IPAPANMO nga adda nangted kenka iti naisangsangayan unay a regalo. Ania ti makunam iti dayta?— Basta agyamanka kadi lattan ket kalpasanna lipatemon daydiay nangiregalo iti dayta? Wenno laglagipem kadi dayta a tao ken ti inaramidna kenka?—

Inikkannatayo ni Jehova a Dios iti naisangsangayan unay a regalo. Imbaonna ti Anakna ditoy daga tapno matay para kadatayo. Ammom kadi no apay a kasapulan a matay ni Jesus para kadatayo?— Nakapatpateg daytoy isu a rumbeng a matarusantayo koma.

Kas naammuanta iti Kapitulo 23, nagbasol ni Adan idi sinalungasingna ti awan pagkuranganna a linteg ti Dios. Ket natawidtayo ti basol ken Adan, ti ama a nagtaudantayo amin. No kasta, ania iti panagkunam ti kasapulantayo?— Arigna kasapulantayo ti baro nga ama, daydiay nagbiag a perpekto ditoy daga. Siasino ti ammom a perpekto ken posible nga agbalin nga amatayo?— Ni Jesus.

Imbaon ni Jehova ni Jesus ditoy daga tapno agbalin a pannakaamatayo imbes a ni Adan. Kuna ti Biblia: “‘Ti umuna a tao a ni Adan nagbalin a kararua a sibibiag.’ Ti maudi nga Adan nagbalin a mangted-biag nga espiritu.” Siasino ti umuna nga Adan?— Wen, daydiay pinarsua ti Dios manipud iti tapok ti daga. Siasino ti maikadua nga Adan?— Ni Jesus. Ipakita daytoy ti Biblia, a kunana: “Ti immuna a tao [ni Adan] nagtaud iti daga ken naaramid iti tapok; ti maikadua a tao [ni Jesus] naggapu idiay langit.”​​—1 Corinto 15:​45, 47; Genesis 2:7.

Yantangay idiay langit ti nangalaan ti Dios iti biag ni Jesus sana impan iti aanakan ni Maria, awan a pulos ti natawid ni Jesus a basol  manipud ken Adan. Dayta ti gapuna a perpekto a tao ni Jesus. (Lucas 1:​30-​35) Dayta met ti makagapu no apay a kinuna ti anghel kadagiti agpaspastor idi mayanak ni Jesus: “Nayanak kadakayo ita nga aldaw ti maysa a Manangisalakan.” (Lucas 2:11) Ngem tapno agbalin a Manangisalakantayo, ania ti umuna a masapul nga aramiden idi ti maladaga a ni Jesus?— Masapul a dumakkel ken agbalin a nataengan a tao, a kas ken Adan. Iti kasta agbalin ni Jesus a ‘maikadua nga Adan.’

Ni Jesus a Manangisalakantayo agbalinto met nga ‘Agnanayon nga Amatayo.’ Naawagan ti kasta iti Biblia. (Isaias 9:​6, 7) Wen, ni perpekto a Jesus ti agbalin nga amatayo imbes a ni Adan, a nagbalin nga imperpekto idi nagbasol. Iti kasta mabalintayo a pilien ‘ti maikadua nga Adan’ kas amatayo. Siempre, ni Jesus ket Anak ni Jehova a Dios.

Babaen ti panangam-ammotayo ken Jesus, mabalintayo nga awaten kas Manangisalakantayo. Malagipmo kadi no ania ti nasken a pakaisalakanantayo?— Wen, manipud iti basol ken ipapatay a natawidtayo ken Adan. Ti perpekto a biag kas nataenganen a tao nga insakripisio ni Jesus para kadatayo ket maawagan iti subbot. Ni Jehova ti nangipaay iti subbot tapno mapakawan dagiti basoltayo.​​—Mateo 20:28; Roma 5:8; 6:23.

Sigurado a ditay kayat a lipaten ti naaramidan kadatayo ti Dios ken ti Anakna, di ngamin?— Adda impakita ni Jesus kadagiti pasurotna a naisangsangayan a wagas a makatulong kadatayo a  manglaglagip iti inaramidna. Pagsaritaanta dayta.

Ipapanmo nga addaka iti makinngato a siled ti maysa a balay idiay Jerusalem. Rabii. Nakasango ni Jesus ken dagiti apostolna iti lamisaan. Nakadasar iti lamisaan ti natuno a kordero, tinapay, ken nalabaga nga arak. Espesial dayta a pannanganda. Ammom kadi no apay?—

Daytoy a pannangan ipalagipna kadakuada ti inaramid ni Jehova ginasut a tawen idin ti napalabas, idi naadipen idiay Egipto ti ilina nga Israel. Iti daydi a tiempo kinuna ni Jehova iti ilina: ‘Mangpartikayo iti kordero para iti kada pamilia, ket iwarsiyo ti darana  kadagiti ridaw dagiti balayyo.’ Sa kinunana: ‘Sumrekkayo kadagiti balayyo, ket kanenyo ti kordero.’

Kasta ti inaramid dagiti Israelita. Ket iti dayta met la a rabii, limmabas ti anghel ti Dios iti intero a daga ti Egipto. Iti kaaduan a balbalay, pinapatay ti anghel ti inauna nga anak. Ngem idi nakita ti anghel ti dara ti kordero kadagiti ridaw, linabsanna dayta a balay. Awan ti natay nga ubbing kadagidiay a balay. Nagbuteng ni Faraon nga ari ti Egipto iti inaramid ti anghel ni Jehova. Gapuna, kinuna ni Faraon kadagiti Israelita: ‘Nawayakayon a mapan. Pumanawkayo iti Egipto!’ Iti kasta, inluganda dagiti alikamenda kadagiti kamelio ken asno ket pimmanawdan.

Di kayat ni Jehova a malipatan ti ilina ti panangluk-atna kadakuada. Gapuna, kinunana: ‘Maminsan iti makatawen, masapul a mangankayo iti kas ti kinnanyo ita a rabii.’ Inawaganda iti Paskua daytoy naisangsangayan a pannangan. Iti daydi a rabii ‘linabsan’ ti anghel ti Dios dagiti balay a namarkaan iti dara.​​—Exodo 12:​1-​13, 24-​27, 31.

Pinampanunot daytoy ni Jesus ken dagiti apostolna idi mangmanganda iti Paskua. Kalpasanna, adda nakapatpateg nga inaramid ni Jesus. Ngem sakbay dayta, pinapanawna ti di matalek nga apostol, ni Judas. Kalpasanna nangala ni Jesus iti maysa kadagiti nabati a tinapay, nagkararag, pinispisina, sana impasa kadagiti adalanna. “Alaenyo, kanenyo,” kunana. Sana kinuna kadakuada: ‘Daytoy a tinapay kaipapananna ti bagik nga itedkonto inton matayak a maipaay kadakayo.’

Simmaganad, nangala ni Jesus iti sangakopa a nalabaga nga arak. Kalpasan ti maysa pay a kararag a panagyaman, impasana dayta sa kunana: “Uminumkayo manipud iti dayta, dakayo amin.” Sa kinunana kadakuada: ‘Daytoy nga arak kaipapananna ti darak. Di agbayag maiparukpokto ti darak tapno maluk-atankayo kadagiti basolyo. Itultuloyyo nga aramiden daytoy kas panglaglagip kaniak.’​​—Mateo 26:26-​28; 1 Corinto 11:23-​26.

 Nadlawmo kadi a kinuna ni Jesus a masapul nga itultuloy dagiti adalan nga aramiden daytoy kas panglaglagipda kenkuana?— Saanen a kasapulan a manganda iti Paskua. Imbes ketdi, maminsan iti kada tawen rambakanda daytoy naisangsangayan a pannangan tapno malaglagipda ni Jesus ken ti ipapatayna. Daytoy a pannangan ket maawagan iti Pangrabii ti Apo. Ita masansan nga awagantayo dayta iti Memorial wenno Panglaglagip. Apay?— Agsipud ta ipalagipna kadatayo ti inaramid ni Jesus ken ti Amana, ni Jehova a Dios, para kadatayo.

Ti tinapay ipalagipna koma kadatayo ti bagi ni Jesus. Situtulok nga insakripisiona dayta a bagi tapno maaddaantayo iti biag nga agnanayon. Ti met ngay nalabaga nga arak?— Dayta koma ti mangipalagip kadatayo iti pateg ti dara ni Jesus. Napatpateg dayta ngem iti dara ti kordero iti Paskua idiay Egipto. Ammom kadi no apay?— Kuna ti Biblia a ti dara ni Jesus mapakawanna dagiti basbasoltayo. Ket inton maikkat aminen a basbasoltayo, saantayton nga agsakit, lumakay, ken matay. Laglagipentayo koma dayta no tumabunotayo iti Memorial.

Rumbeng kadi a mangantayo amin iti tinapay ken uminumtayo amin iti arak kabayatan ti Memorial?— Kastoy ti imbaga ni Jesus kadagidiay mangan ken uminum: ‘Makipasetkayto iti pagariak ken kaduakayto nga agtugaw kadagiti trono idiay langit.’ (Lucas 22:​19, 20, 30) Kayat a sawen daytoy a mapanda idiay langit tapno agbalinda nga ar-ari a kakadua ni Jesus. No kasta, dagidiay laeng addaan iti namnama a makipagturay ken Jesus idiay langit ti rumbeng a mangan iti tinapay ken uminum iti arak.

Ngem rumbeng a tumabuno iti Memorial uray dagidiay saan a mangan iti tinapay wenno uminum iti arak. Ammom kadi no apay?— Agsipud ta inted met ni Jesus ti biagna nga agpaay kadatayo. No tumabunotayo iti Memorial, ipakpakitatayo a ditay nakalipat. Silalagiptayo iti nagsayaat a sagut ti Dios.