Nagwaras iti dadduma a nasion ti Canaan ti damag maipapan iti Jerico. Napagsasaritaan dagiti arida nga agkakaduada a manglaban kadagiti Israelita. Ngem sabali ti inaramid dagiti Gibeonita. Nangisuotda iti rutrot a bado ket napanda ken Josue. Imbagada: ‘Naggapukami iti adayo a lugar. Nangngegmi ti maipapan ken Jehova ken kadagiti inaramidna para kadakayo idiay Egipto ken Moab. Ikariyo a saandakami a gubaten, ket agbalinkaminto nga adipenyo.’

Namati ni Josue ket inkarina a saanna ida a gubaten. Kalpasan ti tallo nga aldaw, naammuanna a naggapuda iti Canaan, saan nga iti adayo a lugar. Insaludsod ni Josue kadakuada: ‘Apay a nagulbodkayo?’ Insungbatda: ‘Mabutengkami kadakayo! Ammomi a ni Jehova a Diosyo ti makilablaban para kadakayo. Pangngaasiyo, saandakami a patayen.’ Tinungpal ni Josue ti karina ket saanna ida nga inan-ano.

Di nagbayag, implano ti lima nga ari ti Canaan ken dagiti soldadoda a gubatenda dagiti Gibeonita. Nagpatnag a nagmartsa ni Josue ken dagiti soldadona tapno isalakanda ida. Kabigatanna, nasapa  a nangrugi ti panaglalaban. Nagtataray dagiti Canaanita ket napanda iti nagduduma a direksion. Pinagtudo ni Jehova iti dadakkel a yelo kadagiti lugar a nagtarayanda. Kalpasanna, indawat ni Josue ken Jehova a pasardengenna ti panaggaraw ti init. Apay nga indawatna dayta ket ammona met a saan pay a pulos nagsardeng nga aggaraw ti init? Agtaltalek ngamin ni Josue ken Jehova. Saan a limnek ti init iti dayta nga aldaw agingga a saan a naabak dagiti ari ti Canaan ken dagiti soldadoda.