Bayat ti tikag, imbaga ni Jehova ken Elias: ‘Mapanka idiay Sarefat. Addanto balo a babai sadiay a mangted kenka iti makan.’ Iti ruangan ti siudad, nakita ni Elias ti maysa a marigrigat a balo a babai nga agpidpidut iti kayo. Dimmawat ni Elias iti sangabaso a danum. Idi mapanen mangala ti balo iti danum, imbaga pay ni Elias: ‘Pangngaasim, ikkannak iti sangkabassit a tinapay.’ Ngem imbaga ti balo: ‘Awan maitedko a tinapay. Adda arina ken lanak nga umanay laeng a pagaramid iti sangkabassit a makan a kanenmi iti anakko.’ Imbaga ni Elias: ‘Inkari ni Jehova a no iyaramidannak iti sangkabassit a tinapay, saanto a maibus ti arina ken lanam agingga nga agtudo manen.’

Nagawid ti balo ket inyaramidanna iti tinapay ti propeta ni Jehova. Kas iti inkari ni Jehova, saan a naibusan iti makan ti balo ken ti anakna bayat ti tikag. Napunno latta ti pagkargaanna iti arina ken lana.

 Idi kuan, adda makapaladingit a napasamak. Nagsakit iti nakaro ti anak ti balo ket natay. Nagpakaasi ti balo a tulongan ni Elias. Innala ni Elias ti ubing iti nanangna ket inyulina iti makinngato a kuarto iti balay ti balo. Impaiddana iti katre sa inkararagna: ‘Jehova, pangngaasim, pagbiagem manen daytoy nga ubing.’ Ammom kadi no apay a kasla imposible dayta a dawdawatenna ken Jehova? Ngamin, awan pay idi ti natay a nagbiag manen. Maysa pay, saan nga Israelita ti balo ken ti anakna.

Ngem nagbiag manen ti ubing! Imbaga ni Elias iti balo: ‘Kitaem! Sibibiag ti anakmo.’ Nakaragragsak ti balo ket imbagana ken Elias: ‘Talaga nga adipennaka ti Dios. Masiguradok dayta ta ti laeng ibaga ni Jehova ti ibagbagam.’