MAKISARSARITAKA kadi ken Jehova a Dios?— Kayatna a makisaritaka kenkuana. No makisarsaritaka iti Dios, isu daytoy ti makuna a kararag. Masansan idi a kasarita ni Jesus ti Amana idiay langit. No dadduma kaykayatna ti agmaymaysa no kasaritana ti Dios. Iti naminsan, kuna ti Biblia, “Simmang-at a maymaysa idiay bantay tapno agkararag. Nupay rimmabiin, adda idi sadiay nga agmaymaysa.”​​—Mateo 14:23.

Sadino ti mabalinmo a pagkararagan ken Jehova nga agmaymaysa?— Baka mabalinmo ti agmaymaysa a makisarita ken Jehova sakbay a maturogka iti rabii. Kinuna ni Jesus: “Inton agkararagka, sumrekka iti pribado a siledmo ket, kalpasan a nairikepmon ti ridawmo, agkararagka ken ni Amam.” (Mateo 6:6) Agkarkararagka kadi ken Jehova iti kada rabii sakbay a maturogka?— Masapul nga aramidem dayta.

Agkarkararag met idi ni Jesus  no adda sabsabali a kakaduana. Idi natay ni Lazaro a gayyemna, nagkararag ni Jesus a kaduana dagiti sabsabali idiay nakaitaneman ni Lazaro. (Juan 11:​41, 42) Ken agkarkararag met idi ni Jesus no makitaripnong kadagiti adalanna. Mapmapanka aya kadagiti taripnong nga adda maar-aramid a panagkararag?— Kaaduanna, adda nataengan a mangikararag sadiay. Dumngegka a naimbag iti ibagana agsipud ta makisarsarita iti Dios para kenka. Iti kasta, mabalinmonto nga ibaga ti “Amen” iti kararag. Ammom kadi ti kayat a sawen ti panangibaga iti “Amen” kalpasan ti kararag?— Kayatna a sawen a nagustuam ti kararag. Kayatna a sawen nga anamongam ken kayatmo met nga ikararag dayta.

Agkarkararag met idi ni Jesus kabayatan ti pannangan. Nagyaman ken Jehova gapu iti taraonna. Agkarkararagka met laeng aya a kanayon sakbay a manganka?— Nasayaat no agyamantayo ken Jehova iti taraon sakbay a rugiantayo ti mangan. Mabalin nga adda sabali a mangikararag no aggigiddankayo a mangan. Ngem kasano ngay no maymaysaka a mangan? Wenno kasano ngay no ti kaduam a mangan ket dagidiay awan panagyamanda ken Jehova?— No kasta, masapul nga agkararagka a bukbukodmo.

Nasken aya a kanayon a napigsa ti kararagmo? Wenno mangngegnaka ngata ni Jehova no agkararagka iti naulimek?— Maammuanta  ti sungbat no kitaenta ti napasamak ken Nehemias. Ni Jehova ti pagdaydayawan ni Nehemias ken agtartrabaho idi iti palasio ni Persiano nga Ari Artaxerxes. Maysa nga aldaw, maladladingitan unay ni Nehemias gapu ta nadamagna a nadadael dagiti bakud ti Jerusalem, ti kangrunaan a siudad dagiti kailianna.

Idi dinamag ti ari no apay a naliday ni Nehemias, nagkararag pay nga immuna ni Nehemias iti naulimek. Kalpasanna imbaga ni Nehemias iti ari no apay a maladladingitan ket kiniddawna no mabalinna ti mapan idiay Jerusalem tapno ibangonna manen dagiti bakud. Ania ti napasamak?—

Wen, sinungbatan ti Dios ti kararag ni Nehemias. Kinuna ti ari a mabalinna ti mapan! Inikkan pay ketdi ti ari ni Nehemias kadagiti kayo a pagbangon kadagiti bakud. Gapuna, talaga a masungbatan  ti Dios dagiti kararagtayo, uray saantayo a pigsaan.​​—Nehemias 1:​2, 3; 2:4-8.

Ita, panunotem daytoy. Rumbeng kadi nga agdumogka no agkararagka? Rumbeng kadi nga agparintumengka? Ania ti makunam?— No dadduma nakaparintumeng ni Jesus no agkararag. No dadduma nakatakder. Ken no dadduma nakatangad bayat nga agkarkararag, a kas iti inaramidna idi inkararaganna ni Lazaro.

No kasta, ania ti ipakita daytoy?— Wen, ipakitana a saan a ti posisionmo ti napateg no agkararagka. No dadduma nasayaat no agdumog ken agkidemka. No dadduma mabalinmo pay ketdi ti agparintumeng, a kas ken Jesus. Ngem laglagipem a mabalintayo ti agkararag iti Dios iti aniaman nga oras iti aldaw wenno rabii, ket denggennatayo. Ti napateg iti kararag ket talaga a patientayo a dumdumngeg ni Jehova. Patiem kadi a denggen ni Jehova dagiti kararagmo?—

Ania ti rumbeng nga ikararagtayo ken Jehova?— Ibagam man kaniak: No agkararagka, ania ti ibagam iti Dios?— Nakaad-adu ti nasayaat nga ipapaay ni Jehova kadatayo, ket maitutop nga agyamantayo kenkuana gapu kadagita, di ngamin?— Mabalintayo ti agyaman kenkuana gapu iti taraontayo. Ngem napadasmo kadin ti nagyaman kenkuana gapu iti asul a tangatang, berde a kaykayo, ken nagpipintas a sabsabong?— Inaramidna met dagita.

Iti naminsan, kiniddaw dagiti adalan ni Jesus a sursuruanna ida nga agkararag. Gapuna, sinursuruan ida ti Naindaklan a Mannursuro, ket impakitana kadakuada no ania dagiti kapatgan nga ikararagda.  Ammom kadi no ania dagita?— Alaem ti Bibliam, ket ukradem iti Mateo kapitulo 6. Iti bersikulo 9 agingga iti 13, makitata ditoy ti aw-awagan ti adu a tattao nga Amami wenno Kararag ti Apo. Basaenta.

Naammuanta ditoy nga imbaga ni Jesus kadatayo nga ikararagtayo ti maipapan iti nagan ti Dios. Kinunana nga ikararagtayo a masantipikar koma ti nagan ti Dios. Ania ti nagan ti Dios?— Wen, Jehova, ket rumbeng nga ayatentayo dayta a nagan.

Maikadua, insuro ni Jesus nga ikararagtayo nga umay koma ti Pagarian ti Dios. Napateg daytoy a Pagarian gapu ta dayta ti mangyeg iti talna ditoy daga ken mamagbalin a paraiso iti dayta.

Maikatlo, kinuna ti Naindaklan a Mannursuro nga ikararagtayo a maaramid koma ti pagayatan ti Dios ditoy daga a kas met idiay langit. No ikararagtayo daytoy, aramidentayo koma ngarud dagiti ibilbilin ti Dios kadatayo.

Sumaganad, insuro ni Jesus nga ikararagtayo ti taraon a kasapulantayo iti inaldaw. Kinunana met nga agpadispensartayo koma iti Dios no nakabasoltayo. Ken kiddawentayo koma a pakawanennatayo ti Dios. Ngem sakbay nga aramidenna dayta, masapul a pakawanentayo dagiti sabsabali no nakabasolda kadatayo. Nalakam kadi nga aramiden dayta?—

Kamaudiananna, kinuna ni Jesus nga ikararagtayo koma a salaknibannatayo ni Jehova a Dios iti daydiay nadangkes, ni Satanas a Diablo. No kasta, nasayaat amin dagitoy nga ikararagtayo iti Dios.

Rumbeng a patientayo a denggen ni Jehova dagiti kararagtayo. Malaksid iti panagkiddawtayo iti tulong, kanayon koma nga agyamantayo kenkuana. Maragsakan ni Jehova no napudnotayo nga agkararag ken no umiso dagiti kidkiddawentayo kenkuana. Ket ipaaynanto kadatayo dagitoy. Patiem kadi dayta?—