Ikaskasaba idi ni Juan: ‘Adda umay a nabilbileg ngem siak.’ Maysa nga aldaw, idi agtawen ni Jesus iti agarup 30, napan iti Karayan Jordan, a pangbabautisaran ni Juan. Naggapu idi ni Jesus idiay Galilea ket kayatna ti agpabautisar ken Juan. Ngem imbaga ni Juan: ‘Saanka a masapul a bautisaran. Siak ti masapul a bautisaram.’ Imbaga ni Jesus: ‘Kayat ni Jehova a bautisarannak.’ Isu a napanda iti Karayan Jordan, ket intaneb ni Juan ni Jesus iti danum.

Idi simmang-at ni Jesus iti danum, nagkararag. Idi kuan, naglukat ti langit ket bimmaba kenkuana ti espiritu ti Dios a kasla kalapati. Imbaga ni Jehova manipud langit: “Sika ti Anakko a dungdungnguek, a pakaragsakak.”

Idi bimmaba ken Jesus ti espiritu ni Jehova, nagbalin isuna a Kristo, wenno Mesias. Mabalinnan a rugian ti trabaho a nangibaonan kenkuana ni Jehova ditoy daga.

Kalpasan a nabautisaran ni Jesus, napan idiay let-ang ket nagyan sadiay iti 40 nga aldaw. Idi nagsublin, napan ken Juan. Bayat nga umas-asideg ni Jesus, imbaga ni Juan: ‘Daytoy ti Kordero ti Dios a mangikkat iti basol ti lubong.’ Babaen iti dayta, impakaammo ni Juan kadagiti tattao a ni Jesus ti Mesias. Ammom kadi no ania ti napasamak ken Jesus idi adda idiay let-ang? Kitaenta.