“Dimmakkelak iti maysa a bassit a bario iti akin-amianan a probinsia,” insalaysay ni Dauda a taga Sierra Leone. “Naminsan, idi ubingak pay, adda suppiat iti nagbaetan ti pamiliami ken ti sabali pay a pamilia maipapan iti daga. Agpada nga akuenda ti isu met la a daga. Tapno marisut ti isyu, naayaban ti maysa nga albulario. Inikkanna ti sabali a lalaki iti sarming, kalpasanna isut’ inabbungotanna iti puraw a lupot. Di nagbayag ti lalaki iti uneg ti lupot nangrugi nga agpigerger ken agling-et. Idi a kimmita iti sarming, impukkawna: ‘Makitak ti maysa a lakay nga umas-asideg! Nakawesan iti puraw a pagan-anay. Natayag ken lakayen, ubananen, ken magmagna a nakadumog.’

“Isut’ mangdesdeskribir ken Lelong! Napabutngan unay ket inyikkisna: ‘No diyo patien ti ibagbagak, umayyo kitaen a mismo!’ Siempre, awan kadakami ti nakaitured a mangaramid iti dayta! Isut’ pinagkalma ti albulario babaen ti panangiwarsina kenkuana ti mahikal a naglaokan ti bulbulong ken danum, nga ig-iggamanna iti calabacera.

“Agsasao babaen iti lalaki nga agig-iggem ti sarming, ni ‘Lelong’ kinunana a ti daga ket kukua ti pamiliami. Imbagana iti lelangko a rebbeng a trabahuenna ti daga nga awan dandanag. Ti sabali a pamilia inawatda ti pangngeddeng. Ti isyu ket naibanag.”

 Dagiti kasta a kapadasan ti gagangayen idiay Makinlaud nga Africa. Ditoy, kas iti dadduma a paset ti lubong, di mabilang a minilion ti mamati a dagiti natay mapanda iti lubong dagiti espiritu, a sadiay makitada ken maimpluensiaanda ti kabibiag dagiti tattao ditoy daga. Pudno kadi daytoy a pammati? Talaga kadi a sibibiag dagiti natay? No saan, asino dagidiay agkunkuna nga isuda ti espiritu dagiti natay? Nasken unay ti panangammo ti umiso a sungbat kadagitoy a saludsod. Daytoy ket maysa a banag ti biag-ken-ipapatay.