Impan dagiti panguluen a padi ni Jesus iti palasio ti gobernador. Insaludsod ni Pilato kadakuada: ‘Ania ti basol daytoy a tao?’ Insungbatda: ‘Ibagbagana nga isu ket ari!’ Insaludsod ni Pilato ken Jesus: ‘Sika kadi ti Ari dagiti Judio?’ Insungbat ni Jesus: ‘Ti Pagariak ket saan a paset daytoy a lubong.’

Kalpasanna, isu ket impaipan ni Pilato ken Herodes, ti agturturay idiay Galilea, tapno ammuenna no adda basol ni Jesus. Awan makita ni Herodes a basolna isu nga impaisublina ken Pilato. Imbaga ni Pilato kadagiti tattao: ‘Awan makitami ken Herodes a basol daytoy a tao. Wayawayaakon.’ Impukkaw dagiti tattao: ‘Patayem! Patayem!’ Sinapsaplit dagiti soldado ni Jesus, tinupraanda, ken tinungtungpada. Kinoronaanda iti sisiit ken inuy-uyawda. Kinunada: ‘Naimbag nga aldawmo, Ari dagiti Judio.’ Imbaga manen ni Pilato kadakuada: ‘Awan makitak a basol daytoy a tao.’ Ngem impukkawda: ‘Ibitaymo iti kayo!’ Isu nga inyawat ni Pilato ni Jesus tapno mapapatay.

Impan dagiti soldado ni Jesus iti lugar a naawagan Golgotha, inlansada iti kayo, sada impatakder ti kayo. Inkararag ni Jesus: “Ama, pakawanem ida, ta saanda nga ammo ti ar-aramidenda.” Pinagang-angawan dagiti tattao ni Jesus ket imbagada: ‘No sika ket Anak ti Dios, bumabaka iti kayo! Isalakanmo ta bagim.’

Imbaga ti maysa kadagiti kriminal a nailansa iti abayna: ‘Laglagipennak inton addakan iti Pagariam.’ Inkari ni Jesus: “Makikaduakanto kaniak idiay Paraiso.” Iti agarup alas dose ti aldaw, simmipnget ket nagpaut dayta iti tallo nga oras. Adda iti asideg ti kayo ti dadduma nga adalan, a pakairamanan ni Maria nga ina ni Jesus. Imbilin ni Jesus ken Juan nga aywananna ni Maria a kas bukodna nga ina.

Idi agangay, imbaga ni Jesus: ‘Natungpalen!’ Nagdumog ket napugsaten ti angesna. Bigla a nagginggined iti napigsa. Iti templo, napisang ti dakkel a kortina iti nagbaetan ti Nasantuan ken  Kasasantuan. Imbaga ti maysa nga opisial ti militar: ‘Talaga a daytoy ket Anak ti Dios.’