agkukutel ti Naindaklan a Mannursuro, impukkawda kenkuana: ‘Jesus, Mannursuro, tulongannakami!’

Maasianka kadi kadagiti tattao a masakit?— Naasian ni Jesus. Ammona a nakalidliday ti agkukutel. Gapuna, simmungbat ket kinunana kadakuada: “Inkayo ket iparangyo ti bagbagiyo iti papadi.”​​—Lucas 17:11-​14.

Apay a kastoy ti imbilin ni Jesus kadakuada? Maigapu dayta iti linteg nga inted ni Jehova iti ilina maipapan kadagiti agkukutel. Kinuna daytoy a linteg a ti padi ti Dios ti mangkita iti lasag ti maysa nga agkukutel. Ti padi ti mangibaga iti agkukutel no awanen ti sakitna. No immimbagen, mabalinna manen ti makikadua kadagiti nasalun-at a tattao.​​—Levitico 13:​16, 17.

 Ngem masakit pay laeng dagitoy nga agkukutel. Gapuna, napanda kadi iti padi a kas imbilin ni Jesus kadakuada?— Wen, napanda a dagus. Sigurado a namati dagitoy a maikkat ni Jesus ti sakitda. Ania ti napasamak?

Bayat a mapmapanda iti padi, nagpukaw ti sakitda. Immimbag ti lasagda. Nasalun-atdan! Nagunggonaan ti pammatida iti pannakabalin ni Jesus. Anian a rag-oda! Ngem ita, ania koma ti inaramidda tapno maipakitada ti panagyamanda? Ania koma ti inaramidmo no maysaka kadakuada?—

Nagsubli ken Jesus ti maysa kadagiti napaimbag a lallaki. Intan-okna ken indaydayawna ni Jehova a Dios. Umiso ti inaramidna agsipud ta naggapu iti Dios ti pannakabalin a nangpaimbag kenkuana. Nagparintumeng met ti lalaki iti sanguanan ti Naindaklan a Mannursuro ket nagyaman kenkuana. Napalalo ti panagyamanna iti inaramid ni Jesus.

Ngem dagidiay ngay siam a lallaki? Inimtuod ni Jesus: ‘Saan kadi a sangapulo nga agkukutel ti napaimbag? Sadino ti ayan dagidiay siam? Maysa laeng kadi ti nagsubli tapno idayawna ti Dios?’

 Wen, pudno dayta. Maysa laeng kadagiti sangapulo ti nangitan-ok, wenno nangidayaw iti Dios ken nagsubli tapno agyaman ken Jesus. Ket Samaritano daytoy a tao, wenno taga sabali a pagilian. Dagidiay dadduma pay a siam a lallaki saanda a nagyaman iti Dios, ken saanda a nagyaman ken Jesus.​​—Lucas 17:15-​19.

Siasino ti kaaspingmo kadagidiay a lallaki? Kayattayo ti agbalin a kas iti Samaritano, di ngamin?— Gapuna, no adda makaaramid iti nasayaat kadatayo, ania koma ti laglagipentayo nga aramiden?— Masapul nga agyamantayo. Masansan a malipatan dagiti tattao ti agyaman. Ngem nasayaat no agyamantayo. No aramidentayo dayta, maragsakan ni Jehova a Dios ken ni Jesus nga Anakna.

No ut-utobem, malagipmo nga adu ti nasayaat a naaramidan kenka dagiti tattao. Kas pagarigan, napadasam kadin ti nagsakit?— Mabalin a dika pay nagsakit iti kas ti kakaro ti sakit dagidiay sangapulo nga agkukutel, ngem baka naaddaankan iti nakaro a panateng wenno sakit ti tian. Adda kadi nangasikaso kenka?— Mabalin a pinagtomardaka iti agas ken adda pay dadduma nga inaramidda kenka. Naragsakanka kadi ta tinulongandaka nga umimbag?—

Nagyaman ken Jesus ti lalaki a Samaritano gapu ta pinaimbagna, ket naragsakan ni Jesus iti daytoy. Panagkunam maragsakan ngata ni nanang wenno ni tatangmo no agyamanka kadakuada no adda nasayaat a maaramidanda kenka?— Wen, maragsakanda.

 Adda dagiti tattao a makaaramid kenka iti nasayaat iti inaldaw wenno linawas. Mabalin a dagita ti trabahoda. Mabalin a maragsakanda pay ketdi a mangaramid kadagita. Ngem baka malipatam ti agyaman. Mabalin nga ikagumaan ti maestra wenno maestrom ti tumulong kenka nga agadal. Trabahona daytoy. Ngem maragsakan no agyamanka kenkuana gapu ta tultulongannaka nga agsursuro.

No dadduma babassit laeng ti maitulong kenka dagiti tattao. Adda kadin nangilukat kenka iti ruangan? Wenno adda kadin nangyawat kenka iti makan iti lamisaan? Nasayaat no agyamanka uray kadagitoy babassit a banag.

No malagiptayo ti agyaman kadagiti tattao ditoy daga, iti kasta ad-adda a malagiptayo ti agyaman iti nailangitan nga Amatayo. Ket anian a nagadu dagiti pagyamanantayo ken Jehova! Inikkannatayo iti biag ken amin a nasayaat a bambanag a mangparagsak iti biag. Isu nga adda umiso a panggapuantayo a mangitan-ok iti Dios babaen ti panagsaotayo iti nasayaat a bambanag maipapan kenkuana iti inaldaw.