ADU kadagiti siudad idiay Canaan itan ti agsagsagana a lumaban iti Israel. Ngem dagiti tattao idiay arubayan a siudad ti Gabaon namatida a ti Dios tultulonganna dagiti Israelitas. Dida kayat a labanan ti Dios. Isu nga aniat’ aramidenda?

Napanunotda a pagparangen a kasla adayo ti paggigiananda. Ti dadduma kadagiti lallaki nagbadoda ti rutayrutay ken sandalias a marunrunoten. Kinargaanda dagiti asnoda ti mapispisangen a saksako ken nagitugotda ti daanen a tintinapay. Kalpasanna napanda ken Josue ket kunada: ‘Naggapukami iti adayo a daga, ta nangngegmi amin nga inaramid ti naindaklan a Diosyo a ni Jehova kadakayo. Ita, dakamin dagiti ad-adipenyo. Ikariyo a didakam gubgubaten.’

Nakita ni Josue ken ti dadduma a papangulo ti rutayrutay a badbadoda ken ti namagaan a tinapayda, ket pinatida ida. Gapuna inkarida a saanda ida a gubgubaten. Ngem tallo nga aldaw kalpasanna, naammuanda a dagiti Gabaonitas asideg laeng ti paggigiananda.

‘Apay imbagayo kadakami a naggapukayo iti adayo a daga?’ insaludsod ni Josue.

Simmungbat dagiti Gabaonitas: ‘Nangngeganmi a ni Jehova a Diosyo inkarina nga ited amin daytoy a daga ti Canaan kadakayo. Ket nagbutengkami di la ket ta patayendakami.’ Ngem dagiti Israelitas dida patayen ida. No di ket pinagbalinda ida nga ad-adipenda.

Ti ari ti Jerusalem ti nakapungtot iti inaramid dagiti Gabaonitas. Gapuna kunana kadagiti uppat a sabsabali nga ar-ari: ‘Umaykayo ket tulongandak a manggubat iti Gabaon. Ket isu dayta ti inaramid dagiti lima nga ari. Masirib kadi dagiti Gabaonitas a nakikappia iti Israel? Makitatayonto.