KAPITULO 31
No Sadino ti Pakasarakan iti Liwliwa
NALADINGIT ken nalidayka kadi no dadduma?— Pampanunotem kadi no adda met laeng mangay-ayat kenka?— Kasta ti marikna dagiti dadduma nga ubbing. Ngem inkari ti Dios: “Saankanto a malipatan.” (Isaias 49:15) Saan kadi a makaliwliwa a panunoten dayta?— Wen, pudno nga ay-ayatennatayo ni Jehova a Dios!
Ania ngata ti marikna daytoy napukaw a bassit a karnero?
Kinuna ti maysa a tao a nagsurat iti Biblia: ‘No kas pagarigan panawandak da amak ken inak, pidutennakto ni Jehova.’ (Salmo 27:10) Saan kadi a pudno a makaliwliwa dayta kadatayo?— Wen, kuna ni Jehova kadatayo: “Dika agbuteng, ta addaak kenka. . . . Pudno a tulongankanto.”—Isaias 41:10.
Ngem no dadduma, ipalubos ni Jehova a parigatennatayo ni Satanas. Ipalubos pay ni Jehova a suoten ni Satanas dagiti adipenna. Naminsan, pinarigat ti Diablo ni Jesus iti kasta unay nga uray la impukkaw ni Jesus ken Jehova: “Diosko, Diosko, apay a binaybay-annak?” (Mateo 27:46) Nupay nagsagaba ni Jesus, ammona latta nga isu ket ay-ayaten ni Jehova. (Juan 10:17) Ngem ammo met ni Jesus nga ipalubos ti Dios a suoten ken parigaten ni Satanas dagiti adipenna. Iti sabali a kapitulo, ammuentanto no apay nga ipalubos ti Dios nga aramiden daytoy ni Satanas.
No ubingka pay, nalakaka laeng a mabutbuteng. Kas pagarigan, nayaw-awanka kadin?— Nagamakka kadi?— Kasta dagiti adu nga ubbing. Naminsan, adda inestoria ti Naindaklan a Mannursuro maipapan iti maysa a napukaw. Ngem saan nga ubing ti napukaw. Maysa a karnero.
Iti dadduma a pamay-an, mayarigka iti maysa a karnero. Kasano a kasta? Saan unay a dadakkel wenno napipigsa dagiti karnero. Kasapulan nga adda mangaywan ken mangsalaknib kadakuada. Pastor ti awag iti tao nga agay-aywan kadagiti karnero.
Iti estoriana, insalaysay ni Jesus ti maipapan iti maysa a pastor nga addaan iti sangagasut a karnero. Ngem napukaw ti maysa kadagiti karnero. Nalabit kayatna a kitaen no ania ti adda iti bangir ti turod. Ngem idi kuan, nayadayo unayen dayta a karnero kadagiti dadduma. Ania ngata ti narikna dayta a karnero idi tumaliaw ket nakitana nga agmaymaysa laengen?—
Ania ti aramiden ti pastor no natakuatanna a napukaw ti maysa kadagiti karnerona? Ibagana aya nga apay koma a pakadanaganna dayta a karnero idinto ta basolna met laeng ti pannakapukawna? Wenno panawanna kadi dagiti 99 a karnero iti natalged a disso ket mapanna biroken daydiay maysa laeng a napukaw? Masapul kadi a pagbannoganna a biroken ti maysa a karnero?— No sika dayta napukaw a karnero, kayatmo kadi a mapannaka biroken ti pastor?—
Siasino ti kas iti pastor a nangisalakan iti karnerona?
Ipatpateg unay ti pastor dagiti amin a karnerona, uray daydiay napukaw. Napanna ngarud binirok daydiay napukaw. Panunotem laengen ti ragsak dayta a napukaw a karnero idi makitana a sumungsungad ti pastor! Ket kinuna ni Jesus a kasta unay ti ragsak ti
pastor idi masarakanna ti karnerona. Ad-adda a naragsakan iti dayta ngem kadagiti 99 a karnero a saan a napukaw. Ita, siasino ti kas iti dayta a pastor iti estoria ni Jesus? Siasino ti mangipatpateg unay kadatayo a kas iti panangipateg dayta a pastor kadagiti karnerona?— Kinuna ni Jesus nga ipatpategnatayo unay ti Amana nga adda sadi langit. Ket ni Jehova a Dios ti Amana.Ni Jehova a Dios ti Naindaklan a Pastor ti ilina. Ay-ayatenna dagiti amin nga agserserbi kenkuana, agraman dagiti ubbing a kas kenka. Dina kayat a madangran wenno madadael ti asinoman kadatayo. Anian a makaliwliwa a maammuan nga ipatpategnatayo unay ti Dios!—Mateo 18:12-14.
Agpaypayso kadi kenka ni Jehova a kas ken tatangmo wenno ti sabali a tao?
Talaga kadi a mamatika ken Jehova a Dios?— Agpaypayso met laeng kadi kenka?— Pudno a ditay makita ni Jehova. Maysa ngamin nga Espiritu. Adda bagina a ditay makita. Ngem isu ket pudpudno a maysa a persona, ken makitanatayo. Ammona no kaano a kasapulantayo ti tulong. Ken mabalintayo ti makisao kenkuana babaen ti kararag, kas iti
pannakisaotayo iti sabali a tao ditoy daga. Kayat ni Jehova nga agkararagtayo kenkuana.Ania ngay ngarud ti aramidem no naladingit wenno agmaymaysaka?— Makisaoka ken Jehova. Umasidegka kenkuana, ket liwliwaen ken tulongannaka. Laglagipem nga ay-ayatennaka ni Jehova, uray no mariknam a kasla agmaymaysaka. Alaenta ti Bibliata. Ditoy Salmo 23, kastoy ti mabasata, mangrugi iti bersikulo 1: “Ni Jehova ti Pastorko. Saanakto nga agkurang iti aniaman. Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak.”
Kitaem no ania pay ti kuna ti nagsurat, iti bersikulo 4: “Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak; ti baston ken sarukodmo isuda ti bambanag a mangliwliwa kaniak.” Kasta ti rikna dagiti tattao no ni Jehova ti Diosda. Makasarakda iti liwliwa no agpeggadda. Kasta met kadi ti panagriknam?—
Aywanan a naimbag ni Jehova dagiti tattaona a kas iti panangaywan ti naayat a pastor kadagiti karnerona. Idalanna ida iti rumbeng a papananda, ket maragsakanda a sumurot kenkuana. Uray no agpeggadda, awan ti rumbeng a pagbutnganda. Usaren ti maysa a pastor ti baston wenno sarukodna a mangsalaknib kadagiti karnero tapno saan ida a maranggasan dagiti dadduma nga animal. Saritaen ti Biblia ti maipapan 1 Samuel 17:34-36) Ammo dagiti adipen ti Dios a salakniban met ida ni Jehova. Natalgedda agsipud ta adda kadakuada ti Dios.
iti panangsalaknib ti maysa nga agtutubo a pastor a ni David kadagiti karnerona manipud iti maysa a leon ken oso. (Kas iti panangsalaknib ti maysa a pastor kadagiti karnerona, siasino ti makatulong kadatayo no agpeggadtayo?
Pudno nga ipatpateg ni Jehova dagiti karnerona, ken sidudungngo nga aywananna ida. Kuna ti Biblia: ‘Kas iti maysa a pastor idalanna dagiti karnerona. Babaen ti takiagna ummongenna dagiti babassit.’—Isaias 40:11.
Saanka kadi a maragsakan a makaammo a kasta ni Jehova?— Kayatmo kadi ti agbalin a maysa kadagiti karnerona?— Ipangag dagiti karnero ti timek ti pastorda. Kanayon nga addada iti asidegna. Ipangpangagmo kadi ni Jehova?— Asidegka kadi kenkuana?— Awan ngarud ti rumbeng a pagbutngam. Adda kenka ni Jehova.
Siaayat nga ay-aywanan ni Jehova dagidiay agserserbi kenkuana. Basaenta ti kuna ti Biblia maipapan iti daytoy, iti Salmo 37:25; 55:22; ken Lucas 12:29-31.