Nagsaem no adda kabagian wenno nasinged a gayyemtayo a mailaksid iti kongregasion gapu ta saanna a pinagbabawyan ti inaramidna a basol. Ti reaksiontayo iti bilin ti Biblia mainaig iti daytoy a banag ipalgakna no kasano kauneg ti ayattayo iti Dios ken ti kinasungdotayo iti urnosna. * Usigem ti sumagmamano a saludsod a tumaud maipapan iti daytoy a topiko.

Kasano ti rumbeng a panangtratotayo iti nailaksid? Kuna ti Biblia: “Isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti idolo wenno manangrabngis wenno managbarbartek wenno manangkikil, saan uray makipangan iti kasta a tao.” (1 Corinto 5:11) Maipapan iti siasinoman a “saan nga agtalinaed iti sursuro ti Kristo,” kastoy ti mabasatayo: “Dikay pulos awaten kadagiti pagtaenganyo wenno sawen ti maysa a kablaaw kenkuana. Ta ti mangisao iti kablaaw kenkuana makiramraman iti nadangkes nga ar-aramidna.” (2 Juan 9-11) Saan a maiparbeng a kalangen wenno kasaritatayo maipapan iti naespirituan a banag dagidiay nailaksid. Ti Pagwanawanan a Marso 15, 1982, panid 19, kunana: “Ti simple a panangibaga iti ‘Komusta’ iti maysa a tao ket umuna nga addang nga agtungpal iti panagpatang ken panaggayyem pay ketdi. Kayattayo kadi nga aramiden dayta nga umuna nga addang iti nailaksid a tao?”

Talaga kadi a nasken a liklikantayo a naan-anay dagidiay nailaksid? Wen, gapu iti sumagmamano a rason. Umuna, iparangarang dayta ti kinasungdotayo iti Dios ken iti Saona. Agtulnogtayo ken Jehova saan laeng a no nalaka no di ket uray no narigat nga aramiden. Ti ayat iti Dios tignayennatayo nga agtulnog kadagiti amin a bilinna, a bigbigentayo nga isu ket nainkalintegan ken naayat ken agpaay a pagimbagantayo dagiti lintegna. (Isaias 48:17; 1 Juan 5:3) Maikadua, ti panangliklik iti awan panagbabawina a nakabasol salaknibannatayo ken ti intero a kongregasion tapno saantayo a mamulitan iti naespirituan ken moral, kasta met a taginayonenna ti nasayaat a pakasarsaritaan ti kongregasion. (1 Corinto 5: 6, 7) Maikatlo, mabalin a mabenepisiaran pay ketdi daydiay nailaksid no siiinget a salimetmetantayo dagiti prinsipio ti Biblia. No suportarantayo ti desision ti hudisial a komite, mabalin a matukay ti puso ti nakabasol a saan a nangikankano iti panagregget dagiti panglakayen a tumulong kenkuana. Gapu ta saannan a mabalin ti makilangenlangen kadagiti patpatgenna, mabalin a ‘makapagpampanunot,’ mariknana ti kinaserioso ti basolna, ken mangaramid kadagiti addang tapno makapagsubli ken Jehova.—Lucas 15:17.

No ngay kabagiantayo ti nailaksid? No kasta ti kasasaad, ti nasinged a relasiontayo kadagiti kameng ti pamiliatayo subokenna ti kinamatalektayo kadagiti linteg ni Jehova. Kasano ti rumbeng a panangtratotayo iti nailaksid a kabagian? Ditay madakamat ditoy ti amin a situasion a mabalin a tumaud, ngem ipamaysatayo ti atensiontayo iti dua a napateg a banag.

Iti dadduma a kasasaad, ti nailaksid a kameng ti pamilia ket mabalin a makipagnanaed pay laeng iti pamiliana. Yantangay ti pannakailaksidna dina pugsaten ti relasionna iti pamiliana, mabalin nga agtultuloy latta dagiti gagangay nga inaldaw nga aktibidad ken panaglalangen. Nupay kasta, gapu iti inaramidna, pinugsatnan ti naespirituan a relasionna iti pamiliana. Gapuna, dagiti nasungdo a kameng ti pamilia saandan a mabalin nga iraman kadagiti naespirituan nga aktibidadda. Kas pagarigan, saan a mabalin a makipartisipar daydiay nailaksid no tumabuno iti sangapamiliaan a panagadal iti Biblia. Ngem no menor de edad ti nailaksid, responsabilidad latta dagiti nagannak nga isuro ken disiplinaen. Gapuna, dagiti naayat a nagannak mabalinda nga iyadalan iti Biblia dayta nga anakda. *—Proverbio 6:20-22; 29:17.

Iti dadduma a kasasaad, daydiay nailaksid ket mabalin a saanen a makipagnanaed iti pamiliana. Nupay adda dagiti panawen a nasken nga agtitiponda kas pamilia gapu ta adda nasken nga asikasuenda, limitado laengen ti pannakilangen kenkuana dagiti nasungdo a Kristiano a kameng ti pamiliana. Saanda koma a mangaramid kadagiti rason tapno laeng a makalangenda ti nailaksid  a kabagianda a saanda a kabbalay. Imbes ketdi, ti kinasungdoda kenni Jehova ken iti organisasionna ti mangtignay kadakuada a mangsurot iti Nainkasuratan nga urnos mainaig kadagiti nailaksid. Ti kinasungdoda gapu ta ay-ayatenda ni Jehova ket para iti pagsayaatan ti nakabasol ken mabalin a tumulong kenkuana a mabenepisiaran iti pannakadisiplinana. *—Hebreo 12:11.