IDI dakkelen ni Jesus ken naammuanna no kasano a nasalakniban idi bassit pay, iti panagkunam nagkararag ngata ken Jehova ket nagyaman kenkuana?— Ania ngata ti imbaga ni Jesus idi agangay kada Maria ken Jose idi naammuanna nga inispalda ti biagna babaen ti panangipanda kenkuana idiay Egipto?—

Siempre, saanen nga ubing ni Jesus. Awan pay ketdin ditoy daga. Ngem ammom kadi nga adda dagiti tattao a kasla mangibilang ken Jesus kas maysa laeng a maladaga a nakaidda iti kulluong?— Pudno daytoy iti panawen ti Krismas. Iti adu a lugar, mailadladawan ni Jesus kas maysa a maladaga no kasta a Krismas.

Nupay awanen ni Jesus ditoy daga, mamatika kadi nga isu ket sibibiag?— Wen, napagungar ni Jesus, ket maysa itan a mannakabalin nga Ari idiay langit. Iti panagkunam, ania ti kabaelanna nga aramiden tapno masalakniban dagidiay agserserbi kenkuana?— Idi adda ni Jesus ditoy daga, impakitana a kabaelanna a salakniban dagidiay agayat kenkuana. Kitaenta no kasano nga inaramidna dayta idi naminsan a nakaluganda kadagiti adalanna iti maysa a barangay.

 Sumipnget idin. Nagmalmalem a nangasaba ni Jesus iti igid ti Baybay ti Galilea, a maysa a dakkel a danaw a 20 kilometro ti kaatiddogna ken 12 kilometro ti kaakabana. Kinunana kadagiti adalanna: “Bumallasiwtayo iti sabali a bangir ti danaw.” Limmuganda ngarud iti barangay ket inrugida ti aglayag a bumallasiw iti danaw. Nabannog unay idi ni Jesus, isu a napan iti kutit ti barangay ket insadagna ti ulona iti pungan. Idi kuan, nargaanen ti turogna.

Saan a naturog dagiti adalan ta isuda ti mangiturturong iti barangay. Pagammuan, nagangin iti napigsa. Timmaud dagiti dadakkel a dalluyon a nangsabuasabuag iti barangay, ket ngannganin mapno ti barangay iti danum.

Nagbuteng dagiti adalan amangan no lumnedda. Ngem saan a nagbuteng ni Jesus. Nakaturog pay laeng iti kutit ti barangay. Idi kamaudiananna, riniing dagiti adalanna, ket kinunada: ‘Mannursuro, Mannursuro, isalakannakami; mataykamin iti daytoy a bagyo.’ Bimmangon ni Jesus ket binilinna ti angin ken dagiti dalluyon. “Agtalnaka! Agulimekka!” kinunana.

Dagus a nagsardeng ti angin, ket limminak ti danaw. Nasdaaw  dagiti adalan. Awan pay kasta a nakitada idi. Kinunada iti maysa ken maysa: “Siasino a pudpudno daytoy, ta bilinenna uray dagiti angin ken ti danum, ket agtulnogda kenkuana?”​​—Lucas 8:​22-​25; Marcos 4:​35-​41.

Ammom kadi no siasino ni Jesus?— Ammom kadi no nangalaanna iti dakkel a pannakabalinna?— Saan koma a rumbeng a nagbuteng dagiti adalan idi kaduada ni Jesus, ta saan a gagangay a tao ni Jesus. Kabaelanna ti agaramid kadagiti nakaskasdaaw a banag a saan a maaramid ti sabali a tao. Adda pay estoriaek kenka maipapan iti inaramidna idi adda dimteng a bagyo iti baybay.

Napasamak dayta iti sabali nga aldaw. Idi rumabiin, pinalugan ni Jesus dagiti adalanna iti barangay ket pinaunana ida a bumallasiw iti baybay. Kalpasanna, agmaymaysa a simmang-at ni Jesus iti maysa a bantay. Napan iti dayta a naulimek a disso tapno agkararag ken ni Jehova a Dios nga Amana.

 Limmugan dagiti adalan iti barangay ket inrugida ti naglayag a bumallasiw iti baybay. Ngem pagammuan, dimteng ti napigsa nga angin. Rabii idin. Linukotda ti layag ti barangay ket inrugida ti aggaud. Ngem saanda unay a makaadayo agsipud ta subsubaen ida ti angin. Mayalloallon ti barangay kadagiti dadakkel a dalluyon, ket masabuasabuagan ida ti danum. Inkagumaanda ti agpaigid ngem marigatanda.

Adda pay laeng ni Jesus idiay bantay. Nabayag bassiten nga adda sadiay. Ngem nakitana nga agpegpeggad dagiti adalanna gapu kadagiti dadakkel a dalluyon. Simmalog ngarud iti bantay ket nagturong iti igid ti baybay. Kayat ni Jesus a tulongan dagiti adalanna, isu a nagna a nagturong kadakuada iti rabaw ti nadawel a baybay!

Ania ti mapasamak no magnaka iti rabaw ti baybay?— Lumnedka, ket mabalin a malmeska. Ngem naiduma ni Jesus. Adda naisangsangayan a pannakabalinna. Adayo ti pinagna ni Jesus a nagturong iti barangay. Isu a pumarbangonen idi makita dagiti adalan a magmagna ni Jesus iti rabaw ti danum nga agturong kadakuada. Ngem saanda a patien ti nakitada. Napalalo ti butengda nga urayda la nagiikkis. Kinuna ni Jesus kadakuada: “Bumilegkayo, siak daytoy; dikay agbuteng.”

Apaman a nakalugan ni Jesus iti barangay, nagsardeng ti bagyo. Nasdaaw manen dagiti adalan. Nagruknoyda ken Jesus ket kinunada: “Pudno a sika ti Anak ti Dios.”​​—Mateo 14:22-​33; Juan 6:​16-​21.

Saan kadi a nagsayaat koma ketdin a maimatangan dagiti kasta nga inaramid ni Jesus?— Ammom kadi no apay a nagaramid ni Jesus kadagiti kasta a milagro?— Inaramidna dagita agsipud ta ay-ayatenna dagiti adalanna ken kayatna a tulongan ida. Ngem inaramidna met dagita tapno ipakitana ti dakkel a pannakabalin nga adda kenkuana ken usarennanto iti masanguanan kas Agturay iti Pagarian ti Dios.

Uray ita masansan nga usaren ni Jesus ti pannakabalinna a mangsalaknib kadagiti pasurotna iti panangikagumaan ni Satanas  a mangpasardeng kadakuada a makisarita kadagiti dadduma maipapan iti Pagarian ti Dios. Ngem saan nga us-usaren ni Jesus ti pannakabalinna a mangsalaknib kadagiti adalanna tapno saanda nga agsakit wenno mangpaimbag kadakuada no masakitda. Natay idi kamaudiananna uray dagiti amin nga apostol ni Jesus. Napapatay ni Santiago a kabsat ni Juan, ken naibalud ni Juan a mismo.​​—Aramid 12:2; Apocalipsis 1:9.

Kasta met laeng itatta. Agserserbi man dagiti tattao ken ni Jehova wenno saan, agsakit ken matayda amin. Ngem iti saanen a mabayag, inton agturay ni Jesus kas Ari ti gobierno ti Dios, sabalinton ti kasasaad. Iti dayta a tiempo, awanton ti mabuteng agsipud ta usarento ni Jesus ti pannakabalinna nga agpaay iti pagimbagan dagiti amin nga agtulnog kenkuana.​​—Isaias 9:​6, 7.