Sangapulo nga aldaw kalpasan a nagpalangit ni Jesus, immawat dagiti adalanna iti nasantuan nga espiritu. Pentecostes 33 C.E. idi ket adu a tattao a naggapu iti nadumaduma a lugar ti napan idiay Jerusalem tapno agselebrar. Naguummong ti agarup 120 nga adalan ni Jesus iti makinngato a kuarto ti maysa a balay. Idi kuan, adda nagparang a kasla apuy iti ulo dagiti adalan ket nangrugida nga agsao iti nadumaduma a lengguahe. Nakangngeg dagiti adalan iti napigsa nga uni a kas iti uni ti napigsa nga angin.

Dagiti tattao a naggapu iti sabali a lugar nangngegda ti uni ket nagtartarayda a napan iti balay. Nasdaawda idi agsasao dagiti adalan iti nagduduma a lengguahe. Imbagada: ‘Taga-Galilea dagitoy a tattao. Kasanoda a makasao iti lengguahetayo?’

Timmakder ni Pedro ken ti dadduma pay nga apostol iti sango dagiti tattao. Imbagana no kasano a napapatay ni Jesus ken no kasano a  pinagungar ni Jehova. Kinunana: ‘Adda itan ni Jesus iti makannawan ti Dios idiay langit, ken intedna ti inkarina a nasantuan nga espiritu. Dayta ti rason a napasamak dagitoy a milagro.’

Dimmanon iti puso dagiti tattao ti imbaga ni Pedro, ket insaludsodda: “Ania ti aramidenmi?” Insungbatna: ‘Agbabawikayo ken agpabautisarkayo iti nagan ni Jesus. Umawatkayto met iti nasantuan nga espiritu.’ Iti dayta nga aldaw, agarup 3,000 a tattao ti nabautisaran. Sipud idin, napartak nga immadu dagiti adalan idiay Jerusalem. Iti tulong ti nasantuan nga espiritu, nangbukel dagiti apostol iti ad-adu pay a kongregasion tapno maisuroda kadagiti adalan ti amin nga imbilin ni Jesus kadakuada.