Ti Paraiso a Daga
Ni Jehova pukawennanton a naan-anay ti amin a dakes nga inaramid ni Satanas. Ni Jehova pinagbalinna ni Jesus nga Ari iti isuamin a daga. Iti sidong ti panagturayna, ti daga mapagbalinto a maysa a paraiso.—Daniel 7:13, 14; Lucas 23:43.
Ikari ni Jehova dagitoy a bambanag:
-
NAWADWAD A TARAON: “Ti daga a mismo ipaaynanto ti apitna; ti Dios, ti met laeng Diostayo, bendisionannatayto.” “Addanto ti kinaruay ti bukel iti daga; iti tapaw dagiti bantay margaayandanto.”—Salmo 67:6; 72:16.
-
AWANTON TI GUBAT: “Umaykayo, dakayo a tattao, imatanganyo dagiti ar-aramid ni Jehova, no kasano nga inaramidna dagiti nakaskasdaaw a paspasamak ditoy daga. Pasardengenna dagiti gubat inggana iti ungto ti daga.”—Salmo 46:8, 9.
-
AWANTON DAKES A TATTAO: “Ta dagiti agaramid ti dakes magessatdanto . . . Ket iti bassit pay a darikmat, ket ti nadangkes maawanton; ket mingmingamto a sigaganetget iti ayanna, ket awanton.”—Salmo 37:9, 10.
-
AWANTON TI SAKIT, LADINGIT, WENNO IPAPATAY: “Iti kasta maluktanton ti matmata dagiti bulsek, ken ti laplapayag dagiti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto.”—Isaias 35:5, 6.
“Ket ti Dios a mismo addanto kadakuada. Ket punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.”—Apocalipsis 21:3, 4.
Maisupadi ken Satanas ken dagiti demonio, pulos a di agulbod ni Jehova. Masapul a matungpal ti isuamin nga ikarina. (Lucas 1:36, 37) Ay-ayatennakay ni Jehova ket kalikagumanna nga agbiagkayo idiay Paraiso nga aramidennanto. Gapuna makipagkitakayo kadagiti Saksi ni Jehova tapno adalenyo ti ad-adu pay maipapan kadagiti nakaskasdaaw a kinapudno a masarakan iti Sao ti Dios. No iyaplikaryo ti kinapudno iti biagyo, mawayawayaankayto manipud pannakaibalud iti kinaulbod, an-anito, ken kinanengneng. Inton agangay, maruk-atankayton manipud pannakaigalut iti basol ken ipapatay. Kas kinuna ni Jesus: “Maammuanyonto ti kinapudno, ket ti kinapudno luk-atannakayto.”—Juan 8:32.
Baka Kayatmo Met ti
NAGPAPATEG A PANNURSURO TI BIBLIA
Ania ti Pagarian ti Dios?
Idi nangaskasaba ni Jesus, ti kangrunaan nga insurona ket maipapan iti Pagarian ti Dios. Ginasut a tawenen nga ikarkararag dagiti pasurotna nga umay koman dayta a Pagarian.
