Sumagmamano a tiempo kalpasan a natagtagainep ni Ari Nabucodonosor ti estatua, isu ket nangaramid iti dakkel a balitok nga estatua. Impatakderna dayta iti tanap ti Dura ket pinaayabanna dagiti nangato nga opisial iti Babilonia, a pakairamanan da Sidrac, Mesac, ken Abednego, sa imbilinna a mapanda iti sango ti estatua. Imbilin ti ari: ‘No mangngegyo ti uni ti trumpeta, arpa, ken ti dakkel a plauta, agruknoykayo iti estatua! Ti saan nga agruknoy ket maipalladaw iti urno.’ Agruknoy ngata ti tallo a Hebreo, wenno agdayawda laeng ken Jehova?

Idi kuan, imbilin ti ari a maipatokar ti musika. Nagruknoy ken nagdaydayaw ti amin iti estatua malaksid kada Sidrac, Mesac, ken Abednego. Nakita dayta ti dadduma ket impulongda iti ari: ‘Saan a kayat ti tallo a Hebreo ti agdayaw iti estatua.’ Pinaayaban ida ni Nabucodonosor ket imbagana: ‘Ikkankayo iti maysa pay a tsansa. No dikay agruknoy, ipalladawkayo iti urno. Awan dios a makaisalakan kadakayo.’ Insungbatda: ‘Saannakamin nga ik-ikkan iti maysa pay a tsansa. Maisalakannakami ti Diosmi. Ngem uray no dinakami isalakan, O ari, dikam pulos agdayaw iti estatuam.’

Permi ti unget ni Nabucodonosor. Imbagana kadagiti adipenna: ‘Papudotenyo ti urno iti mamimpito ngem iti gagangay!’ Sa imbilinna kadagiti soldadona: ‘Galutanyo dagitoy a lallaki, sa ipalladawyo iti urno!’ Nakapudpudot  ti urno nga uray la natay a dagus dagiti soldado idi makaasidegda. Naipalladaw ti tallo a Hebreo iti apuy. Ngem idi kitaen ida ni Nabucodonosor, uppat a lallaki ti nakitana nga agpagnapagna iti apuy, saan a tallo. Nagbuteng ti ari ket insaludsodna kadagiti opisialna: ‘Di kad tallo a lallaki ti impalladawtayo? Uppat ti makitkitak, ket kasla anghel ti maysa!’

Immasideg ni Nabucodonosor iti urno ket impukkawna: ‘Rummuarkayo, dakayo nga adipen ti Kangatuan a Dios!’ Nasdaaw ti amin a nakakita kada Sidrac, Mesac, ken Abednego a di naan-ano. Saan a napuoran ti kudil, buok, ken badoda, ken awan man la angot ti apuy a dimket kadakuada.

Imbaga ni Nabucodonosor: ‘Mannakabalin ti Dios da Sidrac, Mesac, ken Abednego. Imbaonna ti anghelna a mangisalakan kadakuada. Awan ti dios a kas iti Diosda.’

Kas iti tallo a Hebreo, determinadoka met kadi nga agmatalek ken Jehova uray ania ti mapasamak?