Kalpasan ti Paskua, dimmalan ni Jesus ken dagiti adalanna idiay Samaria nga agturong idiay Galilea. Naginana ni Jesus iti maysa a lugar a naawagan iti bubon ni Jacob iti asideg ti siudad ti Sicar. Napan gimmatang dagiti adalanna iti makan iti siudad.

Adda babai a napan iti bubon tapno agsakdo. Imbaga ni Jesus kenkuana: ‘Ikkannak man iti inumek.’ Insungbat ti babai: ‘Apay a kasarsaritanak ket maysaak a Samaritana? Saan a makisarsarita dagiti Judio kadagiti Samaritano.’ Imbaga ni Jesus: ‘No koma am-ammonak, dumawatka kaniak iti danum ket ikkanka iti danum a makaited iti biag.’ Imbaga ti babai: ‘Ania ti kayatmo a sawen? Kasano a maikkannak iti danum ket awan pagsakdom?’ Kinuna ni Jesus: ‘Ti uminum iti danum nga itedko saanton a mawaw.’ Imbaga ti babai: ‘Apo, ikkannak iti kasta a danum.’

Imbaga ni Jesus kenkuana: ‘Ayabam ditoy ti asawam.’ Insungbat ti babai: ‘Awan asawak.’ Kinuna ni Jesus: ‘Agpayso ti imbagam. Naminlimakan a nakiasawa ket saanmo nga asawa ti lalaki a kabbalaymo ita.’ Kinuna ti babai: ‘Maysaka a propeta. Mamati dagiti kailiak a mabalinmi ti agdayaw iti Dios iti daytoy a bantay, ngem kuna dagiti Judio nga idiay laeng Jerusalem ti mabalinmi a pagdayawan. Mamatiak nga inton umay ti Mesias, isuronakami no kasano ti agdayaw.’ Idi kuan, adda imbaga ni Jesus a dina pay imbagbaga iti sabali. Kinunana: ‘Siak ti Mesias.’

 Nagdardaras a napan ti babai iti siudad ket imbagana kadagiti Samaritano: ‘Panagkunak, nakitakon ti Mesias. Ammona ti amin maipapan kaniak. Umayyo kitaen!’ Simmurotda kenkuana a napan iti bubon ket dimngegda iti panangisuro ni Jesus.

Kiniddaw dagiti Samaritano nga agyan pay laeng ni Jesus iti siudadda. Dua nga aldaw a nangisursuro ni Jesus sadiay ket adu ti namati kenkuana. Imbagada iti Samaritana: ‘Kalpasan a dimngegkami iti daytoy a tao, kombinsidokamin nga isu a talaga ti mangisalakan iti lubong.’