Idi natay ni Saul, nagbalin nga ari ni David. Tallopulo idi ti tawenna. Kalpasan ti sumagmamano a tawen, idi adda ni David iti tuktok ti palasiona iti maysa a rabii, nakakita iti napintas a babai. Naammuanna a Bat-sheba ti nagan ti babai ken asawa ti maysa a soldado nga agnagan Urias. Pinaayaban ni David ni Bat-sheba iti palasiona. Nagkaiddada ket nagsikog ni Bat-sheba. Pinadas ni David nga ilemmeng ti inaramidna. Imbagana iti heneralna nga ipuestona ni Urias iti makinsango a paset ti paggugubatan sada panawan. Idi natayen ni Urias, innala ni David ni Bat-sheba kas asawa.

Ngem nakita ni Jehova ti amin a dakes a napasamak. Ania ti inaramidna? Imbaon ni Jehova ti propeta a ni Natan ken David. Imbaga ni Natan: ‘Adda nabaknang a lalaki nga adu ti karnerona, ken adda marigrigat a lalaki nga adda maysa a bassit a karnerona nga ipatpategna unay. Innala ti nabaknang a lalaki ti kakaisuna a karnero ti marigrigat a lalaki.’ Nakaunget ni David ket imbagana: ‘Masapul a matay dayta a nabaknang a lalaki!’ Imbaga ni Natan: ‘Sika dayta a nabaknang a lalaki!’ Nakonsiensia ni David, ket inaminna: ‘Nagbasolak ken Jehova.’ Gapu iti basolna, adu a pakarigatan ti napasamak ken David ken iti pamiliana. Dinusa ni Jehova ni David, ngem saanna a pinatay ta isu ket napudno ken napakumbaba.

Kayat ni David ti mangipatakder iti templo para ken Jehova, ngem ni Solomon nga anakna ti pinili ni Jehova a mangaramid iti dayta. Insagana ni David dagiti kasapulan ni Solomon ket imbagana: ‘Masapul  a nakapimpintasto ti templo ni Jehova. Ubing pay ni Solomon, ngem tulongak ket isaganak dagiti kasapulanna.’ Nangted ni David iti adu a kuarta, nangbirok kadagiti nalalaing a trabahador, ken nagurnong kadagiti balitok ken pirak ken kadagiti kayo a sedro a naggapu idiay Tiro ken Sidon. Idi dandanin matay ni David, intedna ken Solomon dagiti plano ti panangipatakder iti templo. Imbagana: ‘Impaisurat kaniak ni Jehova dagitoy para kenka. Tulongannakanto ni Jehova. Dika agbuteng. Papigsaem ti pakinakemmo ket rugiamon ti trabaho.’