PANANGIRUGI ITI SARITAAN
LEKSION 3
Kinaimbag
Prinsipio: “Ti ayat ket . . . naimbag.”—1 Cor. 13:4.
Ti Inaramid ni Jesus
1. Buyaem ti VIDEO, wenno basaem ti Juan 9:1-7 sa sungbatam dagitoy a saludsod:
-
Ania ti immuna nga inaramid ni Jesus—pinaimbagna ti bulsek wenno inranudna kenkuana ti naimbag a damag?—Kitaen ti Juan 9:35-38.
-
Apay a mabalin a nakatulong ti inaramid ni Jesus tapno dumngeg ti lalaki iti naimbag a damag?
Ania ti Masursurotayo ken Jesus?
2. Dakdakkel ti posibilidadna nga akseptaren ti kasarsaritatayo ti mensahetayo no mariknana a maseknantayo kenkuana.
Tuladem ni Jesus
3. Ipakitam ti empatia. Imadyinem ti marikriknana.
-
Isaludsodmo iti bagim: ‘Ania ngata ti pakadanaganna? Ania ngata ti topiko a makatulong kenkuana ken paginteresanna?’ No aramidem dayta, agbalin a natural ken naimpusuan ti panangipakitam iti kinaimbag.
-
Dumngegka tapno maipariknam nga interesadoka iti ibagbagana nga importante kenkuana. No iyebkasna ti marikriknana iti maysa a banag wenno ti problemana, saanmo a baliwan ti saritaan.
4. Nasingpet ken nadayawka koma a makisarita. No maasianka iti kasarsaritam ken talaga a kayatmo a tulongan, madlawna dayta iti panagsasaom. Panunotem a naimbag no ania ti ibagam ken no kasanom nga ibaga dayta, ken liklikam ti mangibaga kadagiti makapasakit a bambanag.
5. Tumulongka. Mangbirokka iti gundaway tapno matulongam ti kaskasabaam. No mangipakitaka iti kinaimbag, mabalin a dayta ti mangtignay kenkuana a makisarita kenka.
