LEKSION 25
Ti Tabernakulo a Pagdaydayawan
Idi adda ni Moises iti Bantay Sinai, imbilin kenkuana ni Jehova a mangaramid iti espesial a tolda a pagdayawan dagiti Israelita. Naawagan dayta iti tabernakulo. Maitugottugotda dayta bayat ti panagakar-akarda.
Kinuna ni Jehova: ‘Ibagam kadagiti tattao a mangtedda iti kabaelanda para iti pannakaaramid ti tabernakulo.’ Nangted dagiti Israelita iti balitok, pirak, gambang (copper), napapateg a bato, ken alahas. Nangtedda met iti delana (wool), lienso (linen), lalat ti animal, ken dadduma pay. Nakaparparaburda. Kasapulan pay idin nga ibaga ni Moises: ‘Huston! Dikay mangmangteden.’
Adu a nalaing a lallaki ken babbai ti timmulong a nagaramid iti tabernakulo. Pinagbalin ida ni Jehova a nalaing para iti dayta. Dadduma ti nagaramid iti sinulid, nagabel, wenno nagborda. Adda met dagiti nangikabil iti napapateg a bato, nangaramid kadagiti bambanag manipud iti balitok, wenno nagkitikit iti kayo.
Sinurotda dagiti bilin ni Jehova idi inaramidda ti tabernakulo. Nangaramidda iti napintas a kortina a nangbingay iti tabernakulo iti dua a paset, ti Nasantuan ken ti Kasasantuan. Naikabil iti Kasasantuan ti lakasa ti tulag, a naaramid iti kayo nga akasia ken balitok. Iti Nasantuan, adda naikabil a lamisaan, balitok a pagikabilan iti silaw, ken altar a pagpuoran iti insienso. Iti paraangan, adda gambang a
palanggana ken dakkel nga altar. Ipalagip ti lakasa ti tulag kadagiti Israelita ti karida nga agtulnog ken Jehova. Ammom no ania ti tulag? Maysa nga espesial a kari.Pinili ni Jehova ni Aaron ken dagiti annakna a lallaki nga agserbi iti tabernakulo kas papadi. Masapul nga aywananda dayta ken dita nga agidatonda ken Jehova. Ti laeng nangato a padi a ni Aaron ti mabalin a sumrek iti Kasasantuan. Aramidenna dayta maminsan iti kada tawen tapno agidaton para kadagiti basolna, basol ti pamiliana, ken basol ti intero a nasion ti Israel.
Nalpasda ti tabernakulo makatawen kalpasan a nakapanawda idiay Egipto. Adda itan pagdayawanda ken Jehova.
Impakita ni Jehova a naay-ayo iti tabernakulo ket nangikabil iti ulep iti ngato ti tabernakulo. No adda ti ulep iti ngato ti tabernakulo, saan a pumanaw dagiti Israelita. No umakar ti ulep, ammoda a masapul a pumanawdan. Rakrakenda ti tabernakulo sa surotenda ti ulep.
“Adda nangngegko a napigsa a boses iti trono a mangibagbaga: ‘Kitaem! Adda iti sangatauan ti tolda ti Dios, ket makipagnaedto kadakuada, ken isudanto ti tattaona. Addanto a mismo ti Dios kadakuada.’”—Apocalipsis 21:3