ITI naudi a dua a kapitulo, mano ti nabasata a napagungar?— Lima. Mano ti ubbing?— Tallo. Ken maysa a barito ti maikapat. Panagkunam, ania ti ipakpakita daytoy?—

Ipakpakitana nga ay-ayaten ti Dios dagiti ubbing ken agtutubo. Ngem adunto pay ti pagungarenna. Dagidiay laeng kadi nagaramid iti naimbag ti pagungaren ti Dios?— Mabalin a kasta ti ipagaruptayo. Ngem adu ti di pulos nakaammo iti kinapudno maipapan ken Jehova a Dios ken iti Anakna. No kasta, nagaramidda iti dakes gapu ta di umiso dagiti naisuro kadakuada. Panagkunam pagungarento ngata ni Jehova dagiti kakasta a tattao?—

Kuna ti Biblia: “Addanto panagungar agpadpada dagiti nalinteg ken dagiti nakillo.” (Aramid 24:15) Apay a mapagungar dagidiay saan a nalinteg, wenno saan a nagaramid iti umiso?— Gapu ta dida pulos naaddaan iti gundaway a mangammo iti maipapan ken Jehova ken no ania dagiti ipapaaramidna kadagiti tattao.

 Kaanonto ngata a mapagungar dagiti tattao?— Panunotem ti napasamak idi natay ni Lazaro ken ti inkari ni Jesus ken ni Marta a kabsatna: “Bumangonto ni kabsatmo.” Insungbat ni Marta: “Ammok a bumangonto inton panagungar iti kamaudianan nga aldaw.” (Juan 11:​23, 24) Ania ti kayat a sawen ni Marta idi kinunana a bumangonto ni Lazaro iti “kamaudianan nga aldaw”?—

Nadamag ngamin ni Marta ti maipapan iti kari ni Jesus: ‘Amin dagidiay adda kadagiti pakalaglagipan a tanem rummuardanto.’ (Juan 5:​28, 29) No kasta, ti “kamaudianan nga aldaw” ket inton mapagungar dagiti amin nga adda iti lagip ti Dios. Daytoy a maudi nga aldaw ket saan a maysa nga aldaw a 24 nga oras. Agpautto dayta iti sangaribu a tawen. Iti dayta nga aldaw, kuna ti Biblia a ‘ti Dios ukomennanto dagiti tattao ditoy daga.’ Dagidiay mapagungar ket karamanto kadagidiay ukomenna.​​—Aramid 17:31; 2 Pedro 3:8.

Anian a nakaragragsakto dayta nga aldaw! Iti las-ud dayta a sangaribu a tawen, agungarto ti minilion a tattao a natay. Paraiso ti awag ni Jesus iti lugar a pagnaedandanto. Kitaenta no sadinonto ti ayan ti Paraiso ken no anianto ti kasasaad sadiay.

Agarup tallo nga oras sakbay ti ipapatay ni Jesus iti kayo a pagtutuokan, adda Paraiso a dinakamatna iti lalaki a nailansa iti abayna. Pinapatayda ti lalaki gapu kadagiti naaramidanna a krimen. Ngem bayat a buybuyaen daytoy a kriminal ni Jesus ken nangngegna ti ibagbagada  maipapan Kenkuana, nangrugi a mamati ken Jesus. Isu a kinuna ti kriminal: “Laglagipennak inton makagtengka iti pagariam.” Simmungbat ni Jesus: “Pudno ibagak kenka ita nga aldaw, makikaduakanto kaniak idiay Paraiso.”​​—Lucas 23:​42, 43.

Ania ti kayat a sawen ni Jesus idi imbagana daytoy? Sadino ti Paraiso?— Panunotem daytoy. Sadino idi ti nangrugian ti Paraiso?— Laglagipem, inikkan ti Dios ti immuna a tao a ni Adan ken ti asawana iti paraiso a pagnaedanda ditoy daga a mismo. Naawagan dayta iti hardin ti Eden. Adda dagiti animal iti dayta a hardin, ngem saanda a mangranggas. Ken addada kaykayo nga agbungbunga iti adu ken agkakaimas, ken adda maysa a dakkel a karayan. Nakasaysayaat a lugar a pagnaedan!​​—Genesis 2:​8-​10.

Isu a no mabasatayo nga agnaedto dayta a kriminal idiay Paraiso, iladawantayo koma iti panunottayo nga agbalinto daytoy daga a nagpintas a lugar a pagnaedan. Addanto kadi a mismo ni Jesus ditoy daga a kaduana ti dati a kriminal iti Paraiso?— Awan. Ammom kadi no apay nga awanto ni Jesus ditoy?—

Agsipud ta idiayto langit ti ayan ni Jesus kas Ari a mangituray iti Paraiso ditoy daga. No kasta, kayatna a sawen a kaduanto ni Jesus dayta a lalaki gapu ta pagungaren ken ipaayto ni Jesus dagiti kasapulanna. Ngem apay nga ipalubos ni Jesus nga agnaed iti Paraiso ti dati a kriminal?— Ammuenta ti sungbat.

 Sakbay a nakisarita ken Jesus ti kriminal, ammona kadin ti maipapan kadagiti panggep ti Dios?— Saan. Nagaramid iti kinadakes gapu ta saanna nga ammo idi ti kinapudno maipapan iti Dios. Idiay Paraiso, maisuronto kenkuana dagiti panggep ti Dios. Iti kasta maikkanto iti gundaway tapno paneknekanna a talaga nga ay-ayatenna ti Dios babaen ti panagaramidna iti pagayatan ti Dios.

Amin kadi a mapagungar ket agnaedto iti Paraiso ditoy daga?— Saan. Ammom kadi no apay a saan?— Agsipud ta dadduma ti mapagungarto tapno agnaedda idiay langit a kadua ni Jesus. Kaduananto ida kas ar-ari a mangituray iti Paraiso a daga. Kitaenta no kasano a masiguradota daytoy.

Iti daydi rabii sakbay ti ipapatay ni Jesus, kinunana kadagiti apostolna: ‘Idiay balay ni Amak idiay langit, adu ti pagyanan, ket mapanak tapno mangisaganaak iti lugar a maipaay kadakayo.’ Kalpasanna, inkari ni Jesus kadakuada: “Umayak manen ket awatenkayto nga ikuyog kaniak, tapno no sadino ti ayanko addakayo met koma.”​​—Juan 14:​2, 3.

 Sadino ti napanan ni Jesus kalpasan a nagungar?— Wen, nagsubli ken Amana idiay langit. (Juan 17:​4, 5) No kasta, inkari ni Jesus kadagiti apostolna ken iti dadduma pay a pasurotna a pagungarenna ida tapno makikaduadanto kenkuana idiay langit. Anianto ti aramidenda sadiay a kadua ni Jesus?— Kuna ti Biblia a dagiti adalanna a karaman iti “umuna a panagungar” agnaeddanto idiay langit ken iturayandanto ti daga “kas ar-ari [a kakaduana] iti sangaribu a tawen.”​​—Apocalipsis 5:​10; 20:6; 2 Timoteo 2:12.

Manonto ti karaman iti “umuna a panagungar” ken agturay a kadua ni Jesus kas ar-ari?— Kinuna ni Jesus kadagiti adalanna: “Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.” (Lucas 12:32) Daytoy “bassit nga ipastoran,” a mapagungar a kadua ni Jesus iti nailangitan a Pagarianna, ket addaan iti masnup a bilang. Ipakita ti Biblia a “sangagasut uppat a pulo ket uppat a ribu” ti mapagungar ditoy daga.​​—Apocalipsis 14:​1, 3.

Manonto ti agbiag iti Paraiso ditoy daga?— Saan nga ibaga ti Biblia. Ngem imbaga ti Dios kada Adan ken Eva idi addada idiay hardin ti Eden a maaddaanda kadagiti annak ken punnuenda ti daga. Kinapudnona, dida naaramid dayta. Ngem siguraduento ti Dios a matungpal ti panggepna a mapno ti daga kadagiti naimbag a tattao.​​—Genesis 1:​28; Isaias 45:18; 55:11.

Panunotem laengen no kasano karagsak ti agbiag iti Paraiso! Agbalinto a kasla parke ti intero a daga. Naruayto dagiti tumatayab ken an-animal ken papintasen ti isuamin a kita ti kaykayo ken sabsabong. Awanton ti marigatan gapu iti sakit, ken awanton ti matay. Aggagayyemto amin a tattao. No kayattayo ti agbiag nga agnanayon iti Paraiso, itan ti tiempo nga agsaganatayo.