ANIA ti kaykayatmo, agtrabaho wenno agay-ayam?— Kinapudnona, saan a dakes ti agay-ayam. Kuna ti Biblia a ‘napno [ti Jerusalem] iti ubbing a lallaki ken ubbing a babbai nga agay-ayam kadagiti publiko a plasana.’​​—Zacarias 8:5.

Naragsakan ti Naindaklan a Mannursuro a mangbuybuya kadagiti agay-ayam nga ubbing. Sakbay nga immay ditoy daga, kinunana: “Addaak idi iti sibay [ti Dios] kas nasigo a managobra, . . . yantangay maragragsakanak iti sanguananna iti isuamin a tiempo.” Sigun ditoy, ni Jesus ket maysa a managobra wenno trabahador a kadua ni Jehova idiay langit. Ket idi adda sadiay, kinunana: “Ti bambanag a pakaay-ayatak mainaig iti annak ti tattao.” Wen, kas naammuantan, pudno nga interesado kadatayo amin ti  Naindaklan a Mannursuro, a pakairamanan dagiti ubbing.​​—Proverbio 8:​30, 31.

Panagkunam nagay-ayam ngata ni Jesus idi ubing?— Mabalin a kasta. Ngem gapu ta maysa idi a “nasigo a managobra” idiay langit, nagtrabaho met kadi ditoy daga?— Kinapudnona, naawagan ni Jesus kas “ti anak ti allawagi.” Ngem naawagan met a “ti allawagi” wenno karpintero. Ania ti ipakita daytoy?— Sigurado a sinursuruan ni Jose gapu ta isu ti nangpadakkel ken Jesus kas pannakaamana. Gapuna, nagbalin met a karpintero ni Jesus.​​—Mateo 13:55; Marcos 6:3.

Ania a kita ti karpintero ni Jesus?— Yantangay nasigo idi a trabahador idiay langit, panagkunam saan ngata a nasigo a karpintero idi adda ditoy daga?— Panunotem no kasano karigat ti  agkarpintero kadagidi a tiempo. Mabalin a mapan agpukan ni Jesus iti kayo, ragadienna, bunagenna nga iyawid, sana aramiden a lamisaan, tugaw, ken dadduma pay.

Panagkunam naragsakan ngata ni Jesus iti daytoy a trabaho?— Dika ngata maragsakan no makaaramidka kadagiti nagsayaat a lamisaan ken tugtugaw ken dadduma pay a banag nga usaren dagiti tattao?— Kuna ti Biblia a nagsayaat a ‘pagrag-oan ti tao dagiti aramidna.’ Adda sabali a ragsak iti panagtrabaho a di matagiragsak iti panagay-ayam.​​—Eclesiastes 3:22.

Kinapudnona, ti trabaho pasayaatenna ti panunot ken ti bagitayo. Adu ti ubbing a di agtartrabaho. Agtugtugawda laeng nga agbuya iti TV wenno agay-ayam iti video game. Napalalo ti lukmegda ken nakapuyda, ket saanda a pudno a naragsak. Ken dida met maparagsak dagiti dadduma. Ania ti nasken nga aramidentayo tapno agbalintayo a naragsak?—

Naammuanta iti Kapitulo 17 daytoy a libro a makaparagsak ti panangted ken panangtulong kadagiti sabsabali. (Aramid 20:35) Sigun iti Biblia, ni Jehova “ti naragsak a Dios.” (1 Timoteo 1:11) Ken kas nabasata iti Proverbio, ‘maragragsakan [ni Jesus] iti sanguananna iti isuamin a tiempo.’ Apay a naragsak ni Jesus?— Kastoy ti imbagana a maysa a makagapu: “Ni Amak agtultuloy nga agar-aramid [wenno agtartrabaho] agingga ita, ket agtultuloyak nga agar-aramid [wenno agtartrabaho].”​​—Juan 5:17.

Idi adda ni Jesus ditoy daga, saan a panagkarpintero ti trabahona iti unos ti panagbiagna. Adda naisangsangayan nga impatrabaho ni Jehova a Dios kenkuana ditoy daga. Ammom kadi no ania dayta?— Kinuna ni Jesus: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Idi nangaskasaba ni Jesus kadagiti tattao, no dadduma mamatida kenkuana ken estoriaenda kadagiti sabsabali no ania dagiti imbagana. Kasta ti inaramid ti Samaritana a makitam ditoy.​​—Juan 4:​7-​15, 27-​30.

 Kasano ti panangmatmat ni Jesus iti panangaramidna iti daytoy a trabaho? Panagkunam tinarigagayanna ngata nga aramiden dayta?— Kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Ania ti mariknam no mangmanganka iti paboritom a taraon?— Umasping iti dayta, magustuan unay ni Jesus ti trabaho nga impaaramid ti Dios kenkuana.

Dinisenionatayo ti Dios a no sursuruentayo ti agtrabaho agbalintayo a naragsak. Kunana a ti regalona iti tao ket “agrag-o [koma] iti napinget a panagtrabahona.” Isu a no masursurom ti agtrabaho bayat nga ubingka pay, naragragsakto ti intero a panagbiagmo.​​—Eclesiastes 5:19.

Dina kayat a sawen a maaramid ti bassit nga ubing ti trabaho ti nataengan, ngem makaaramidtayo amin iti nadumaduma a trabaho. Mabalin nga agtrabaho nga inaldaw dagiti dadakkelmo tapno makaurnongda iti kuarta a pagbiag ti pamiliayo. Ken laglagipem koma nga adu ti trabaho a nasken nga aramiden iti pagtaengan tapno kanayon a naurnos ken nadalus.

Ania a trabaho ti maaramidmo a pagsayaatan ti intero a pamilia?— Mabalinmo ti tumulong nga agidasar iti lamisaan, aginnaw kadagiti pinggan, agibasura, mangdalus iti pagturturogam, ken mangitarimaan kadagiti abalbalaymo. Nalabit ar-aramidemon ti dadduma kadagita. Pudno a pagsayaatan ti pamilia dayta a trabaho.

Kitaenta no kasano a pagsayaatan ti kasta a trabaho. Masapul a maitarimaan dagiti abalbalay kalpasan ti panagay-ayam. Panagkunam apay a napateg daytoy?— Makatulong dayta tapno naurnos ti balay, ken tapno maliklikan met dagiti aksidente. No dimo itarimaan dagiti abalbalaymo, mabalin nga addanto tiempo a sumrek ni nanangmo nga adu ti awitna ket mapayatanna ti maysa kadagita. Mabalin a maigalis, matuang, ken madangran. Baka mayospital pay ketdi. Saan kadi a makapaladingit ti kasta?— Isu a no itarimaanmo dagiti abalbalaymo kalpasan ti panagay-ayammo, pagsayaatanyo amin dayta.

 Adda pay sabali a trabaho a maaramid dagiti ubbing. Kas pagarigan, ti panageskuela. Idiay eskuelaan masursurom ti agbasa. Dagiti dadduma nga ubbing maragsakanda nga agbasa, ngem kuna dagiti dadduma a marigatanda. Uray no kasla narigat iti damo, maragsakankanto no masursurom ti agbasa a naimbag. No ammom ti agbasa, adu ti makapainteres a banag a masursurom. Mabasamto pay ketdin ti mismo a libro ti Dios, ti Biblia. No kasta, saan kadi a pudno a makagunggona no nagagetka nga ageskuela?—

Dagiti dadduma a tattao ikagkagumaanda a liklikan ti trabaho. Mabalin nga adda am-ammom a kasta. Ngem gapu ta dinisenionatayo ti Dios nga agtrabaho, nasken a sursuruentayo no kasano a tagiragsaken dayta. Kasano karagsak ti Naindaklan a Mannursuro iti trabahona?— Mayasping dayta iti pannangan iti paboritona a taraon. Ket ania a trabaho ti tuktukoyenna?— Ti panangibaga kadagiti tattao maipapan ken Jehova a Dios ken no kasanoda a maaddaan iti biag nga agnanayon.

Gapuna, daytoy ti makatulong kadatayo a mangtagiragsak iti trabaho. Isaludsodmo iti bagim, ‘Apay a nasken a maaramid daytoy a trabaho?’ No ammom no apay a napateg ti maysa a banag, ad-adda a matignayka a mangaramid iti dayta. Ket dakkel man wenno bassit ti trabaho, nagagetka koma. No nagagetka, matagiragsakmo ti bukodmo a trabaho, a kas iti Naindaklan a Mannursurotayo.