PANANGIRUGI ITI SARITAAN
LEKSION 4
Kinapakumbaba
Prinsipio: “Agpakumbabakayo, nga ibilangyo a nangatngato ti sabsabali ngem dakayo.”—Fil. 2:3.
Ti Inaramid ni Pablo
1. Buyaem ti VIDEO, wenno basaem ti Aramid 26:2, 3 sa sungbatam dagitoy a saludsod:
-
Kasano nga impakita ni Pablo ti kinapakumbaba idi nakisarita ken Ari Agripa?
-
Kasano nga inturong ni Pablo ti atension ken Jehova ken iti Kasuratan imbes nga iti bagina?—Kitaen ti Aramid 26:22.
Ania ti Masursurotayo ken Pablo?
2. Ad-adda a makapainteres ti mensahetayo no napakumbaba ken nadayawtayo a mangibaga iti dayta.
Tuladem ni Pablo
3. Nadayawka koma. Saanmo koma nga iparikna nga ammom ti amin ken awan ti ammo ti kasarsaritam. Narespeto koma ti pannakisaritam.
4. Ipakitam a naggapu iti Biblia dagiti isursurom a kinapudno. Naglaon ti Biblia kadagiti kapanunotan ti Dios a mangtignay iti puso dagiti tattao. No usarentayo dayta, tultulongantayo ida a maaddaan iti natibker a pammati a naibatay iti umiso a pundasion.
5. Agtalinaedka a kalmado. Saanmo nga ipilit a sika ti husto. Ditay kayat ti makiriri. Ipakpakitatayo a napakumbabatayo no agtalinaedtayo a kalmado ken agpakadatayon no kasapulan. (Prov. 17:14; Tito 3:2) No kalmadotayo a sumungbat, mabalin a dumngegto iti sabali a gundaway ti kasarsaritatayo.
