SIGURADO nga umanamongka nga addada nangatngato, wenno dakdakkel ken napigpigsa, ngem kadata. Siasino ti maibagam a nangatngato?— Ni Jehova a Dios. Ti met ngay Anakna, ti Naindaklan a Mannursuro? Nangatngato aya ngem kadatayo?— Wen.

Idiay langit ti dati a pagnanaedan ni Jesus a kaduana ti Dios. Maysa idi nga espiritu nga Anak, wenno anghel. Nagaramid kadi ti Dios iti dadduma pay nga anghel, wenno espiritu nga annak?— Wen, minilion nga anghel ti inaramidna. Nangatngato ken nabilbileg met dagitoy nga anghel ngem kadatayo.​​—Salmo 104:4; Daniel 7:10.

Malagipmo kadi ti nagan ti anghel a nakisarita ken Maria?— Ni Gabriel. Imbagana ken Maria nga agbalinto nga Anak ti Dios ti maladagana. Impan ti Dios ti biag ti espiritu nga Anakna iti tian ni Maria tapno mayanak ni Jesus kas maladaga ditoy daga.​​—Lucas 1:26, 27.

Patiem aya dayta a milagro? Patiem kadi a dati nga agnanaed ni Jesus idiay langit a kadua ti Dios?— Kasta ti kinuna ni Jesus. Kasano nga ammo ni Jesus ti maipapan kadagita? Idi ubing pay, mabalin nga imbaga ni Maria kenkuana ti kinuna ni Gabriel. Kasta met, mabalin nga imbaga ni Jose ken Jesus a ti Dios ti agpaypayso nga Ama ni Jesus.

Idi nabautisaran ni Jesus, nagsao pay ti Dios manipud langit a kunkunana: “Daytoy ti Anakko.”  (Mateo 3:17) Ket iti daydi rabii sakbay ti ipapatay ni Jesus, inkararagna: “Ama, padayagennak iti sibaymo iti dayag nga adda kaniak idi iti sibaymo sakbay a naadda ti lubong.” (Juan 17:5) Wen, kiniddaw ni Jesus nga agsubli koma a makipagnaed manen iti Dios idiay langit. Kasano a makapagnaed sadiay?— Mapasamak laeng no pagbalinen manen ni Jehova a Dios kas di makita nga espiritu a persona, wenno anghel.

Ita, adda napateg a damagek kenka. Naimbag kadi amin nga anghel? Ania ti panagkunam?— Adda idi tiempo a naimbagda amin. Ni Jehova ngamin ti nangparsua kadakuada, ket naimbag amin nga inaramidna. Ngem dimteng ti tiempo a nagbalin a dakes ti maysa kadagiti anghel. Kasano a napasamak dayta?

Tapno maammuanta, masapul a sublianta daydi tiempo a panangaramid ti Dios iti immuna a lalaki ken babai, da Adan ken Eva. Kuna ti dadduma a tattao a saan nga agpaypayso ti estoria maipapan kadakuada. Ngem ammo ti Naindaklan a Mannursuro nga agpaypayso dayta.

Idi inaramid ti Dios da Adan ken Eva, inkabilna ida iti nagpintas a hardin iti maysa a lugar a naawagan iti Eden. Maysa daydi a parke, maysa a paraiso. Mabalinda koma ti aganak iti adu, maaddaan iti dakkel a pamilia, ken agbiag nga agnanayon iti Paraiso. Ngem adda napateg a leksion a masapul a masursuroda. Napagsaritaanta daytan. Kitaenta no malagipta pay.

 Kinuna ni Jehova kada Adan ken Eva a mabalinda ti mangan iti amin a prutas a kayatda kadagiti kakaykayuan iti hardin. Ngem adda maysa a kayo a saanda koma a kanen ti bungana. Imbaga ti Dios kadakuada no ania ti mapasamak no manganda iti dayta. Kinunana: “Mataykanto a di bumurong.” (Genesis 2:17) No kasta, ania a leksion ti nasken a masursuro idi da Adan ken Eva?—

Ti panagtulnog. Wen, ti biagtayo agpannuray iti panagtulnog ken Jehova a Dios! Saan nga umdas a kunaen laeng da Adan ken Eva nga agtulnogda kenkuana. Masapul nga ipakitada dayta babaen kadagiti aramidda. No nagtulnogda iti Dios, naipakitada koma nga ay-ayatenda ti Dios ken kayatda nga isu ti Mangituray kadakuada. Iti kasta, nagbiagda koma nga agnanayon iti Paraiso. Ngem gapu ta nanganda iti bunga dayta a kayo, ania ti kayatna a sawen?—

Kayatna a sawen a talaga nga awan panagyamanda iti inted ti Dios kadakuada. Nagtulnogka ngata ken Jehova no addaka koma sadiay?— Idi damo, nagtulnog da Adan ken Eva. Ngem dimteng ti aldaw nga adda nangatngato ngem kadakuada a nangallilaw ken Eva. Isu ti nangallukoy kenkuana a sumukir ken Jehova. Siasino dayta?—

 Kuna ti Biblia nga adda uleg a nakisarita ken Eva. Ngem ammom a di makapagsao ti mismo nga uleg. Kasano ngarud a nakapagsao?— Pinagparang ti maysa nga anghel a kasla ti uleg ti agsasao. Ngem kinapudnona ti anghel ti agsasao. Nagpampanunot dayta nga anghel kadagiti dakes a banag. Kayatna nga isu ti pagdayawan da Adan ken Eva. Kayatna a tungpalenda dagiti bilinna. Kayatna nga agawen ti saad ti Dios.

Gapuna, nangikabil dayta a dakes nga anghel kadagiti di umiso a kapanunotan iti panunot ni Eva. Babaen iti uleg, kinunana kenkuana: ‘Saan a pudno ti imbaga ti Dios kadakayo. Saankayo a matay no mangankayo iti bunga dayta a kayo. Agbalinkayto a masirib a kas iti Dios.’ Namatika kadi koma iti kinuna dayta a timek?—

Nangrugi a tinarigagayan ni Eva ti banag a saan nga inted ti Dios kenkuana. Nangan iti bunga ti maiparit a kayo. Kalpasanna, inikkanna ni Adan. Saan a namati ni Adan iti kinuna ti uleg. Ngem napigpigsa ti tarigagayna a makikadua ken Eva ngem ti ayatna iti Dios. Dayta ti gapuna a nangan met iti bunga ti kayo.​​—Genesis 3:​1-6; 1 Timoteo 2:14.

Ania ti imbungana?— Nagbalin nga imperpekto da Adan ken Eva, limmakay ken bimmaketda, sada natay. Ket gapu ta imperpektoda,  nagbalin met nga imperpekto amin nga annakda ket idi agangay limmakay ken natayda. Saan a nagulbod ti Dios! Pudno a ti biag ket agpannuray iti panagtulnog kenkuana. (Roma 5:12) Kuna ti Biblia kadatayo a ni Satanas a Diablo daydiay anghel a nangulbod ken Eva, ken demonio ti pangawag kadagiti dadduma pay nga anghel a nagbalin a dakes.​​—Santiago 2:​19; Apocalipsis 12:9.

Ita, ammom kadi no apay a dimmakes ti naimbag nga anghel nga inaramid ti Dios?— Rinugianna ngamin ti nagpanunot kadagiti dakes a banag. Kayatna nga isu ti agbalin a Kangatuan. Ammona nga imbaga ti Dios kada Adan ken Eva a maaddaanda kadagiti annak, ket kayatna nga agdayawda amin kenkuana. Kayat ti Diablo nga agsukir amin a tao ken Jehova. Gapuna, ikagkagumaanna ti mangikabil kadagiti di umiso a kapanunotan iti isiptayo.​​—Santiago 1:​13-​15.

Kuna ti Diablo nga awan a pulos ti pudno a mangay-ayat ken Jehova. Ibagbagana a dita ay-ayaten ti Dios ken saan nga agpaypayso a kayatta a tungpalen dagiti bilin ti Dios. Kunana nga agtultulnogtayo laeng ken Jehova no maitunos dayta iti kayattayo. Umiso kadi ti Diablo? Kastatayo aya?

Kinuna ti Naindaklan a Mannursuro nga ulbod ti Diablo! Pinaneknekan ni Jesus a talaga nga ay-ayatenna ni Jehova babaen ti panagtulnogna Kenkuana. Ket saan laeng a dagidiay nalaka a banag ti nagtulnogan ni Jesus iti Dios. Kankanayon a nagtulnog, uray pinarigat dagiti sabsabali. Nagmatalek ken Jehova agingga iti ipapatayna. Dayta ti gapuna a pinagungar ti Dios tapno agbiag nga agnanayon.

No kasta, siasino ti ammom a kangrunaan a kabusortayo?— Wen, ni Satanas a Diablo. Makitam kadi ni Satanas?— Siempre saan! Ngem ammotayo nga adda Satanas ken nangatngato ken nabilbileg ngem kadatayo. Ngem siasino ti nangatngato ngem iti Diablo?— Ni Jehova a Dios. Isu nga ammotayo a masalaknibannatayo ti Dios.