Nagyan ni Moises idiay Midian iti 40 a tawen. Nangasawa ken naaddaan kadagiti annak. Maysa nga aldaw, idi agipaspastor iti karnero iti asideg ti Bantay Sinai, adda nakaskasdaaw a nakitana. Umap-apuy ti maysa a bassit a kayo, ngem saan a mapupuoran! Idi inasitgan ni Moises, adda nangngegna a boses a naggapu iti bassit a kayo a kunana: ‘Moises! Dika umas-asideg. Ikkatem dagiti sandaliasmo ta nasantuan ti lugar a pagtaktakderam.’ Ni Jehova ti agsasao babaen iti anghel.

Nagbuteng ni Moises isu nga inabbonganna ti rupana. Kinuna ni Jehova: ‘Nakitak ti panagrigrigat dagiti Israelita. Isalakanko ida kadagiti Egipcio ket ipanko ida iti nasayaat a daga. Sika ti mangiruar kadagiti tattaok idiay Egipto.’ Panagkunam, nakigtot ngata ni Moises?

Insaludsod ni Moises: ‘Anianto ti ibagak no damagenda no asino ti nangibaon kaniak?’ Insungbat ti Dios: ‘Ibagam kadakuada nga imbaonnaka ni Jehova, ti Dios ni Abraham, ti Dios ni Isaac, ken ti Dios ni Jacob.’ Kinuna ni Moises: ‘Kasanon no saandakto a denggen?’ Nangted ni Jehova iti pammaneknek a tulonganna ni Moises. Imbagana nga ipuruak ni Moises ti bastonna iti daga. Impuruak ni Moises ti bastonna ket nagbalin nga uleg! Idi ginammatan ni Moises ti ipus ti uleg, nagbalin manen a baston. Kinuna ni Jehova: ‘No aramidem daytoy, mamatidanto nga imbaonka.’

Kinuna ni Moises: ‘Saanak a nalaing nga agsao.’ Inkari ni Jehova kenkuana: ‘Ibagakto kenka no ania ti ibagam, ken ibaonkonto ni Aaron a kabsatmo a tumulong kenka.’ Gapu ta ammo ni Moises a tulongan isuna ni Jehova, nagsubli idiay Egipto a kaduana ti asawana ken dagiti annakna.