Ni Satanas ken dagiti demonio kankanayon a nauyongda ken napeggadda. Idi ugma pinatay ni Satanas dagiti dinguen ken ad-adipen ni matalek a Job. Kalpasanna, pinatayna dagiti sangapulo nga annak ni Job babaen ti panangpataudna ti “dakkel nga angin” a nangdadael iti nagtaenganda. Kalpasan dayta kinabilna ni Job iti “naut-ot a busbusali manipud iti dapan ti sakana agingga iti kuppokuppona.”—Job 1:7-19; 2:7.

Idi kaaldawan ni Jesus, pinagumel ken binulsek dagiti demonio ti sumagmamano a tattao. (Mateo 9:32, 33; 12:22) Tinutuokda ti maysa a lalaki a nangdunor iti bagina kadagiti bato. (Marcos 5:5) Pinagik-ikkisda met ti maysa nga ubing a lalaki, intublakda iti daga, ket “pinarparigatda.”—Lucas 9:42.

Itatta, ni Satanas ken dagiti demonio ket mammapatayda unay a kas idi. Kinapudnona, ti dakes a  trabahoda umad-adu nanipud pay pannakapapanawda manipud langit. Dagiti report manipud intero a lubong mangpaneknek iti kinauyongda. Saplitenda ti sumagmamano a tattao iti sakit. Riribukenda dagiti dadduma iti rabii, saanda ida paturogen wenno ikkanda ida kadagiti nakabutbuteng a tagtagainep. Dagiti dadduma abusarenda iti seksual. Kaskasdi nga iturongda dagiti dadduma iti panagmauyong, panangpapatay, wenno panagbekkel.

Ni Lintina, nga agnaed idiay Suriname, isalaysayna a maysa a demonio, wenno dakes nga espiritu, pinatayna ti 16 a kameng ti pamiliana ken isut’ pinarparigatna iti pisikal ken mental iti 18 a tawen. Manipud damdamo a kapadasanna kunana a dagiti demonio “pagay-ayatda a parparigaten dagiti bumusor a biktimada agingga ken patay.”

Ngem ni Jehova kabaelanna a salakniban dagiti adipenna manipud kadagiti panangatakar ni Satanas.—Proverbio 18:10.