Insuro ni Abraham ken Isaac nga anakna nga ayatenna ni Jehova ken agtalek a tungpalen ni Jehova ti amin a karina. Ngem idi agarup 25 ti tawen ni Isaac, adda nakarigrigat nga impaaramid ni Jehova ken Abraham. Ania dayta?

Kinuna ti Dios ken Abraham: ‘Pangngaasim, itugotmo ti kakaisuna nga anakmo ket idatonmo iti bantay idiay Moria.’ Saan nga ammo ni Abraham no apay nga ipapaaramid dayta ni Jehova. Ngem nagtulnog latta ken Jehova.

Kabigatanna, intugot ni Abraham ni Isaac ken ti dua nga adipenna a napan idiay Moria. Kalpasan ti tallo nga aldaw, makitkitadan dagiti bantay iti adayo. Imbaga ni Abraham kadagiti adipenna nga agurayda ta mapanda agdaton ken Isaac. Impabagkat ni Abraham ken Isaac ti pagsungrod, ken nangitugot iti kutsilio. Insaludsod ni Isaac ken tatangna: ‘Ayan ti animal a maidaton?’ Kinuna ni Abraham: ‘Mangtedto ni Jehova, anakko.’

Idi nakadanondan iti bantay, nagaramidda iti altar. Ginalutan ni Abraham ti ima ken saka ni Isaac sa impaiddana iti altar.

Idi innala ni Abraham ti kutsilio, nagsao ti anghel ni Jehova manipud iti langit: ‘Abraham! Dimo saksaktan ti ubing! Ammokon nga adda pammatim iti Dios ta nakasaganaka a mangidaton iti anakmo.’ Idi kuan, nakakita ni  Abraham iti karnero a naisalat dagiti sarana kadagiti mula. Winarwaranna a dagus ni Isaac ket indatonna ti karnero.

Sipud idin, inawagan ni Jehova ni Abraham kas gayyemna. Ammom no apay? Inaramid ni Abraham ti amin nga impaaramid ni Jehova, uray dina maawatan no apay nga ipapaaramid dayta ni Jehova.

Inulit ni Jehova ti karina ken Abraham: ‘Bendisionankanto, ket paaduekto dagiti annakmo, wenno kaputotam.’ Kaipapanan dayta a bendisionanto ni Jehova ti amin a naimbag a tattao babaen ti pamilia ni Abraham.